Tej titzꞌj Jesús
2
Ex cyuj kꞌij lu etz jun orden tuꞌn president Augusto tuꞌn tjaw cyajlal cycyakil xjal.
Lucas 2.1-24
2 Atzun tnejel maj jaw cyajlal xjal tej in cawintok Sirenio tuj txꞌotxꞌ Siria.
3 E jeꞌxtzun cycyakil xjal tujx cytanmi tuꞌn ttzꞌibanjtz cybi.
4 Cyjaꞌtzun tzaj José tuj tnam Nazaret tuj txꞌotxꞌ Galiley,
jaꞌwil tuj tnam Belén aju ttanmi David,
tuj txꞌotxꞌ Judey,
porque ate José tiyjil David.
5 Ultzun José tuꞌn ttzꞌibanjtz cybi tucꞌix Mariy aju banin tiꞌj tuꞌn tmojeꞌ tucꞌil,
aju otok tzꞌoc ten tal.
6 Ex axtoktzun ateꞌ tuj Belén tej tpon kꞌij tuꞌn tul itzꞌj tal Mariy.
7 Ex ul itzꞌj ju tnejel tal,
ex ocx tbalkꞌiꞌn tuj tal tam,
ex cub tcoẍbaꞌn tuj twabl chej,
porque mintiꞌ cnet cyposad tuj mesón.
Ke anjel ex ke pastor ẍneꞌl
8 Nikayin ttxaꞌn tnam Belén ateꞌtok junjun pastor,
ax in che cyaj ten tuj cojbil te konicꞌan tuꞌn cycwentin cyẍneꞌl.
9 Ex jurat cub tyecꞌun tib jun t-anjel Kman cywitz,
ex ju t-spicꞌumal Kman cub spicꞌeꞌ cyibaj;
atzun cye pastor tzaj nim cyxobil.
10 Atzunte anjel xi tmaꞌn cye:
—Miꞌn che xobe,
porque cxel nmaꞌne baꞌn tkanil cyeye te nim tzalajbil ex cye cycyakil xjal.
11 Porque jaꞌlo ma tzꞌitzꞌj tuj ttanmi David jun Clol cyeye,
ate Crist aju Kajaw.
12 Ex atzun jun yecꞌbil cyeye tuꞌn tel cynicꞌe tiꞌj;
cnetel tal neꞌ cyuꞌne balkꞌiꞌn tuj tal tam,
ex coẍl tuj twabl chej,
chi anjel cye.
13 Ex minaben cub cyyecꞌun cyib txkantl anjel nim cyajlal tzajni ke tuj cyaꞌj,
in cynimsaꞌn tbi Dios,
ex in cymaꞌn:
14 Nimanxwit tbi Dios tuj cyaꞌj,
ex tuꞌn cyten xjal twitz txꞌotxꞌ mintiꞌtl cybis,
akeju in tzalaj Dios cyiꞌj,
che chi anjel.
15 Ex tej cyaj baj ke anjel tuj cyaꞌj,
cymatzun ke pastor cyxolx:
—Koꞌke tuj Belén queꞌyil te jlu ti ma baj aju ma tma Kman ke.
16 Jurattzun e jeꞌx,
ex cnet Mariy tucꞌix José cyuꞌn ex ju tal neꞌ coẍl tuj twabl chej.
17 Ex tej cyqueꞌyinte,
xi cytxꞌolbaꞌn aju o tma anjel cye tiꞌj tal neꞌ.
18 Ex cycyakil keju e binte cyyol pastor,
e labin tiꞌj ju o cyma.
19 Atzunte Mariy xi tcꞌuꞌn tcyakilju yol lu tuj tanmi,
ex o ximan tiꞌj.
20 Ex e ajtz meltzꞌaj ke pastor in cynimsaꞌn tbi Dios ex in cykꞌoꞌn chjonte te tiꞌj tcyakilju o cybi ex o cyil,
porque ax toc aju otok tma anjel cye.
Aju tal neꞌ Jesús pon kꞌiꞌn tuj tja Dios
21 Ex tuj twajxakin kꞌij o sircunsidarinjtz ju neꞌ,
ex oc cykꞌoꞌn tbi JESUS,
axju tbi oc ic tzaꞌnxju otok tma anjel te Mariy tej naꞌnxtok toc ten tal.
22 Tej tjapun baj kꞌij te saksabl cye ic tzaꞌnx in tmaꞌn tuj tley Moisés,
xi cyiꞌn ju tal neꞌ tuj tnam Jerusalén tuꞌn t-xi cykꞌoꞌn te Kman.
23 Xitzun cyiꞌn tuꞌn tjapun cyuꞌn aju tzꞌiban tuj tley Kman,
in tmaꞌn:
Cycyakil tnejel cycꞌwaꞌle xinak cxel cykꞌoꞌne tuꞌn tajben te Kman,
chi tuj Tuꞌjil.
24 E jeꞌxtzun tuꞌn t-xi cykꞌoꞌn jun moj tal ẍpoꞌk ex ka cabe tal paloma ic tzaꞌnx in tmaꞌn tuj tley Kman.
25 Attok jun xinak Simeón tbi ax najl tuj Jerusalén.
Ate xinak lu tzꞌaklxix ex nimal Dios ex in ayontok tiꞌj tuꞌn cycolpet aj Israel.
Aju Xewbaj Xjan attok tucꞌil,
Lucas 2.25-52
26 ex otok tzaj yecꞌun te tuꞌn Xewbaj Xjan ka mlayx cyim ka naꞌnxtok tqueꞌyinte twitz ju Crist aju attok ttzajel t-samaꞌn Kman.
