Aju Tkanil Baꞌn O Tzꞌibanjtz Tuꞌn
SAN MATEY
Cybi t-xeꞌchel Jesucrist
1
Atzun tuꞌjil jlu jatum tzꞌiban cybi ke t-xeꞌchel Jesucrist;
ate Jesucrist tiyjil David,
atzunte David tiyjil Abraham.
2 Ate Abraham tman Isaac,
atzunte Isaac tman Jacob,
atzunte Jacob tman Judá cyucꞌix ke terman Judá.
3 Atzunte Judá cyman Fares tucꞌix Zara,
tal Tamar ke jlu.
Atzunte Fares tman Esrom,
atzunte Esrom tman Aram.
4 Atzunte Aram tman Aminadab,
atzunte Aminadab tman Naasón,
atzunte Naasón tman Salmón.
5 Atzunte Salmón tman Booz,
tal Rahab jlu.
Atzunte Booz tman Obed,
tal Rut jlu.
Atzunte Obed tman Isaí.
6 Atzunte Isaí tman rey David,
atzunte rey David tman Salomón,
ate Salomón tal t-xuꞌjilben Urías.
7 Atzunte Salomón tman Roboam,
atzunte Roboam tman Abías,
atzunte Abías tman Asa.
8 Atzunte Asa tman Josafat,
atzunte Josafat tman Joram,
atzunte Joram tman Uzías.
9 Atzunte Uzías tman Jotam,
atzunte Jotam tman Acaz,
atzunte Acaz tman Ezequías.
10 Atzunte Ezequías tman Manasés,
atzunte Manasés tman Amón,
atzunte Amón tman Josías.
11 Atzunte Josías tman Jeconías cyucꞌix ke titzꞌin,
akeju e ten tuj tkꞌijlalil tej cyxi kꞌiꞌn aj Israel pres tuj Babilonia.
12 Ate Jeconías tman Salatiel.
Otok che pon kꞌiꞌn aj Israel tuj Babilonia tej titzꞌj Salatiel.
Atzunte Salatiel tman Zorobabel.
13 Ate Zorobabel tman Abiud,
atzunte Abiud tman Eliaquim,
atzunte Eliaquim tman Azor.
14 Atzunte Azor tman Zadoc,
atzunte Zadoc tman Aquim,
atzunte Aquim tman Eliud.
15 Atzunte Eliud tman Eleazar,
atzunte Eleazar tman Matán,
atzunte Matán tman Jacob.
16 Atzunte Jacob tman José tchmil Mariy,
ex ate Mariy ttxu Jesús aju Crist tbi,
aju at toclen tuꞌn Dios.
17 Cyjaꞌtzun at cyajlaj cꞌloj cyiyjil aj Israel tzaj xeꞌt tiꞌj Abraham ul tiꞌj David;
ex at cyajlaj cꞌloj cyiyjil aj Israel tzaj xeꞌt tiꞌj David ul tiꞌj tkꞌijlalil tej cyxi kꞌiꞌn aj Israel tuj Babilonia;
ex at cyajlaj cꞌloj cyiyjil aj Israel tzaj xeꞌt tiꞌj tkꞌijlalil tej cyxi kꞌiꞌn aj Israel tuj Babilonia ul baj tej titzꞌj Crist,
aju at toclen tuꞌn Dios.
Tej tul itzꞌj Jesucrist
18 Tej tul itzꞌj Jesucrist cyjaꞌtzun tten lu:
Ate Mariy ttxuꞌ Jesús otok bant tiꞌj tuꞌn tmojeꞌ tucꞌil José;
pero naꞌnxtok cyoc mojeꞌ o tnaꞌ Mariy ka otok tzꞌoc ten tal tuꞌn tipumal Xewbaj Xjan.
19 Atzunte José aju tchmil Mariy,
tej tbinte otok tzꞌoc ten tal Mariy o tajbe tuꞌn tcyaj tcolin tuj ewaj;
porque tzꞌaklxix te José,
ex mintiꞌ o tajbe tuꞌn ttzaj tchꞌixwi Mariy cywitz xjal.
20 Ex matok in ximan José tiꞌj jlu,
cub tyecꞌun tib jun t-anjel Kman twitz tuj twitzicꞌ,
ex xi tmaꞌn anjel te:
—Aya José tiyjil David,
miꞌn xoba tuꞌn toc Mariy te t-xuꞌjila,
porque tuꞌn tipumal Xewbaj Xjan ma tzꞌoc ten tal.
21 Ex tzul itzꞌj jun tal,
ex cꞌoquel tkꞌoꞌna tbi JESUS.
Atzun tbi cꞌoquel,
porque ke xjal etzan tuꞌn che cletel tuꞌn tuj cyil.
22 Tcyakil jlu o bant tuꞌntzun tjapun aju kꞌmaꞌmaj tuꞌn Kman,
aju tzaj tmaꞌn t-sanjel Dios chi cyjaꞌ:
23 At jun kꞌapoj naꞌnx tlonte xinak cꞌoquel ten tal,
ex kꞌa jun tal tzul itzꞌj,
ex Emanuel tbi cꞌoquel,
chi t-sanjel Dios.
Aju yol Emanuel atzun in tmaꞌn:
At Dios kucꞌil.