Aju Tkanil Baꞌn O Tzꞌibanjtz Tuꞌn
SAN LUCAS
Aju t-xilen uꞌj xi ttzꞌiban Lucas
1
Nimcu xjal o cyajbe tuꞌn tcub cytzꞌiban ke yol tuj tumelxix tiꞌj tcyakilju o baj kxole.
Lucas 1.1-25
2 Ic tzaꞌn ma ko xnakꞌtzanjtze cyuꞌn keju e queꞌyinte atxix ttzajlen xeꞌt,
ex e oc pacbal tiꞌj tkanil baꞌn.
3 Tbajlenxi nqueꞌyine tcyakil tuj tumelxix atxix t-xe tnejel,
ax icx weye baꞌn ela tuj nwitze tuꞌn t-xi ntzꞌibane tcyakil teya tuj tumelxix,
aya Teófilo maꞌ toclena,
4 tuꞌntzun telxix tnicꞌa tiꞌj ka axix toc tcyakilju o xnakꞌtzanjtza tiꞌj.
Tzaj tkꞌoꞌn jun anjel tkanil tuꞌn titzꞌj Juan, aju in che byan xjal tuꞌn
5 Tej toctok Herodes te rey tuj txꞌotxꞌ Judey,
attok jun pal cye xjal judiy,
Zacarías tbi,
at toclen cyxol jun cꞌloj pal tiyjil Abías.
Aju t-xuꞌjil Zacarías Elisabet tbi,
ax tiyjil pal Aarón.
6 Cycabil tzꞌaklxix ke twitz Dios,
ex in che ankꞌin mintiꞌ cypaltil,
porque in xi cyniman cycyakil tmandamyent Kman tucꞌix ju tley.
7 Pero mintiꞌ jun cycꞌwaꞌl at,
porque miban alin Elisabet,
ex cycabil otok che tijin.
8 Tej tpon kꞌij tuꞌn cyajben Zacarías cyucꞌix ke tucꞌil tuj tja Dios,
9 ic tzaꞌnx cymod ke pal cye judiy,
tcꞌulbacu a Zacarías tuꞌn tocx tuj tja Dios patulte storac.
10 Ex cycyakil xjal in che naꞌntok Dios ttxaꞌn peꞌn tuj or tej matok in tzꞌeꞌy storac.
11 Ex cub tyecꞌun tib jun t-anjel Kman twitz Zacarías,
waꞌltok ju anjel lu tuj bankꞌabaj ttxlaj altar jatum in cub patit storac.
12 Tej tqueꞌyinte Zacarías ju anjel,
jaw secꞌpaj ex tzaj nim t-xobil.
13 Atzunte anjel xi tmaꞌn te:
—Miꞌn xoba Zacarías;
porque tzul tkꞌoꞌn Dios aju xi tkanina te,
ex ctzajel jun tcꞌwaꞌla tiꞌj t-xuꞌjila Elisabet,
ex Juan tbi cꞌoquel tkꞌoꞌna.
14 Ctzalajela nimxix tiꞌj,
ex nimcu xjal che tzalajel oc titzꞌj cꞌwaꞌl lu;
15 porque nim toclen ju tcꞌwaꞌla twitz Dios.
Miꞌn txi tcꞌaꞌn vin mi kꞌeꞌn,
ex cnojel tuj tanmi tuꞌn Xewbaj Xjan tzajnix bant naꞌnxtok tul itzꞌj.
16 Ex nimcu aj Israel che ajetz meltzꞌaj tuꞌn Juan tuꞌn cyul tucꞌil Kman aju Cydios.
17 Ate Juan cxeꞌl nej twitz Kajaw,
ax toclen ex tipumal ic tzaꞌn te Elías aju t-sanjel Dios,
tuꞌntzun tbant cyten ke mambaj cyucꞌil cycꞌwaꞌl,
ex tuꞌn tbant cyniman keju miban che niman.
Cyjaꞌtzun nok banin cyten xjal tuꞌn Juan tuꞌntzun tcꞌmet Kajaw cyuꞌn oc tul,
chi anjel.
18 Xitzun tkanin Zacarías te anjel:
—¿Tzaꞌn tten cꞌelel nnicꞌe tiꞌj jlu ka ax toc?
Porque weye ma chin tijine,
ax icx nxuꞌjile,
chi Zacarías.
