In ko t-xnakꞌtzaꞌn Jesús tuꞌn tbant knaꞌn Dios
11
At jun maj oc ten Jesús naꞌl Dios tuj jun lugar,
ex tej tbaj naꞌn Dios,
at jun t-xnakꞌtzben xi tmaꞌn te:
—Tat,
ko t-xnakꞌtzama tuꞌn tbant knaꞌne Dios,
ic tzaꞌn te Juan xi tkꞌoꞌn xnakꞌtzbil cye t-xnakꞌtzben tzaꞌn tten tuꞌn tbant cynaꞌn Dios.
Lucas 11.1-28
2 Xitzun tmaꞌn Jesús cye:
—Oc cynaꞌne Dios,
cykꞌmanxe cyjaꞌ:
A Kman [ata tuj cyaꞌj],
tenwt tchiylal tbiya keye.
E ttzaj ju tcawbila.
[Bant-xwit ju tajbila twitz txꞌotxꞌ ic tzaꞌn in bant tuj cyaꞌj.]
3 Kꞌontza kwaye jaꞌlo,
aju in ajben tcyakil kꞌij.
4 Ex najsama aju mya baꞌn in kbinchaꞌne twitza,
ic tzaꞌn keye in cub knajsaꞌne cypaltil keju in cybinchaꞌn mya baꞌn kiꞌje.
Ex miꞌn takꞌa ambil tuꞌn koque tuj joybil kiꞌje,
[nok oꞌcx ko tcloma teju mya baꞌn.]
5 Ax icx xi tmaꞌn Jesús cye:
—Alcye jun cyeye at jun tamiw,
ex ka ma txiꞌ tucꞌil tamiw tmij akꞌbil ex ma txi tmaꞌn te cyjaꞌ:
Amiw,
kꞌontza ox pan nchꞌexe
6 porque at jun wamiwoye cyjaꞌ t-xiꞌ tuj tbe ma tzul wucꞌile,
ex mintiꞌ chꞌin baꞌn t-xi nkꞌoꞌne te,
ka chi cxel tmaꞌn.
7 Ex ka ma tzꞌetz ttzakꞌweꞌn tamiw te cyjaꞌ:
Miꞌn tzꞌel tiꞌna watl tuj nwitze;
ma lamet ttzi ja,
ex ateꞌ ke tal ncꞌwaꞌle wucꞌile tuj ncoẍbile;
mlay chin jaw weꞌye tuꞌn t-xi nkꞌoꞌne aju in tzaj tkanina,
ka chi tamiw;
8 cxel nmaꞌne cyeye,
masque mlay jaw weꞌ cyamiwoye kꞌol pan cyeye tuꞌnju cyamiw cyibe,
pero tuꞌnju cucx cywuline cjawil weꞌ kꞌolte tcyakilju at tajben cyeye.
9 Cyjaꞌtzun cxel nmaꞌne cyeye:
Cykaninxe,
ex ctzajel tkꞌoꞌn Dios cyeye;
cyjyome,
ex cnetel cyuꞌne;
cykꞌajtzaꞌn oque,
ex cjaketel ttzi ja cywitze.
10 Porque alcye jun xjal in kanin tiꞌj,
oc tcꞌmaꞌ;
ex aju in jyon tiꞌj,
cnetel tuꞌn;
ex aju nnoꞌc tkꞌajtzaꞌn,
cjaketel ttzi ja twitz.
11 ¿Ex alcye jun mambaj cyxole,
[ka ma tzaj tkanin tcꞌwaꞌl jun twa pan,
maj cxel tkꞌoꞌn jun abj?]
Ex ka ma tzaj tkanin tcꞌwaꞌl jun tchiꞌ cyiẍ,
maj cxel tkꞌoꞌn jun lobaj?
12 Ex ka ma tzaj tkanin tcꞌwaꞌl jun tchi jos,
¿maj cxel tkꞌoꞌn jun siꞌnin?
13 Masque mya baꞌn keye,
pero in xi cykꞌoꞌne oyaj baꞌn cye cycꞌwaꞌle.
¿Yajtzunte Cymane aju at tuj cyaꞌj,
mlaypelo tzaj tkꞌoꞌn aju Xewbaj Xjan cye keju in che kanin te?
