Aju techal cyiꞌj ke akꞌnal mya baꞌn
12
Ex oc ten Jesús kꞌmalte junjun techal cye,
chi cyjaꞌ:
—At jun xjal cuꞌx tawaꞌn tkan uva,
oc tkꞌoꞌn peꞌn tiꞌj,
cuꞌx tlacuꞌn jun jul jatum tuꞌn tel ptzꞌet taꞌl uva,
ex jaw tbinchaꞌn jun ja te cwentbil tkan uva.
Entons xi tkꞌoꞌn ttxꞌotxꞌ te cymajen akꞌnal,
ex xiꞌ tuj juntl lugar najchak.
2 Tejtzun tpon tkꞌijlalil tuꞌn tcub twitz awal,
tzaj t-samaꞌn jun tmajen cyucꞌil majenal txꞌotxꞌ tuꞌn t-xi cykꞌoꞌn majenal txꞌotxꞌ chꞌin twitz awal te.
3 Atzun cye majenal txꞌotxꞌ tzaj cytzyuꞌn ju majen ex baj cycꞌixbisaꞌn,
ex aj cysamaꞌn mintiꞌ chꞌin kꞌiꞌn tuꞌn.
4 Tzaj t-samaꞌn xjal juntl tmajen;
atzun cye majenal txꞌotxꞌ oc cyxoꞌn tuꞌn abj,
oc cycꞌixbisaꞌn twiꞌ,
ex oc cyyasoꞌn.
5 Tzaj t-samaꞌn xjal juntl tmajen,
atzun te jlu biꞌx cub cybyoꞌn.
Ex te tibajxi e jeꞌx t-samaꞌn txkantl majen;
junjun baj cycꞌixbisaꞌn,
ex junjun cub cybyoꞌn.
6 Ex atxtok juntl tuꞌn ttzaj t-samaꞌn,
acu ju tcꞌwaꞌl cꞌujlaꞌnxix tuꞌn;
te mancbilxitzun tzaj t-samaꞌn tcꞌwaꞌl.
Kapelo at chꞌin tchi tuj cywitz oc tpon ncꞌwaꞌle,
chi xjal.
7 Atzun cye majenal txꞌotxꞌ cyma cyxolx:
Atzunte etzal jlu;
chux keye,
kbyoncu tuꞌntzun tcyaj ten tkan awal te ke,
che chi.
8 Tzyettzun cyuꞌn,
cub cybyoꞌn,
ex cyxoꞌn tiꞌjxi tkan awal.
9 ¿Titzun oc tbinchaꞌ tajwil tkan awal?
Ctzajeltzun ex che bel tbyoꞌn ke majenal txꞌotxꞌ,
ex cxel tkꞌoꞌn ttxꞌotxꞌ te cymajen txkantl xjal.
10 ¿Bajxpe jaw cyschꞌiꞌne jatum in tmaꞌn tuj Tuꞌjil chi cyjaꞌ?:
Aju abj el cyicꞌun ke binchal ja,
atzunju ma tzꞌoc te scyini te simyent.
11 Tuꞌn Kman ma bant jlu,
ex maꞌ t-xilen jlu tuj kwitz,
chi tuj Tuꞌjil.
12 Octzun tilil cyuꞌn tuꞌn ttzyet Jesús porque canun tuj cynabl ka cyiꞌj xi tmaꞌn Jesús ju techal lu,
pero tzaj cyxobil cywitz xjal,
cyjaꞌtzun cyaj cykꞌoꞌn ex e icꞌ.
Tuꞌn tkꞌonjtz chojbil te gobierni
13 Ex tzaj cysamaꞌn parisey junjun cyucꞌil cyucꞌix junjun xjal ateꞌ tuj tpartid Herodes,
tuꞌntzun tcub tzꞌak Jesús tuj jun tyol cyuꞌn.
14 Tejtzun cyul ke,
xi cymaꞌn te:
—Xnakꞌtzal,
baꞌn ke kuꞌn ax toc tyola,
ex mintiꞌ in xoba cywitz xjal,
porque mintiꞌ in tqueꞌyina ti t-xilen xjal,
nok oꞌcx in tkꞌoꞌna jun xnakꞌtzbil axix toc tiꞌj jun be tuꞌn cyoc lpeꞌ xjal tiꞌj Dios.
¿Baꞌnpe tuꞌn t-xi kkꞌoꞌne chojenj nneꞌl tkanin gobierni te Rom,
ex ka miꞌn?
¿Ocpe cxel kkꞌoꞌne,
ex ka miꞌn?
Che chi.
15 Atzunte Jesús el tnicꞌ cyiꞌj xmletzꞌ ke ex xi tmaꞌn cye:
—¿Tikuꞌn in che jyone tumel wiꞌje?
Cyiꞌntze jun pwak tuꞌn toc nqueꞌyine.