19 Xitzun ttzakꞌweꞌn anjel:
—Akine Gabriel in chin ajbene te Dios;
axte Dios ma tzaj samante weye tuꞌn nyoline tucꞌila,
ex tuꞌn t-xi nmaꞌne aju baꞌn tkanil lu teya.
20 Pero jaꞌlo cꞌoquela men ex mlay bant tyolina;
maxi cbantel tyolina ocxi tul itzꞌj tcꞌwaꞌla,
cꞌoquela men porque mintiꞌ ma txi tocslaꞌna aju ma txi nmaꞌne teya,
aju cjapunel oc tpon tkꞌijlalil,
chi anjel.
21 Atzun cye xjal in che ayontok tiꞌj Zacarías ttxaꞌn peꞌn ex in che labin tiꞌj tuꞌnju nim tuj o ten tuj tja Dios.
22 Tejtzun tetz Zacarías mintiꞌ bant tyolin cyucꞌil xjal;
eltzun cynicꞌ xjal tiꞌj ka at jun otok tzaj yecꞌun te ic tzaꞌn tuj witzicꞌ tuj tja Dios.
Atzunte Zacarías nok tuꞌn tkꞌab xi tyecꞌun cye,
porque otok tzꞌoc te men.
23 Tejtzun tjapun baj kꞌij tuꞌn tajben Zacarías tuj tja Dios,
ajtzun tja.
24 Tbajlenxitzun jlu,
oc ten tal Elisabet aju t-xuꞌjil Zacarías,
ex cyaj ten jweꞌ xjaw tuj tja mintiꞌ ex betel,
in ximan tiꞌj chi cyjaꞌ:
25 Ma tbincha Kman jun xtalbil weye jaꞌlo,
tuꞌntzun miꞌn nchꞌixwiye mastl cyxol xjal,
chi Elisabet.
Tzaj tkꞌoꞌn jun anjel tkanil tuꞌn titzꞌj Jesús
26 Tbajlenxitzun kak xjaw,
tzaj t-samaꞌn Dios aju anjel Gabriel,
ul tuj jun tnam Nazaret tbi tuj txꞌotxꞌ Galiley.
Lucas 1.26-56
27 Ul tja jun kꞌapoj naꞌnxtok tlonte xinak,
banin tiꞌj tuꞌn tmojeꞌ tucꞌil jun xinak José tbi,
ate José tiyjil rey David;
atzun tbi kꞌapoj Mariy.
28 Ocxtzun ju anjel jatum taꞌ Mariy ex xi tmaꞌn te:
—In xi nkꞌolbena,
nim t-xtalbil Dios ma tzaj tkꞌoꞌn teya.
Ate Kman at tucꞌila.
[Mas ma cub cyꞌiwlaꞌna tuꞌn Dios cywitz cycyakil xuꞌj.]
29 Tej tqueꞌyinte Mariy ju anjel,
biꞌx naj tnabl tuꞌnju yol lu,
ex cub t-ximan tikuꞌn in kꞌolbenjtz icju.
30 Atzunte anjel xi tmaꞌn te:
—Miꞌn xoba Mariy,
porque ma tzaj tkꞌoꞌn Dios t-xtalbil teya.
31 Ex jaꞌlo cꞌoquel ten tala,
ex tzul itzꞌj jun tala,
ex JESUS tbi cꞌoquel tkꞌoꞌna.
32 Maꞌ toclen Cꞌwaꞌl lu;
ex cꞌoquel kꞌmaꞌn tbi Tcꞌwaꞌl Dios,
aju Dios Maꞌxix Toclen;
cxel tkꞌoꞌn Kman Dios toclen tuꞌn toc te rey ic tzaꞌn te David,
porque atzun t-xeꞌchel.
33 Ccawil cyibaj tiyjil Jacob te jumajx;
ex aju tcawbil mintiꞌ bajsbil te,
chi anjel.
34 Atzunte Mariy xi tkanin te anjel:
—¿Tzaꞌn tten jlu?
Porque weye naꞌnx nmojeꞌye tucꞌil xinak.
35 Xitzun ttzakꞌweꞌn anjel:
—Aju Xewbaj Xjan tzul tucꞌila,
ex cyjel tena tjakꞌ tipumal Dios Maꞌxix Toclen;
cyjaꞌtzun aju neꞌ tzul itzꞌj oꞌcx cꞌajbel te Dios,
ex cꞌoquel tbi Tcꞌwaꞌl Dios.
