Tej tocx Jesús tuj tnam Jerusalén
11
Tejtzun chꞌixtok cycanun tuj tnam Jerusalén,
nikayin cytxlaj ke tnam Betfagé tucꞌix Betania,
otok che pon nikayin t-xe witz Olivos tbi,
xi t-samaꞌn Jesús cabe t-xnakꞌtzben,
2 ex xi tmaꞌn cye:
—Cyxiꞌye tuj aldey tocx ma chixin,
octzun cyocxe tuj aldey,
cnetel jun tal bur cyuꞌne cꞌaloꞌn,
aju naꞌnx tjax jun xjal chejil tibaj;
cypajuꞌmile ex cyiꞌntze tzalu.
3 Katzun at jun xjal ma tzaj kꞌmante cyeye:
¿Tikuꞌn in cybinchaꞌne jlu?
ka chi;
cꞌajbel te Kajaw,
che chicuye,
ex jurat cꞌajetz t-samaꞌn.
4 E jeꞌxtzun ke xnakꞌtzben,
ex cnet tal bur cyuꞌn cꞌaloꞌn ttzi pwert ttzi cay,
ex eltzun cypajuꞌn.
5 Ex at junjun xjal ax waꞌl keꞌtok,
xi cymaꞌn:
—¿Ti nbaj cyeye?
¿Tikuꞌn nneꞌl cypajuꞌne tal bur?
Che chi.
6 Xitzun cymaꞌn xnakꞌtzben cye ic tzaꞌn otok txi kꞌmaꞌn cye tuꞌn Jesús;
xitzun kꞌoꞌn permis cye cyuꞌn xjal.
7 Ultzun cyiꞌn tal bur tucꞌil Jesús,
ex jax cykꞌoꞌn cyxbalun tibaj,
jaxtzun ten Jesús tibaj.
8 Ex nimcu xjal cub cylicꞌun cyxbalun tuj be,
ex txkantl xjal el cytxꞌemin tkꞌab tzeꞌ,
cub cykꞌoꞌn tuj be.
9 Ex akeju xjal nejni twitz Jesús cyucꞌix keju lepch keꞌc tiꞌj in che schꞌin in cymaꞌn:
—Kkꞌonx kꞌolbebl te.
Awt Dios cyꞌiwlante ju tzul,
aju ma tzaj samaꞌn tuꞌn Kman.
10 Awt Dios cyꞌiwlante ju cawbil tzul,
aju tcawbil kxeꞌchel David.
Nimanxwit tbi Dios tuj cyaꞌj.
11 Ocxtzun Jesús tuj tnam Jerusalén,
ex ocx tuj tja Dios;
tejtzun tbaj tqueꞌyin tcyakil,
etztzun tuꞌn t-xiꞌ tuj Betania cyucꞌix ke cablaj t-xnakꞌtzben,
porque otok tzꞌoc kax.
Biꞌx tzkij tkan higo tuꞌn tyol Jesús tuꞌnju mintiꞌ twitz
12 Tuj juntl kꞌij tej cyetz tuj Betania,
tzaj el tcꞌuꞌj Jesús.
13 Ex xi tqueꞌyin Jesús jun wiꞌ tkan higo najchak,
attok t-xak;
xiꞌtzun lolte ka at jun twitz tuꞌn tcnet tuꞌn;
pero tej tpon t-xe tkan higo,
mintiꞌ jun twitz cnet,
nok oꞌcx t-xak at,
porque mya a kꞌij at twitz higo.
14 Xitzun tmaꞌn Jesús te tkan higo:
—Te jumajx mlayx txi loꞌntl jun twitza tuꞌn jun xjal,
chi Jesús.
O cybi ke t-xnakꞌtzben tej tmante Jesús jlu.
E jeꞌtz tlajoꞌn Jesús ke cꞌayil tuj tja Dios
15 E pontzun tuj Jerusalén ex ocx Jesús tuj tja Dios,
e jeꞌtz tlajoꞌn keju in che cꞌayin ex keju in che lokꞌon tuj ttxaꞌn peꞌn tja Dios,
ex jaw tpichꞌkꞌuꞌn cymes chꞌexpul twitz pwak cyucꞌix cykꞌukbil keju in che cꞌayintok paloma.
16 Ex mintiꞌ o tcuyi tuꞌn cyicꞌ xjal twitz tja Dios ka kꞌiꞌn jun tiꞌxti cyuꞌn.
17 Ex xi tkꞌoꞌn Jesús xnakꞌtzbil cye,
xi tmaꞌn:
—¿Myapetzun tzꞌiban tuj Tuꞌjil:
We nja cꞌoquel tbi ja te nabl Dios cye cycyakil xjal,
chi tuj Tuꞌjil?
