Tuj tcabin abkꞌi ttzyetlen tcawin rey Darío, tuj tnejel kꞌij te tkakin xjaw, tzaj yolin Kman te Hageo aju t-sanjel, tuꞌn t-xi tmaꞌn te Zorobabel aju tcyꞌajal Salatiel ex gobernador te Judá, ex te Josué aju tcyꞌajal Josadac ex nejenel cye ke pal: 2 Atzun jlu in tmaꞌn Kman aju at tipumal tuꞌn tbant tcyakil tuꞌn: Ke xjal lu in cymaꞌn ka naꞌnx tpon tkꞌijlalil tuꞌn tjaw binchet njaye juntl maj. 3 Tzajtzun yolin Kman te Hageo aju t-sanjel, tuꞌn t-xi tmaꞌn cye xjal cyjaꞌ: 4 ¿Oꞌcxpetzun cyeye ma pon tkꞌijlalil tuꞌn cynajane cyuj ke ja tbanilxix, ex atzun weye nja o cub xitj mintiꞌ in jaw cybinchaꞌne? 5 Akine Cymane Tajaw Tcyakil in xi nmaꞌne jlu cyeye: Che ximane tiꞌj aju in baj cyiꞌje. 6 Nim in cuꞌx cyawaꞌne, pero nicꞌxi in jaw cychmoꞌne; in che waꞌne, pero mintiꞌ in noj cycꞌuꞌje, in che cꞌane, pero mintiꞌ in weꞌ txketleꞌn cyiꞌje; nnoꞌc cykꞌoꞌne cyẍjoꞌwe, pero mintiꞌ in che mekꞌte tuꞌn, ex aju twi cycꞌuꞌj xjal in cycꞌmoꞌn, in cuꞌx cykꞌoꞌn mer ic tzaꞌn tuj jun sac at toyꞌ. 7 Akine Cymane Tajaw Tcyakil in xi nmaꞌne jlu cyeye: Che ximane tiꞌj aju in baj cyiꞌje. 8 Cyxiꞌye cywiꞌ ke witz, cyiꞌntze ke tzeꞌ ex cybinchaꞌn jawe njaye juntl maj, tuꞌntzun ntzalaje tuj ja lu ex tuꞌn tten wajwalile tuj. 9 Ximan cyuꞌne tuꞌn tjaw cychmoꞌne nim twitz cyawale, pero nok chꞌin in chmet cyuꞌne; ex aju in xi cycꞌuꞌne tuj cyjaye nok tajx in cub naj wuꞌne. ¿Tikuꞌntzun jlu? Chi Dios aju Tajaw Tcyakil. Tuꞌnju mintiꞌ in jaw cybinchaꞌne njaye o cub xitj, nok oꞌcx in che ximane tiꞌj tuꞌn tjaw cybinchaꞌne cyeye cyja, 10 cyjaꞌtzun mintiꞌ in tzaj jbal cyibaje, ex aju txꞌotxꞌ mintiꞌ in tzaj tkꞌoꞌn tawal. 11 Wuꞌne ma tzaj coresma cyibaj ke cojbil ex cyibaj ke witz, tibaj triw, tibaj tkan uva ex tibaj tkan olivo, tibaj tcyakil twitz awal tuj cojbil, cyibaj xjal, cyibaj alumaj ex tibaj tcyakil cyakꞌunben xjal, chi Dios.