3
Chi Kman aju Tajaw Tcyakil: Cxel nsamaꞌne nsanjele tuꞌn tcub nej nwitze binchalte be. Aju Cyajawe in che ayone tiꞌj nok minaben cpol tuj tja, aju tja Dios. Chꞌix tpon sanjel aju cyaj bant tiꞌj jun yol tuꞌn cyucꞌile ex aju cyaje tuꞌn tpon, chi Kman.2 Pero ¿alcye jun jacu tzicꞌx tuꞌn tuj kꞌij oc tul? ¿Alcye jun jacu ten tipun tuꞌn tcub weꞌ twitz oc tul? Porque tzul mer ic tzaꞌn jun kꞌakꞌ tuꞌn tbaj tzꞌeꞌy tcyakil kbinchben mya baꞌn tuꞌn, ex mer ic tzaꞌn jun jabón tuꞌn tel txꞌjet tzꞌil kiꞌj. 3 Cbel keꞌ tuꞌn cybaj sakset ke pal tiyjil Leví tuj cybinchben mya baꞌn, ic tzaꞌn jun xjal nnoꞌcx tkꞌoꞌn sak pwak ex kꞌan pwak tuj kꞌakꞌ tuꞌn tcyaj sakix. Te tibajxitzun jlu, cxel cykꞌoꞌn pal cyoyaj tuj tumelxix te Kman. 4 Entons cjawil tzalaj Kman tiꞌj cyoyaj aj Judá ex tiꞌj cyoyaj aj Jerusalén, ic tzaꞌn tej tjaw tzalaj tiꞌj ojtxi.
5 Chi Kman aju Tajaw Tcyakil: Chin ule tuꞌn tcub cycastiwoye wuꞌne. Tujx kꞌij lu ax kine chin oquel te testiw cyiꞌj keju baꞌn mañ cyuꞌn, keju in cybinchaꞌn aj pajil, keju nok tten in xi cytziyan jun cyyol, keju mya cabal in xi cychjoꞌn twi cycꞌuꞌj ke majen, keju in che yajlan cyiꞌj ke meba xuꞌj ex cyiꞌj ke cꞌwaꞌl mintiꞌ cyman ex cytxuꞌ, ex keju in cybinchaꞌn mya baꞌn cyiꞌj stranjer xjal, ex mintiꞌ in che niman weye.
Aju tlajiꞌn ex ke mastl oyaj
6 Akine Dios mintiꞌ in chin chꞌexpaje, cyjaꞌtzun mintiꞌ ma che naje, akeye tiyjil Jacob. 7 Ma tzꞌel cypaꞌn cyibe tiꞌj nleye ic tzaꞌn el cypaꞌn cyib ke cyxeꞌchele, ex mintiꞌ in xi cynimane. Akine Dios aju Tajaw Tcyakil in xi nmaꞌne cyeye: Cyajtz meltzꞌaje wucꞌile ex jacutzun chin aj meltzꞌaje cyucꞌile. Atzun cyeye in cymaꞌne: ¿Tikuꞌn il tiꞌj tuꞌn kaj meltzꞌaje tucꞌila? 8 In xi nkanine cyeye: ¿Jacupelo bant tuꞌn ncub elkꞌaꞌne tuꞌn jun xjal, akine Dios? Atzun cyeye ma txi cyelkꞌaꞌne aju at woclene tiꞌj. Ex cucx ttzaj cykanine: ¿Titzun ma kelkꞌaye teya? Che chiye. Aju ma tzꞌel cyelkꞌaꞌne, atzun aju tlajiꞌn ex mastl oyaj weye. 9 Ax toc akeye aj Israel, cycyakile ma txi cyelkꞌaꞌne aju at woclene tiꞌj; tuꞌn tlaj jlu ctzajel mya baꞌn cyibaje wuꞌne. 10 Cyintze tcyakil tlajiꞌn tuj cꞌubl te, tuꞌntzun miꞌn tcub naj wabj tuj njaye. Chin cykꞌoꞌnque tuj malbil tiꞌj jlu, ka ma tzaj cyiꞌne tlajiꞌn, che elel njakoꞌne ke tventanil cyaꞌj tuꞌn t-xi nkꞌoꞌne nimxix nxtalbile cyeye. 11 Mlay txi nkꞌoꞌne ambil cye ke ẍplon tuꞌn tbaj cywaꞌn cyawale ex mlay tzaj tzꞌak twitz cy-uvaye ka naꞌnxtok tul tkꞌij. 12 Cycyakil mastl nasyon oc cymaꞌ cyjaꞌ: At tzalajbil cyeye tuꞌnju tbanilxix cytxꞌotxꞌe, che chilo. Akine Dios aju Tajaw Tcyakil in chin kꞌmante jlu.
Aju tkꞌakꞌbil tcꞌuꞌj Dios cyiꞌj ke xjal etzan tuꞌn
13 Chi Kman in tmaꞌn: Cyuw o che yoline wiꞌje, ex in tzaj cykanine weye: ¿Alcyetzun yol mya baꞌn o txi kmaꞌne tiꞌja? Che chiye. 14 O cymaye cyjaꞌ: Nokx gan tuꞌn kajben te Dios ex ¿alcyetzun baꞌn jacu kcamba ka ma txi kniman tley, ex ti tajben ke tuꞌn kbet tuj bis twitz Kman aju Tajaw Tcyakil? 15 In kile at tzalajbil cye ke xjal in jaw cyniman cyib, ke binchal mya baꞌn puro baꞌn nneꞌla tcyakil cye, ex mintiꞌ castiw in tzaj cyiꞌj keju nnoꞌc cykꞌoꞌn Dios tuj malbil, che chiye.
16 Ke xjal nimal Dios e yolin cyxolx ex e cub biꞌn tuꞌn Kman. Twitz Kman o tzꞌibet jun libro jatum in che tzaj naꞌn ke xjal baꞌn che niman te Kman ex in che ximan tiꞌj. 17 Tuj tkꞌijlalil oc tbant jlu wuꞌne, che oquel te jun tnam etzan wuꞌne, ex ctzajel kꞌakꞌan ncꞌuꞌje cyiꞌj ic tzaꞌn jun mambaj in tzaj tzꞌeꞌy tcꞌuꞌj tiꞌj tcꞌwaꞌl in ajben te, chi Kman aju Tajaw Tcyakil. 18 Atzun cꞌelel cynicꞌe tiꞌj ka mya junx taꞌ ju xjal baꞌn tucꞌil ju xjal mya baꞌn, ex mya junx taꞌ ju xjal in cꞌulun te Dios tucꞌil ju xjal mintiꞌ in cꞌulun te.