36 Ax icx aju ttzica Elisabet tzul itzꞌj jun tal masque ma tijin;
ex ma bant-xi kak xjaw toclen ten tal,
aju in kꞌmanjtz tiꞌj ka miban alin.
37 Porque mintiꞌ jun tiꞌxti mlaywit bant tuꞌn Dios,
chi anjel baj tmaꞌn.
38 Xitzun tmaꞌn Mariy te anjel:
—Lu kine lu akine tmajen Kman;
bant-xwit wiꞌje tuꞌn Dios ic tzaꞌnx ma tmaya,
chi Mariy.
Ex eltzun tpaꞌn tib anjel tiꞌj.
Pon Mariy tja Elisabet visitaril te
39 Cyujtzun ke kꞌij lu ex Mariy ex jurat xiꞌ tuj tiwitz txꞌotxꞌ tuj jun tnam tuj txꞌotxꞌ Judey;
40 ex ocx tuj tja Zacarías,
ex xi kꞌolben Mariy te Elisabet.
41 Tej tbinte Elisabet aju kꞌolbebl te tuꞌn Mariy,
jaw yucch tal neꞌ tuj talbil,
ex o noj tuj tanmi Elisabet tuꞌn Xewbaj Xjan.
42 Ex jaw tkꞌajkꞌajel twiꞌ Elisabet cyuwxix ex tma:
—Mas ma cub cyꞌiwlaꞌna cyxol cycyakil xuꞌj,
ex ma cub cyꞌiwlaꞌn ju tala.
43 ¿Ti woclene tuꞌnju ma tzula visitaril weye,
aya ttxuꞌ Wajawe?
44 Porque oꞌcx tej xi nbiꞌne tkꞌolbebla,
ma jaw yucch tal neꞌ tuꞌn tzalajbil tuj walbile.
45 At tzalajbil teya tuꞌnju ma txi tocslaꞌna,
porque tcyakilju o tma Kman teya cjapunel,
chi Elisabet.
46 Atzunte Mariy tma:
In tnimsaꞌn wanmiye tbi Kman,
47 ex in tzalaj wanmiye tiꞌj Dios aju Clol weye.
48 Porque ma tzaj tqueꞌyin Dios mans kine,
akine tmajen;
ex texju jaꞌlo cucx oc cymaꞌ cycyakil xjal weye:
At tzalajbil teya,
che chilo.
49 Porque nimxix ma binchanjtz weye tuꞌn Dios aju at nim tipumal,
ex Xjan ju tbi.
50 Ex cucx in kꞌakꞌan tcꞌuꞌj cyiꞌj keju in che niman te.
51 Nimxix ma tbincha tuꞌnju at tipumal;
ex keju in jaw cyniman cyib,
ma cub tkꞌuchin Dios cyximbetz.
52 Ma tzꞌel tiꞌn cyoclen ke cawil at nim cyipumal,
ex ma che jaw tnimsaꞌn keju mans.
53 Keju nneꞌl cycꞌuꞌj ma tzaj tkꞌoꞌn nimcu cye,
atzun cye kꞌinun mintiꞌ chꞌin ma tzaj kꞌoꞌn cye.
54 Ma onin cyiꞌj aj Israel akeju tmajen;
mintiꞌ ma tzicꞌ tnaꞌl tuꞌn tuꞌn ttzaj kꞌakꞌan tcꞌuꞌj cyiꞌj,
55 ic tzaꞌn tzaj ttziꞌyan cye kxeꞌchel,
tzaj ttziyan te Abraham ex cye tiyjil te jumajx,
chi Mariy.
56 Axtzun cyaj ten Mariy tucꞌil Elisabet balo ox xjaw;
ex te tibajxi aj tja.
Tej titzꞌj Juan, aju in che byan xjal tuꞌn
57 Tej tpon kꞌij tuꞌn tul itzꞌj tal Elisabet,
kꞌa jun tal ul itzꞌj.
Lucas 1.57-80
58 Ke tvesin ex keju at cyxilen tucꞌil e tzalajxix junx tucꞌil tej cybinte otok tzaj kꞌakꞌan tcꞌuꞌj Dios tiꞌj.
59 Ex tuj twajxakin kꞌij e tzaj tuꞌn t-sircunsidarinjtz ju neꞌ;
ex o cyajbe tuꞌn toc cykꞌoꞌn tbi Zacarías ic tzaꞌnx tbi tman.