Atzun cyeye ma tzꞌoc cykꞌoꞌne te cyjul elekꞌ,
chi Jesús cye.
18 Ex o cybi ke xnakꞌtzal tiꞌj ley tiꞌj jlu,
cyucꞌix ke nejenel cye pal,
ex e oc ten jyol tumel tzaꞌn tten tuꞌn tbyet Jesús cyuꞌn,
porque in che xobtok,
tuꞌnju in che labin cycyakil xjal tiꞌj t-xnakꞌtzbil.
19 Tejtzun toc kax etz Jesús tuj tnam.
Biꞌx tzkij tkan higo
20 Te juntl kꞌij te prim cyjaꞌ cyxiꞌ,
o cyil otok tzkij tkan higo tucꞌix tlocꞌ.
21 Tzajtzun tnaꞌn Pedro ti otok baj tiꞌj tkan higo,
ex xi tmaꞌn te Jesús:
—Xnakꞌtzal,
aju tkan higo xiꞌ tyola tiꞌj,
queꞌyinxa ma tzkij,
chi Pedro.
22 Xi tmaꞌn Jesús cye:
—Keꞌc cycꞌuꞌje tiꞌj Dios.
23 Porque ax toc cxel nmaꞌne cyeye,
ka at jun xjal ma kꞌmante teju witz lu:
Ticꞌa tzalu ex xoꞌn cux tiba tuj mar,
ka chi xjal,
cbantel aju cxel tmaꞌn ka mintiꞌ xjawjeꞌ tcꞌuꞌj,
nok oꞌcx kꞌukl tcꞌuꞌj tiꞌj tuꞌn tbant aju cxel tmaꞌn.
24 Cyjaꞌtzun cxel nmaꞌne cyeye,
tcyakilju cxel cykanine oc cynaꞌne Dios,
keꞌ cycꞌuꞌje tiꞌj ic tzaꞌn otok cycꞌame,
ex ctzajeltzun kꞌoꞌn cyeye.
25 Ex oc cycub tene naꞌl Dios,
ka at jun xjal mya baꞌn cytene tucꞌil,
cynajsame til,
tuꞌntzun icx cyeye tuꞌn tcub najsaꞌn cyile tuꞌn Cymane aju at tuj cyaꞌj.
26 [Katzun mintiꞌ xcub cynajsaꞌne til juntl,
ax icx cyeye mlay cub najsaꞌn cyile tuꞌn Cymane aju at tuj cyaꞌj.]
Aju toclen Jesús
27 E pontzun juntl maj Jesús tuj tnam Jerusalén,
ex in bettok Jesús tuj tja Dios.
E pontzun ke nejenel cye pal tucꞌil,
cyucꞌix ke xnakꞌtzal tiꞌj ley,
ex cyucꞌix cytijil xjal.
28 Xitzun cykanin te:
—¿Ti toclena tuꞌn tbinchanteya jlu,
ex alcye saj kꞌonte toclena tuꞌn tbinchanteya tcyakil jlu?
Che chi.
29 Xi ttzakꞌweꞌn Jesús:
—Icx weye at jun nxjele cyeye;
ka ma chin tzaj cytzakꞌweꞌne jacutzun txi nmaꞌne cyeye ti woclene tuꞌn nbinchanteye tcyakil jlu.
30 ¿Tuꞌnpe Dios tzaj kꞌmaꞌn te Juan tuꞌn cybyan xjal tuꞌn tuj aꞌ,
ex ka cyuꞌn xjal tzaj cymaꞌn?
Chin cytzakꞌwentze.
31 Atzun cye e oc ten yolil tiꞌj cyxolx:
—Ka ma txi kmaꞌn,
tuꞌn Dios tzaj tmaꞌn:
Tikuꞌntzun mintiꞌ xi cyocslaꞌne?
chilo ke.
32 ¿Ex katzun cxel kmaꞌn,
cyuꞌn xjal tzaj cymaꞌn?
che chi.
Pero tzaj cyxobil cywitz xjal,
porque cycyakil xjal in che yolin tiꞌj Juan ka ax toc t-sanjel Dios.
33 Oꞌcx tzaj cytzakꞌweꞌn:
—Mintiꞌ biꞌn kuꞌne,
che chi.
Tzajtzun ttzakꞌweꞌn Jesús:
—Icx weye,
mlay txi nmaꞌne cyeye ti woclene tuꞌn nbinchanteye tcyakil jlu.