In tzaj tkꞌoꞌn juꞌẍ tipumal Jesús, che chi parisey
14 At jun xjal etz jun juꞌẍ tuj tanmi tuꞌn Jesús,
otok tzꞌoc xjal men tuꞌn juꞌẍ;
tejtzun tetz juꞌẍ tuj tanmi xjal,
bant tyolin xjal;
ex ke xjal e labin tiꞌj.
15 Pero at junjun xjal in cymaꞌn:
—In che etz juꞌẍ tuj cyanmi xjal tuꞌn Jesús,
porque ate Beelsebú in kꞌonte tipumal,
porque atzun nejenel cye juꞌẍ,
che chi.
16 Ex txkantl xjal xi cykanin tuꞌn tbant jun señ tuꞌn tel cynicꞌ tiꞌj ka atzun tzajni tipumal tuj cyaꞌj,
xi cykanin nok tuꞌn toc Jesús tuj joybil tiꞌj cyuꞌn.
17 Pero el tnicꞌ Jesús tiꞌj cyximbetz ex xi tmaꞌn cye:
—Ka at jun cawbil at pabl tib tuj ex in che kꞌojin xjal cyxolx,
cbel xitj cawbil;
ex ka at jun ja xjal at pabl tib cyxol,
cbel xitj jun ja xjal lu.
18 Icxte Satanás,
ka tpaꞌn tib ex in kꞌojin tiꞌjx,
¿tzaꞌntzun tten cucx tuꞌn tcyaj ten tcawbil?
Porque akeye in cymaꞌne ka nok tuꞌn tipumal Beelsebú in che etz ke juꞌẍ tuj cyanmi xjal wuꞌne.
19 Ka ax toc nok tuꞌn tipumal Beelsebú in che etz juꞌẍ tuj cyanmi xjal wuꞌne,
¿yajtzun cye cyucꞌile,
alcye in kꞌonte cyipumal tuꞌn cyetz juꞌẍ tuj cyanmi xjal?
Cyjaꞌtzun,
ax ke cyucꞌile oc cymaꞌ ka mya tuj tumel cyyole.
20 Katzun tuꞌn tipumal Dios in che etz juꞌẍ tuj cyanmi xjal wuꞌne,
tzꞌelxtzun cynicꞌe tiꞌj ax toc ma tzul tcawbil Dios cyucꞌile.
21 Jun xinak at tipun nok banin tten,
ex ka ma tzꞌoc t-xkꞌukin tja,
tcyakilju at te segur taꞌ.
22 Pero ka ma tzul juntl xjal mas at tipun twitz,
cbel tiꞌj tuꞌn,
entons cꞌelel kꞌiꞌn tcyakil tmacbil aju kꞌukl tcꞌuꞌj tiꞌj,
ex cbel sipan tcyakilju otok tzꞌel kꞌiꞌn te.
23 Alcye jun xjal mya tkꞌon tib wucꞌile,
in kꞌojl wiꞌje;
ex alcye jun xjal mintiꞌ in onin wucꞌile tuꞌn tjaw chmet twitz awal,
nok in baj tchitun.
Aju juꞌẍ in ajtz meltzꞌaj
24 Oc nneꞌtz jun juꞌẍ tuj tanmi jun xjal,
in xiꞌ juꞌẍ betel cyuj lugar tzkij txꞌotxꞌ in jyon tiꞌj jatum tuꞌn tojlan;
ex ka mintiꞌ ma cnet tuꞌn,
in tmaꞌn:
Chin ajel meltzꞌaje juntl maj tuj njaye jatum ẍin etze,
chi juꞌẍ.
25 Octzun tul meltzꞌaj juꞌẍ tuj tanmi xjal,
cꞌoquex tqueꞌyin ic tten ic tzaꞌn jun ja tzꞌisoꞌmaj tuj ex binchaꞌmaj.
26 In xiꞌtzun juꞌẍ ex in che tzaj tiꞌn wuktl juꞌẍ mas mya baꞌn ke twitz;
in che ocxtzun tuj tanmi xjal ex ax in che najan;
te yajxitl mas pyor taꞌ xjal ic tzaꞌn nej.
Aju tzalajbil axix toc
27 Matok in yolin Jesús tiꞌj tcyakil jlu,
at jun xuꞌj jaw schꞌin cyxol xjal,
ex tma:
—At tzalajbil te xuꞌj aju sel itzꞌja tiꞌj ex ma chꞌuꞌna tiꞌj.
