2 Akine Dios aju Tajaw Tcyakil tzaj nimxix nkꞌoje cyiꞌj ktzan cyxeꞌchele. 3 Cyjaꞌtzun, txiꞌya te nxele ex kꞌmanxa jlu cye xjal: Cyajtz meltzꞌaje wucꞌile ex jacu chin aj meltzꞌaje cyucꞌile, chi Dios, chicuya cye. Akine Dios in chin kꞌmante jlu. 4 Miꞌn cybinchaye ic tzaꞌn cybincha ktzan cyxeꞌchele, akeju o kꞌmanjtz cye cyuꞌn ke nsanjele ojtxi tuꞌn tcyaj cycolin be mya baꞌn ex cybinchben mya baꞌn, atzun cye mintiꞌ o cyajbe tuꞌn t-xi cybiꞌn nyole ex tuꞌn t-xi cyniman kine. Akine Dios in chin kꞌmante jlu. 5 Atzun jaꞌlo ¿jatumtzun ateꞌ ktzan cyxeꞌchele? ¿Cucxpetzun che ankꞌil ke nsanjele? 6 O che japun ke nyole ex ke nleye xi nmaꞌne cye nsanjele cyiꞌj ktzan cyxeꞌchele; cyjaꞌtzun e ajtz meltzꞌaj wucꞌile ex cyma cyjaꞌ: Ate Kman aju Tajaw Tcyakil ma tbincha kiꞌj ic tzaꞌnx cub t-ximan, tuꞌn tcub tkꞌoꞌn kcastiw ic tzaꞌnx kbinchben, che chi.

7 Akine Zacarías t-sanjel Dios, tcyꞌajal Berequías ex tal tchman Ido, o ncꞌame tkanil lu te Kman tuj 24 tajlal tjunlajin xjaw, aju xjaw toc tbi Sebat, tuj tcabin abkꞌi ttzyetlen tcawin rey Darío. 8 At jun konicꞌan at jun tzaj yecꞌun weye mer ic tzaꞌn tuj witzicꞌ: O wile jun xjal tjax tibaj jun chej cyak queꞌyin. Waꞌl tcub tuj jun chkꞌajlaj cyxol txkan tzeꞌ kꞌatxab ex tiꞌjxi attok juntl cꞌloj chej, at junjun cyak che queꞌyin, junjuntl sib cyiꞌj ex junjuntl sak che queꞌyin. 9 Atzun weye xi nkanine cyjaꞌ: Tat, ¿alcyetzun ke xjal lu cyjax cyibaj chej? Nchiye. Atzunte anjel aju in yolin wucꞌile tzaj ttzakꞌweꞌn: Cxel nyecꞌune teya alcye ke. 10 Atzunte xinak aju waꞌltok cyxol tkan kꞌatxab tma cyjaꞌ: Atzun ke jlu ma cheꞌx t-samaꞌn Kman tuꞌn cyxiꞌ betel tuj tcyakil twitz txꞌotxꞌ, chi anjel.

11 Atzun cye xjal cyjax cyibaj chej xi cymaꞌn te t-anjel Kman, aju waꞌltok cyxol tkan kꞌatxab, che chi cyjaꞌ: Ma kox aje betel tuj tcyakil twitz txꞌotxꞌ ex ma kile ke xjal ateꞌ tuj tzalajbil ex tuj txubtxaj. 12 Atzunte t-anjel Kman tma: Nman, aya Tajaw Tcyakil, ma bant-xi 70 abkꞌi in kꞌojina cyiꞌj aj Jerusalén ex cyiꞌj ke tnam ateꞌ tuj Judá. ¿Jtojtzun ban ttzaj kꞌakꞌan tcꞌuꞌja cyiꞌj juntl maj?

13 Atzunte Kman tzaj tmaꞌn yol baꞌn ex te kꞌukbabl cꞌuꞌjbaj teju anjel aju in yolintok wucꞌile, 14 ex tzaj tmaꞌn anjel weye tuꞌn t-xi nmaꞌne jlu: Atzun jlu in tmaꞌn Kman aju Tajaw Tcyakil: Tuꞌn tcyakil wanmiye in ncꞌujlaꞌne aju tnam Jerusalén ex aju witz Sión. 15 Cyjaꞌtzun ma tzaj nimxix nkꞌoje cyiꞌj ke nasyon lu ateꞌ tuj txubtxaj jaꞌlo. Weye nok chꞌin nkꞌoje tzaj cyiꞌj ke xjal etzan wuꞌne, atzun cye nasyon lu e icꞌ tibaj aju castiw xi nmaꞌne cye tuꞌn cybinchante. 16 Cyjaꞌtzun in xi nmaꞌne jlu: Ma chin ul meltzꞌaje tuj Jerusalén tucꞌil tkꞌakꞌbil ncꞌuꞌje ex cjawil binchet juntl maj njaye, ax icx ju tnam.

17 Ax icx tzaj tmaꞌntl anjel weye: Ax icx kꞌmanxa jlu: Ate Kman aju Tajaw Tcyakil chi in tmaꞌn cyjaꞌ: Cchmetel juntl maj nimxix kꞌinumabl cyuj ke tnam etzan wuꞌne; cxel nkꞌukbaꞌne juntl maj cycꞌuꞌj aj Sión ex cjawil nscꞌoꞌne juntl maj aju tnam Jerusalén.

18 At juntl tzaj tyecꞌun Kman weye mer ic tzaꞌn tuj witzicꞌ, o wile cyaje cach. 19 Xi nkanine te anjel aju in yolintok wucꞌile, ¿Ti cyxilen ke cach lu? nchiye. Atzun te tzaj ttzakꞌweꞌn: Ke cach lu, atzun in tmaꞌn cyiꞌj ke nasyon e baj sputun cye ke xjal najlke tuj Judá, tuj Israel ex tuj Jerusalén, chi anjel.

20 Te tibajxi tzaj tyecꞌun Kman weye cyaje txꞌinol cꞌuxbil. 21 Atzun weye xi nkanine: ¿Tikuꞌn ma che ul ke txꞌinol cꞌuxbil lu? Nchiye. Atzunte anjel tzaj ttzakꞌweꞌn: Ke cyaje cach, atzun ke e baj cysputunte ke xjal najlke tuj Judá ex mi aꞌl jun ten tipun tuꞌn tkꞌojin cyucꞌil. Atzun ke txꞌinol cꞌuxbil lu ma che ul xobtzal cye ex tuꞌn tel cyiꞌn cyipumal ke nasyon e baj sputunte cye ke xjal najl tuj Judá, chi anjel.