2
Atzun jaꞌlo akeye pal, chi Kman in tmaꞌn cyeye cyjaꞌ: 2 Ka mintiꞌ ma chinx cynimane ex ka mintiꞌ ma jaw cynimsaꞌne nbiye axix toc cyuꞌne, ctzajel nsamaꞌne mya baꞌn cyibaje te t-xel ju cyꞌiwbil o txi nkꞌoꞌne cyeye nej, ex ya ma tzaj mya baꞌn cyibaje wuꞌne porque mintiꞌ in jaw cynimsaꞌne nbiye. 3 Chin kꞌojile cyiꞌj cyiyjile ex cꞌoquel nxoꞌne cytxaꞌ alumaj tibaj cywitze, akeju in che cub cybyoꞌne te cyoyaje weye, ex junx che elex nxoꞌne tiꞌjxi tucꞌil cytxaꞌ alumaj. 4 Atzun cꞌelel cynicꞌe tiꞌj ka akine in chin kꞌmante ju yol lu, tuꞌntzun cucx tuꞌn tten tipun ju yol cyaj bant tiꞌj wuꞌne cyucꞌil ke tiyjil Leví, chi Kman aju Tajaw Tcyakil.5 Aju nyole cyaj bant tiꞌj cyucꞌil aj Leví, atzun jlu: Tuꞌn tten cychwinklal ex tuꞌn cyten tuj tzalajbil. Xi nkꞌoꞌne ke jlu tuꞌntzun tbant cyxob nwitze ex tuꞌn cyniman weye; e niman weye ex e xob nwitze. 6 Xi cykꞌoꞌn aj Leví xnakꞌtzbil axix toc, ex misicyer jun yol mya baꞌn etz tuj cytziꞌ. E bet mojl cyyol wucꞌile ex e bet tzꞌaklxix nwitze, ex nimcu xjal cyaj cycolin cybinchben mya baꞌn nok cyuꞌn. 7 Atzun cyakꞌun pal, tuꞌn t-xi cykꞌoꞌn xnakꞌtzbil cye xjal tuꞌn tel cynicꞌ wiꞌje; ex cycyakil xjal baꞌn tuꞌn cyul cꞌmol xnakꞌtzbil cyucꞌil, porque nsanjele ke jlu, akine Cymane aju Tajaw Tcyakil.
8 Pero akeye pal ma tzꞌel cypaꞌn cyibe tiꞌj be tbanilxix; nimcu ma che cub tzꞌak tuꞌn cyxnakꞌtzbile mya baꞌn ex ma baj cytzacsine nyole aju cyaj bant tiꞌj wuꞌne cyucꞌil aj Leví. 9 Cyjaꞌtzun oc nbinchaꞌye tuꞌn cyel icꞌune cyuꞌn cycyakil xjal ex tuꞌn cyoc kꞌoꞌne te mintiꞌ cyajbene tuꞌnju mintiꞌ in che bete tuj nbeye, ex oc t-xi cymaꞌne nleye cye xjal nnoꞌc cyqueꞌyine aju cyxilen, chi Kman aju Tajaw Tcyakil.
Miꞌn cyaj cycoline cyxuꞌjile, chi Dios
10 ¿Baka mya junx Kman kcyakil? ¿Baka mya a Dios o binchante ke kcyakil? ¿Tikuꞌn in baj ksbun kib kxolx ex in nnoꞌc kkꞌoꞌn te mintiꞌ tajben aju yol cyaj bant tiꞌj tuꞌn Dios cyucꞌil kxeꞌchel? 11 Mintiꞌ ma japun cyuꞌn aj Judá aju yol xi cytziyan te Dios tuꞌn cyajben te, ex tuj Jerusalén ex cyxol aj Israel in cybinchaꞌn aju mas plojxix. Aju tja Dios cꞌujlaꞌnxix tuꞌn ma tzꞌoc cykꞌoꞌn aj Judá te mintiꞌ tajben, ex ke xinak aj Judá ma che jaw mojeꞌ cyucꞌil ke xuꞌj in che cꞌulun cye junxitl dios, akeju mya dios ke. 12 Ke xjal lu cyucꞌix ke cyiyjil che najxwit tuꞌn Kman, tuꞌntzun mya cucx tuꞌn cyten kxol akeju in cybinchaꞌn mya baꞌn, nok alcyex ke ex masque tzaj cyiꞌn cyoyaj te Kman, aju Tajaw Tcyakil.
13 Mya nok oꞌcx jlu, ax icx at juntl mya baꞌn in cybinchaꞌne. In cub taꞌl cywitze tibaj t-altar Kman ex in che okꞌe tucꞌil tkꞌajkꞌajel cywiꞌye cyuw, tuꞌnju mintiꞌ in xi tcꞌmoꞌn Kman cyoyaje tucꞌil tzalajbil. 14 Ex cucx in cymaꞌne: ¿Tikuꞌn mintiꞌ in xi cꞌmoꞌn koyaje? Che chiye. Porque ax te Kman testiw cyiꞌje tuꞌnju mintiꞌ ma japun cyuꞌne aju yol xi cytziyane te cyxuꞌjile, akeju e mojeꞌye cyucꞌil tej cuꞌxunx keye. Akeju xuꞌj lu atzun cymoje, ex xi cytziyane cye tuꞌn cycꞌujlanteye ex tuꞌn cymojeꞌye cyucꞌil te jumajx. 15 ¿Myapetzun ax Dios aju binchante t-ximlal xjal ex t-xew, tzaꞌnx ke xinak ax icx ke xuꞌj, tuꞌntzun cyoc te junx? ¿Alcyetzun taj Dios? Atzun taj Dios, tuꞌn cyajben ke cyiyjile te. Cyjaꞌtzun, cycwentin oc cyibe ex japunx cyuꞌne aju yol xi cytziyane te cyxuꞌjile tej kꞌapojxtok ke. 16 Ate Kman aju Dios cye aj Israel chi in tmaꞌn: Cykꞌoꞌnque cwent cyiꞌje ex miꞌn cub cyximane tuꞌn tcyaj cycoline cyxuꞌjile; porque icꞌun wuꞌne aju xjal in cub tpaꞌn tib tucꞌil t-xuꞌjil ex nneꞌl ticꞌun, chi Kman aju Tajaw Tcyakil.
Aju tkꞌijlalil jwisi
17 Ya ma sict Kman tuꞌn tbinte cyyole, ex atzun cyeye in cymaꞌne: ¿Alcyetzun kyole in xi kmaꞌne te tuꞌnju ma sict tuꞌn tbinte kyole? Che chiye. Ma sict Kman tuꞌnju in cymaꞌne ka baꞌn tuj twitz akeju in cybinchaꞌn mya baꞌn ex in tzalaj cyiꞌj, ex in cymaꞌntle: ¿Jatumtzun taꞌ ka tzꞌaklxixte Dios? Che chiye.