16 Ultzun cyiꞌn,
ex xi tmaꞌn Jesús cye:
—¿Al etzun tilbilal jlu toc twitz,
ex al etzun biybaj tzꞌiban twitz?
—Te gobierni,
che chi.
17 Xitzun tmaꞌn Jesús cye:
—Pues cykꞌonxe te gobierni aju te gobierni,
ex cykꞌonxe te Dios aju te Dios,
chi Jesús cye.
Ex e jaw labinxix tiꞌj tyol.
Aju xjelbil tiꞌj ankꞌibl
18 E ultzun junjun sadusey tucꞌil Jesús,
akeju in cymaꞌn ka mlay jatz ankꞌin jun xjal cyxol cyimni;
ex xi cykanin te:
19 —Xnakꞌtzal,
at jun yol cyaj ttzꞌiban Moisés ke.
Ka at jun xjal ma cyim ttzic ex ma cyaj ten t-xuꞌjil ktzan ttzic ex mintiꞌ jun tcꞌwaꞌl otok tzaj,
il tiꞌj tuꞌn tmojeꞌ xjal tucꞌil t-xuꞌjil ktzan ttzic,
tuꞌntzun tcyaj jun t-xel ktzan ttzic tuꞌn,
tuꞌn miꞌn tnaj tiyjil.
20 At wuk xjal e ten cyitzꞌin cyib;
aju tnejel cnet t-xuꞌjil,
ex o cyim mintiꞌ jun tcꞌwaꞌl cyaj.
21 Ex ax ju xuꞌj jaw tiꞌn tzꞌinbaj te t-xuꞌjil;
ax icx o cyim mintiꞌ jun tcꞌwaꞌl cyaj.
Ax icx o baj tiꞌj tcabin tzꞌinbaj.
22 Ex elpun baj cywitz cywukil xinak tuꞌn xuꞌj,
ex mintiꞌ jun cycꞌwaꞌl cyaj.
Te mancbilxitzun icxte xuꞌj cyim.
23 Tuj tkꞌijlalil oc cyjatz ankꞌin xjal,
¿alcyetzun jun cyxol cywukil cꞌoquel te tchmil xuꞌj lu,
porque cywukil e xuꞌjlan te?
Che chi.
24 Xi ttzakꞌweꞌn Jesús:
—¿Myapetzun tuꞌn jlu in che el txalpuje tuꞌnju mintiꞌ nneꞌl cynicꞌe tiꞌj ju tzꞌiban tuj Tuꞌjil ex tuꞌnju mintiꞌ nneꞌl cynicꞌe tiꞌj tipumal Dios?
25 Porque tuj tkꞌijlalil oc cyjatz ankꞌin xjal cyxol cyimni,
mintiꞌ cyxuꞌjil xinak ex mintiꞌ cychmil xuꞌj cnetel,
nok oꞌcx che oquel ic tzaꞌn ke anjel ateꞌ tuj cyaꞌj.
26 Atzunju yol cyiꞌj cyimni oc cyjatz ankꞌin,
¿bajxpe jaw cyschꞌiꞌne tuj tuꞌjil Moisés tzaꞌn tten cub tyecꞌun tib Dios tiꞌj jun chꞌiꞌx in cꞌant,
tuꞌn tyolin tucꞌil Moisés?
Chi Dios:
Akine Tdios Abraham ex Tdios Isaac ex Tdios Jacob.
27 Ate Dios mya Cydios cyimni,
nok oꞌcx Cydios itzꞌ;
cyjaꞌtzun nim in che el txalpuje tiꞌj,
chi Jesús cye.
Aju mandamyent mas maꞌ toclen
28 Pontzun lakꞌeꞌ jun xnakꞌtzal tiꞌj ley,
in bintok cyiꞌj tej cyyolin sadusey tucꞌil Jesús,
ex o tbi ka otok tzakꞌwet xjel tuꞌn Jesús tuj tumelxix,
xitzun tkanin te Jesús:
—¿Alcye tnejel mandamyent mas nim toclen cyxol cycyakil?
Chi xjal.
29 Xi ttzakꞌweꞌn Jesús:
—Aju tnejel mandamyent cyxol cycyakil,
atzun jlu:
Cybintze akeye aj Israel,
ate Kman Kdios,
oꞌcxcu junx.
30 Cycꞌujlamtzune Kman Dios tuꞌn tcyakil cyanmiye,
tuꞌn tcyakil cycꞌuꞌje,
tuꞌn tcyakil cynable,
ex tuꞌn tcyakil cyipumale.
Atzun tnejel mandamyent jlu maꞌxix toclen.
31 Ex aju tcabin mandamyent icx tten ic tzaꞌn tnejel,
atzun jlu:
Cycꞌujlame ke cyucꞌile ic tzaꞌn cyeye in cycꞌujlan cyibe,
chi tuj Tuꞌjil.
