2 Chi Dios cye cyjaꞌ: Cꞌujlaꞌn keye wuꞌne, atzun cyeye in cymaꞌne: ¿Tzaꞌn tten in tmaꞌna ka cꞌujlaꞌn koꞌye tuꞌna? Che chiye. Atzunte Kman tzaj ttzakꞌweꞌn: ¿Baka mya cyerman cyib Esaú tucꞌil Jacob, ex a Jacob ncꞌujlaye, 3 atzunte Esaú el wicꞌune? Aju tiwitz txꞌotxꞌ te Esaú oc wuꞌne te tzkij txꞌotxꞌ ex xi nkꞌoꞌne ttxꞌotxꞌ tuꞌn tajben cye txcup te tjakꞌ cꞌul.

4 Ex ka che chi aj Edom: Masque ma ko naje pero che jawil kbinchaꞌne juntl maj ke ktanmiye, ka che chi, atzunte Dios aju Tajaw Tcyakil in tmaꞌn: Cjawil cybinchaꞌn juntl maj, atzun weye cbel nxitune, ex aju tnam lu cꞌoquel tbi: Tnam jatum in binchet nim mya baꞌn, ex aju nasyon cꞌoquel tbi: Nasyon tcub ttxꞌuꞌjil Dios tibaj te jumajx. 5 Ax keye che queꞌyilte ex oc cymaꞌye: Maꞌxix te Kman toclen, max ma pon baj tkanil tiꞌjxi tmojonil cytxꞌotxꞌ aj Israel.

6 Chitzun Kman aju Tajaw Tcyakil in xi tmaꞌn cye ke pal: Ke cꞌwaꞌlbaj in che niman cyman, ex ke majen in che nimante cypatrón. Katzun akine Cymane, ¿tikuꞌntzun mintiꞌ in chinx cynimane? Ex ka akine Cyajawe, ¿tikuꞌntzun mintiꞌ in che xobe nwitze? Icꞌun kine cyuꞌne ex in cymaꞌne: ¿Alcyetzun ma kbinchaye twitza tuꞌnju in tmaꞌna keye ka icꞌuna kuꞌne? Che chiye. 7 Atzun icꞌbil weye cyuꞌne jlu: In cub cykꞌoꞌne ke pan tzꞌil tibaj n-altare ex in cymaꞌne weye: ¿Alcyetzun ma kbinchaye tuꞌnju in tmaꞌna keye ka in kbinchaꞌne mya baꞌn tiꞌja? Che chiye. Oc in cub cyximane ka mintiꞌ toclen n-altare atzun in cybinchaꞌne mya baꞌn weye, 8 oc in tzaj cykꞌoꞌne ke alumaj moẍ weye ex ke cox, ex ke yab: ¿Baꞌnpe jlu? Cyxiꞌchake ex cykꞌonxe te gobernador, jacutzun cyile ka jacu tzalaj tiꞌj cyoyaje ex ka jacu che tzaj xtaline tuꞌn, chi Kman aju Tajaw Tcyakil. 9 Cykaninxe te Dios tuꞌn ttzaj tzꞌeꞌy tcꞌuꞌj kiꞌj. Pero ¿ti tten tuꞌn ttzalaj Dios cyiꞌje ka cucx ma txi cykꞌoꞌne cyoyaje mya baꞌn? 10 Chitzun Kman aju Tajaw Tcyakil: Nokwit at jun cyeye xi lamolte ttzi njaye tuꞌntzun miꞌn tcub cꞌopit kꞌakꞌ nokx gan tibaj n-altare, porque mintiꞌ in chin tzalaje cyiꞌje ex mlay ncꞌamtle cyoyaje. 11 Cycyakil nasyon twitz txꞌotxꞌ che nimal weye, ex tuj tcyakil part cbel cypatun storac te nimbil weye, ex tbanilxix cyoyaj ctzajel cykꞌoꞌn weye. 12 Atzun cyeye nnoꞌc cykꞌoꞌne n-altare te mintiꞌ tajben oc in cymaꞌne ka tzꞌil ex ka mintiꞌ tajben aju oyaj in cub kꞌot tibaj. 13 Ax icx in cymaꞌne cyjaꞌ: Ma ko sicte tiꞌj tcyakil jlu, che chiye. Atzun in chin el cyicꞌune, chi Kman aju Tajaw Tcyakil. In che tzaj cyiꞌne ke alumaj elkꞌaꞌn in che tzaj cyuꞌne ex ke cox ex ke yab. ¿Ocpe che cꞌmetel ke cyoyaje lu wuꞌne? Mlay, chi Kman. 14 Tzajxwit tcastiw ju xjal in nicꞌan yol tuꞌnju otok tzaj ttziyan tuꞌn ttzaj tkꞌoꞌn weye jun alumaj tbanilxix cyxol ke talun, ex te tibajxi in tzaj tkꞌoꞌn aju alumaj at ttzacaj. Akine rey maꞌ woclene ex in che xob ke nasyon nwitze. Atzun yol jlu in tmaꞌn Kman, aju Tajaw Tcyakil.