27 Xitzun kꞌiꞌn Simeón tuꞌn Xewbaj Xjan,
pon tuj tja Dios.
Ex tej tul kꞌiꞌn tal neꞌ Jesús cyuꞌn tman tuj tja Dios tuꞌn tbinchanjtz tiꞌj ic tzaꞌnx in tmaꞌn ley,
28 jawtzun tchleꞌn Simeón ju neꞌ,
xi tkꞌoꞌn chjonte te Dios,
ex tma:
29 Jaꞌlotzun Nman,
baꞌn tuꞌn ncyime tuj txubtxaj,
porque ma japun ju yol tzaj tmaꞌna weye,
akine tmajena.
30 Porque ma wile tuꞌn nwitze aju colbil tuꞌna,
31 aju ma tbinchaya cywitz cycyakil xjal twitz txꞌotxꞌ.
32 Atzun jlu jun spicꞌun tuꞌn t-spicꞌbanjtz cye txkantl tnam mya aj Israel ke,
ex tuꞌn cyjaw nimsaꞌn aj Israel,
akeju etzan tuꞌna,
chi Simeón.
33 Ex in labintok tman neꞌ ex ttxu neꞌ tiꞌj tcyakilju in tmaꞌn Simeón tiꞌj neꞌ.
34 Ex e baj tcyꞌiwlaꞌn Simeón,
ex xi tmaꞌn te Mariy aju ttxuꞌ neꞌ:
—Ate cꞌwaꞌl lu kꞌoꞌmaj tuꞌn cycub tzꞌak nimcu aj Israel ex tuꞌn cyjaw weꞌ nimcu.
Cꞌoquel te jun señ,
ex mlay txi cyniman tyol,
35 tuꞌntzun tel tuj kꞌanchaꞌl tcyakil cyximbetz xjal at tuj cyanmi;
ex atzun te teya ic cꞌoquel jlu ic tzaꞌn jun spad cꞌelex tuj tanmiya,
chi Simeón.
36 Ax icx axtok taꞌ jun xuꞌj t-sanjel Dios,
Ana tbi;
ate Ana tmeꞌjel Fanuel ex tiyjil Aser.
Otok tijin te Ana,
ex cꞌwaꞌlxtok taꞌ tej tmojeꞌ ex nok wuk abkꞌi ten tucꞌil tchmil,
37 ex otok bant 84 abkꞌi tcyajlen meba xuꞌj.
Mintiꞌ nneꞌl tpaꞌn tib Ana tiꞌj tja Dios,
atzun in ajben te Kman konicꞌan ex kꞌijtl,
in cub tyoꞌn weꞌyaj ex in naꞌn Dios.
38 Ax or tej tpon Ana in tkꞌoꞌn chjonte te Dios,
ex in yolin tiꞌj neꞌ cye cycyakil keju in che ayontok tiꞌj tuꞌn cycolpet ke xjal tuj Jerusalén.
Tej cyajtz meltzꞌaj José tucꞌix Mariy tuꞌn cypon tuj Nazaret
39 Ex tbajlenxi bant tcyakil cyuꞌn ic tzaꞌnx in tmaꞌn tuj tley Kman,
e aj meltzꞌaj,
e pon tuj cytanmi Nazaret tbi,
tuj txꞌotxꞌ Galiley.
40 Ex ju neꞌ in chꞌiytok ex nnoꞌctok tipun,
ex nnoꞌctok tnabl;
ex ju t-xtalbil Dios tcubtok tibaj.
Pon Jesús tuj tja Dios tej cꞌwaꞌlxtok
41 Tcyakil abkꞌi in cheꞌxtok ke tman Jesús tuj tnam Jerusalén tuj ninkꞌij Xjan Kꞌij tbi.
42 Tej tjapun Jesús twiꞌ cablaj abkꞌi,
e jeꞌxtzun tuj Jerusalén ic tzaꞌnx cymod tuꞌn cyxiꞌ tuj ninkꞌij.
43 Tejtzun tbaj ninkꞌij e ajtz meltzꞌaj,
atzunju tal cꞌwaꞌl Jesús cyaj ten tuj Jerusalén,
mintiꞌ che bin tman tiꞌj.
44 Ximan cyuꞌn ka lepchix ttzaj Jesús cyxol xjal,
ex e bet juncu kꞌij;
e octzun ten jyolte cyxol keju at cyxilen cyucꞌil ex cyxol cyamiw;
45 ex tuꞌnju mintiꞌ cnet cyuꞌn,
e aj meltzꞌaj e pon tuj Jerusalén in che jyon tiꞌj.
46 Ex tbajlenxi ox kꞌij cnet cyuꞌn tuj tja Dios,
kꞌukltok cyxol ke xnakꞌtzal tiꞌj ley,
in bintok cyiꞌj,
ex in xjelintok cye.
47 Ex cycyakil keju in che bintok tiꞌj tyol Jesús e labin tiꞌj ju tnabl ex tiꞌj ju tzakꞌwebl tuꞌn.
48 Tejtzun cylonte ke tman,
e labin tiꞌj;
xitzun tmaꞌn ttxuꞌ te:
—Wal,
¿tikuꞌn ma tbinchaya jlu kiꞌje?
Lu tmana ex kine in ko jyone tiꞌja ex nim in ko bisune.
49 Xitzun tmaꞌn Jesús cye:
—¿Tikuꞌn in che jyone wiꞌje?
¿Maj mintiꞌ baꞌn cyuꞌne ka ilxix tiꞌj tuꞌn ntene tuj tja Nmane?
50 Atzun cye mintiꞌ el cynicꞌ tiꞌj tyol Jesús aju tzaj tmaꞌn cye.