Mintiꞌ juntl mandamyent mas nim toclen cywitz jlu,
chi Jesús te.
32 Atzunte xnakꞌtzal tiꞌj ley xi tmaꞌn:
—Tuj tumelxix ma tmaya Xnakꞌtzal.
Ax toc tyola,
nok junxte Dios at,
ex mintiꞌ juntl,
oꞌcx te.
33 Ex aju tuꞌn kcꞌujlante Dios tuꞌn tcyakil kcꞌuꞌj,
ex tuꞌn tcyakil knabl,
ex tuꞌn tcyakil kanmi,
ex tuꞌn tcyakil kipumal,
ex tuꞌn kcꞌujlante ke kucꞌil ic tzaꞌn ke in kcꞌujlan kib,
mas maꞌ toclen jlu twitz tcyakil oyaj in cub patit tibaj altar ex twitz tcyakil oyaj in xi kꞌot te Dios,
chi xnakꞌtzal tiꞌj ley.
34 Tejtzun tbinte Jesús otok tzaj ttzakꞌweꞌn xjal tuj tumelxix,
xi tmaꞌn te:
—Nok chꞌintl taj tuꞌn tcanuna tiꞌj tcawbil Dios,
chi Jesús te.
Ya mintiꞌtl oc cynimarin cyib tuꞌn t-xi cykanin juntl yol te.
¿Al e cꞌwaꞌlbaj ju Crist?
35 Tejtzun t-xi tkꞌoꞌn Jesús xnakꞌtzbil cye xjal tuj tja Dios,
xi tmaꞌn:
—¿Tzaꞌn tten in cymaꞌn ke xnakꞌtzal tiꞌj ley ka tcꞌwaꞌl David ju Crist aju at toclen tuꞌn Dios?
36 Porque ax David at jun yol cyaj tmaꞌn tuꞌn tipumal Xewbaj Xjan.
Chi cyjaꞌ:
Xi tmaꞌn Kman te Wajawe:
Kecuya tuj nbankꞌabe,
acutzun in cub cyiꞌj ke aj kꞌoj tiꞌja wuꞌne,
chi tuj Tuꞌjil.
37 Ka in tmaꞌn David ka a Crist Tajaw,
¿tzaꞌntzun tten tuꞌn toc Crist te tcꞌwaꞌl?
Chi Jesús cye.
Ex nimcu xjal cub cybiꞌnxix tyol Jesús in che tzalaj tiꞌj.
In tchicꞌbaꞌn Jesús mya baꞌn cyakꞌunben ke xnakꞌtzal tiꞌj ley
38 Ex tuj ju t-xnakꞌtzbil xi tmaꞌn Jesús cye:
—Ten cycwente cyiꞌje cye xnakꞌtzal tiꞌj ley,
nim cygan tiꞌj tuꞌn cybet toc cyxbalun ẍjoꞌw,
ex cyajbil tuꞌn cyoc kꞌolbeꞌn tuj plas.
39 Ex cyajbil tuꞌn cycub keꞌ cyuj cynejel kꞌukbil cyuj ja te cꞌulbil,
ex cyajbil tuꞌn cycub keꞌ cyuj tbanil kꞌukbil cyuj nintz waꞌn.
40 Nneꞌl cyiꞌn cyja meba xuꞌj,
ex in che naꞌn Dios nim tuj,
tuꞌntzun tmakset cybinchben.
Mas nim cysentens jlu cbel,
chi Jesús cye.
Aju oyaj tuꞌn jun meba xuꞌj
41 Ex cub keꞌ Jesús ttxlaj cꞌubl pwak tuj tja Dios,
in queꞌyin tiꞌj tej tcuꞌx cykꞌoꞌn xjal cyoyaj tuj cꞌubl pwak,
ex nimcu kꞌinun cuꞌx cykꞌoꞌn nim pwak.
La ofrenda de la viuda (Marcos 12.41-44)
42 Ax icx pon jun meba xuꞌj,
tal yajxix,
cuꞌx tkꞌoꞌn cabe tal sentav.
43 E tzajtzun ttxcoꞌn Jesús ke t-xnakꞌtzben ex xi tmaꞌn cye:
—Ax toc cxel nmaꞌne cyeye,
aju meba xuꞌj lu tal yajxix,
mas nim ma cuꞌx tkꞌoꞌn cywitz cycyakil keju ma cuꞌx cykꞌoꞌn cyoyaj tuj cꞌubl pwak;
44 porque cycyakil ke jlu ma cuꞌx cykꞌoꞌn aju in cyaj sobryin cye;
atzunte xuꞌj lu masque tal yajxix,
pero ma cuꞌx tkꞌoꞌn tcyakilju at tajbenil twi twa,
chi Jesús cye.