60 Atzunte ttxu neꞌ tma:
—Miꞌn,
Juan cꞌoquel tbi.
61 —¿Tikuꞌn Juan cꞌoquel tbi?
Baka at jun cyxol ke termaniya ic tbi ic tzaꞌn jlu,
che chi.
62 Ex xi cyyecꞌun tuꞌn cykꞌab tuꞌn t-xi cykanin te tman neꞌ alcye tbi neꞌ tuꞌn toc.
63 Tzaj tkanin Zacarías jun tal tzꞌlom ex cub ttzꞌiban twitz cyjaꞌ:
Juan cꞌoquel tbi,
chi ju cub ttzꞌiban.
Cycyakiltzun e labin tiꞌj.
64 Jurattzun bant tyolin Zacarías,
ex xi tkꞌoꞌn chjonte te Dios.
65 Cycyakiltzun ke vesin tzaj nim cyxobil tiꞌj jlu,
ex tuj tcyakil tiwitz txꞌotxꞌ tuj txꞌotxꞌ Judey e yolin xjal tiꞌj jlu.
66 Ex cycyakil keju o cybi tkanil tiꞌj jlu,
e ximan tiꞌj ex in cymaꞌn cyxolx:
¿Titzun cꞌoquel ju cꞌwaꞌl lu?
Che chi.
Porque oc cwentin ju cꞌwaꞌl tuꞌn tipumal Kman.
Xi tkꞌoꞌn Zacarías chjonte te Dios
67 Atzunte Zacarías aju tman tal neꞌ o noj tuj tanmi tuꞌn Xewbaj Xjan,
xi tchicꞌbaꞌn ju yol tzaj tmaꞌn Dios te ex tmatzun cyjaꞌ:
68 Nimanxwit tbi Kman aju Kdios aj Israel koꞌ,
porque ma tzul kucꞌil onil ke etzan koꞌ tuꞌn,
ex ma ko colpet tuꞌn.
69 Ma tzaj tkꞌoꞌn jun Clol ke nim tipumal,
atzun ma tzaj cyxol ke tiyjil David aju tmajen.
70 Ic tzaꞌnx tzaj ttziyan Dios atxix ojtxi nok tuꞌn cyyol ke t-sanjel xjan:
71 Tzaj tmaꞌn tuꞌn kclet tuꞌn tuj cykꞌab aj kꞌoj kiꞌj,
ex tuj cykꞌab keju in ko el icꞌun cyuꞌn;
72 ex tuꞌn ttzaj kꞌakꞌan tcꞌuꞌj cyiꞌj kxeꞌchel,
ex tuꞌn ttzaj tnaꞌn aju yol xjan cyaj bant tiꞌj tuꞌn Dios cyucꞌil.
73 Atzun yol jlu tzaj ttziyan Dios tuꞌnx tib te kxeꞌchel Abraham:
74 Ka tuꞌn kclet tuꞌn tuj cykꞌab aj kꞌoj kiꞌj,
tuꞌntzun kajben te Dios mintiꞌ kxobil.
75 tuꞌn koc xjan ex tzꞌaklxix twitz Dios tcyakil kꞌij te kankꞌibl.
76 Atzun teya tal ncꞌwaꞌl,
cꞌoquel tbiya t-sanjel Dios,
aju Dios Maꞌxix Toclen,
porque cbel neja twitz Kajaw binchalte tbe,
77 tuꞌn t-xi tkꞌoꞌna tkanil colbil cye ke xjal etzan ke tuꞌn Dios,
tuꞌntzun tnajset cyil.
78 Ate Kdios nim in kꞌakꞌan tcꞌuꞌj kiꞌj ex nim tcꞌujlalil,
ma tzul koptzꞌaj t-spicꞌumal kibaj ma tzaj tuj cyaꞌj,
79 tuꞌn tkꞌonjtz spicꞌun cyibaj keju ateꞌ tuj klolj ex tjakꞌ tipumal camic,
ex tuꞌn tyecꞌunte kbe tuꞌn kbet mintiꞌ kxobil,
chi Zacarías.
80 Ex aju tal cꞌwaꞌl in chꞌiytok,
ex nnoꞌcxi tnabl;
ex o ten tuj lugar mintiꞌ cynajbil xjal tuj,
maxitzun ajtz tuj lugar tuj kꞌij tej ttzyet takꞌun cyxol aj Israel.