28 Atzunte Jesús xi tmaꞌn:
—Micꞌ ttenju,
mas at tzalajbil cye keju in xi cybiꞌn tyol Dios ex in xi cyniman.
Ke xjal mya baꞌn in cykanin tuꞌn tbant jun señ
29 Ex tej toc cychmon cyib nim xjal tiꞌj Jesús,
oc ten Jesús kꞌmalte:
—Akeju xjal ateꞌ tuj tkꞌijlalil jaꞌlo mya baꞌn ke;
cyajbil tuꞌn cylonte jun señ,
pero mlay txi yecꞌun jun señ cye,
nok oꞌcx ju señ tiꞌj Jonás aju t-sanjel Dios.
Lucas 11.29-36
30 Porque ic tzaꞌn te Jonás oc te jun señ cye xjal aj Nínive,
ax icxtzun weye chin oquele te jun señ cye xjal ateꞌ tuj tkꞌijlalil jaꞌlo,
akine scꞌoꞌmaj kine tuꞌn Dios tuꞌn ntene cyucꞌil xjal.
31 Tuj tkꞌijlalil jwisi oc cyoc xjal tuj xjel,
akeju ateꞌ tuj tkꞌijlalil jaꞌlo,
cjawil weꞌ xuꞌj rey aju o cawin tuj jun txꞌotxꞌ t-xe cyaꞌj tuj tnayaj kꞌij,
ex che bel tzꞌak ke xjal lu tuj cyil tuꞌn;
porque ate xuꞌj rey tzaj max ttxaꞌnpun txꞌotxꞌ tuꞌn tul bilte tyol Salomón,
porque nimxix tnabl Salomón;
ex at jun tzalu mas maꞌ toclen twitz Salomón.
32 Tuj tkꞌijlalil jwisi,
oc cyoc xjal tuj xjel,
akeju ateꞌ tuj tkꞌijlalil jaꞌlo,
che jawil weꞌ ke xjal aj Nínive ex che bel tzꞌak ke xjal lu tuj cyil cyuꞌn;
porque ke xjal aj Nínive ajtz tiꞌj cyanmi tej cybinte tpacbabl Jonás;
ex at jun tzalu mas maꞌ toclen twitz Jonás.
Aju spicꞌun te kximlal
33 Mi jun xjal in cub kꞌonte jun candil tuj ewaj toclenxi ttxakoꞌn,
ex mlay tzꞌocx tkꞌoꞌn tjakꞌ jun cajón,
oꞌcx in jax tkꞌoꞌn tibaj jun tcubil,
tuꞌntzun tkꞌonte spicꞌun cye cycyakil keju ateꞌ tuja.
34 Ke tbakꞌ twitza atzun t-spicꞌumal t-ximlala;
katzun baꞌn ateꞌ tbakꞌ twitza,
ax icx tcyakil t-ximlala at tuj spicꞌun;
pero ka mya baꞌn ateꞌ tbakꞌ twitza,
ax icx t-ximlala at tuj klolj.
35 Kꞌoꞌnca cwent tiꞌj aju spicꞌun at teya myawt klolj.
36 Katzun tcyakil t-ximlala at tuj spicꞌun,
ex mintiꞌ chꞌin klolj tuj,
tcyakil cspicꞌebel twitza ic tzaꞌn jun tkan kꞌakꞌ in t-spicꞌbaꞌn twitza.
In tchicꞌbaꞌn Jesús mya baꞌn cyakꞌunben parisey cyucꞌix ke xnakꞌtzal tiꞌj ley
37 Tej tbaj yolin Jesús,
at jun parisey o cubsan twitz tuꞌn twaꞌn Jesús tucꞌil;
ocxtzun Jesús tuj tja,
ex cub keꞌ tiꞌj mes.
Lucas 11.37-54
38 Tej toc tqueꞌyin parisey mintiꞌ el ttxꞌjoꞌn Jesús tkꞌab tej toc waꞌl,
o labin tiꞌj.
39 Atzunte Kajaw xi tmaꞌn te:
—Akeye parisey ic cytene ic tzaꞌn jun xjal oꞌcx tiꞌj vas ex tiꞌj lak nneꞌl ttxꞌjoꞌn,
atzun tujxi mintiꞌ in baj ttxꞌjoꞌn,
porque tuj cyanmiye oꞌcx in che ximane tiꞌj tuꞌn cyelkꞌane ex tuꞌn cybinchanteye mya baꞌn.
40 Miban che bine.
¿Mintiꞌpe nneꞌl cynicꞌe tiꞌj,
aju o binchante te tiꞌjxi,
axju o binchante te tujxi?
41 Cyjaꞌtzun,
cykꞌonxe cycotz xjal tuꞌn tcyakil cycꞌuꞌje,
ex che cyjeltzune sak keye.
42 Becꞌbil cywitze,
parisey.
Porque in xi cykꞌoꞌne tlajiꞌn te Dios tiꞌj tal cꞌul alwen tbi,
ex tiꞌj rud,
ex tiꞌj tcyakil tal cꞌul awaꞌn cyuꞌne,
pero mintiꞌ nnoꞌc cykꞌoꞌne cwent tiꞌj tuꞌn cybinchanteye aju tzꞌaklxix ex tzaꞌn tten tuꞌn cycꞌujlanteye Dios.
Atzun jlu tuꞌn tbant cyuꞌne,
ex tuꞌn miꞌn tcyaj cykꞌoꞌne aju mastl.
43 Becꞌbil cywitze,
parisey.
Cyajbile tuꞌn cycub keꞌye tuj tnejel kꞌukbil tuj ja te cꞌulbil,
ex tuꞌn cyoc kꞌolbeꞌne tuj plas tucꞌil nimbil.
44 Becꞌbil cywitze xnakꞌtzal tiꞌj ley ex parisey,
xmletzꞌ keye.
Ic cytene ic tzaꞌn tjulil cyimni mintiꞌ kꞌanchaꞌl,
ex ke xjal in che bet tibaj mintiꞌ baꞌn cyuꞌn.
45 Ex tzaj ttzakꞌweꞌn jun chicꞌbal tiꞌj ley:
—Xnakꞌtzal,
aju tyola lu ax icx kibaje in cub tzꞌak.
46 Ex tma Jesús:
—Ax icx becꞌbil cywitze chicꞌbal tiꞌj ley,
porque in xi cykꞌoꞌne cyikatz xjal mlay cꞌisj cyuꞌn,
atzun cyeye mintiꞌ nnoꞌc cykꞌoꞌne jun tal cykꞌabe tiꞌj iktz.
47 Becꞌbil cywitze,
in jaw cybinchaꞌne cypantyón ke t-sanjel Dios ex cyuꞌn cyxeꞌchele e cub byoꞌn ojtxi.
48 Cyjaꞌtzun in cyyecꞌune ka mojl takꞌpon cyuꞌne cyucꞌil cyxeꞌchele;
porque cyuꞌn cyxeꞌchele e cub byoꞌn ke t-sanjel Dios ojtxi,
atzun cyeye in jaw cybinchaꞌne cypantyón.
49 Cyjaꞌtzun o tma Dios aju at nim tnabl:
Che xel nsamaꞌne nsanjele cyucꞌix apostl yolil cyucꞌil;
at junjun cye che bel byoꞌn cyuꞌn,
ex junjun che bajel yajlaꞌn cyuꞌn,
chi Dios.
50 Cyjaꞌtzun che bel tzꞌak ke xjal lu tuj cyil tuꞌn tlaj cychcꞌel cycyakil t-sanjel Dios,
akeju o che cub byoꞌn atxix tbantlen twitz txꞌotxꞌ,
51 tzajnix bant tej tcub byoꞌn Abel ex japun tiꞌj Zacarías,
aju o cub byoꞌn tiꞌjxi altar twitz tja Dios.
Cyjaꞌtzun cxel nmaꞌne cyeye,
che bel tzꞌak xjal lu tuj cyil tuꞌn cylaj t-sanjel Dios e cub byoꞌn.
52 Becꞌbil cywitze,
chicꞌbal tiꞌj ley.
Ma txi cytzyuꞌne ju tal ja te ojtzkibl;
ax keye mintiꞌ ma che ocxe tuj;
o cyajbe xjal tuꞌn cyocx,
pero xi cymayoꞌne tuꞌn miꞌn cyocx xjal.