Aju il cybincha aj Jerusalén ex aju colpibl cye
3
Becꞌbil twitz tnam Jerusalén, aju tnam tcꞌiꞌ txi tbiꞌn, ttzꞌilsan tib tuꞌn tbinchben mya baꞌn ex in yajlan cyiꞌj mastl xjal ateꞌ tuj. 2 Mintiꞌ xi tbiꞌn tkꞌajkꞌajel twi Kman, mintiꞌ cub tuj twitz tuꞌn t-xi cawin, mintiꞌ oc keꞌ tcꞌuꞌj tiꞌj Kman ex mintiꞌ aj meltzꞌaj tucꞌil Tdios. 3 Ic cyten ke nejenel ateꞌ tuj ic tzaꞌn ke balun in che tzanun; ic cyten ke jwes ateꞌ tuj ic tzaꞌn ke xoꞌj, te konicꞌan mintiꞌ in cyaj cykꞌoꞌn tbakil cychiꞌ te juntl kꞌij. 4 Mintiꞌ tajben cyyol keju nnoꞌc cykꞌon cyib t-sanjel Dios ateꞌ cyxol, ax in che oc meltzꞌaj cyiꞌj cyucꞌil; ke pal ateꞌ cyxol in baj cytzꞌilsaꞌn tja Dios ex mya tuj tumel in ajben tley Kman cyuꞌn. 5 Ax taꞌ Kman tuj tnam; tzꞌaklxixte ex mintiꞌ in tbinchaꞌn mya baꞌn. Teyle te junjun prim in xi tbinchaꞌn cyiꞌj xjal ex mlay tzꞌel tiꞌj. Atzun ke xjal mya baꞌn mintiꞌ in tzaj cychꞌixwi tiꞌj cybinchben.6 Chi Kman in tmaꞌn: O che cub nxitune ke nasyon, o che cub nxitune ke ja maꞌ cywaꞌl te cycolbil cyib, ke cay ateꞌ cyuj o che oc wuꞌne ic tzaꞌn jun lugar mintiꞌ xjal tuj, mi jun xjal in bet cyuj. Ma che baj xitj ke cytanmi, mintiꞌ jun xjal najl cyuj. 7 Cub nximane cyjaꞌ: Kape jacu che xob aj Jerusalén nwitze, ex kape jacu cub tuj cywitz tuꞌn cyxi ncawine tuꞌntzun miꞌn tcub nxitune aju tnam jatum najlke, ic tzaꞌn cycastiw ma cub nkꞌoꞌne. Atzun cye oc tilil cyuꞌn tuꞌn cybinchante tcyakil txcaj mya baꞌn. 8 Tuꞌntzun jlu, che ayone wiꞌje tuj kꞌij oc cyoque tuj xjel wuꞌne. Akine Dios in chin kꞌmante jlu: Ma cub nximane tuꞌn cyoc nchmoꞌne ke nasyon ex ke cawbil tuꞌn tcub nkꞌoꞌne cycastiw tucꞌil nimxix nkꞌoje. Tcyakil twitz txꞌotxꞌ cnajel tuꞌn nkꞌoje mer ic tzaꞌn kꞌakꞌ.
9 Tuj tkꞌijlalil tzul, wuꞌne cchꞌexpetel cyyolin ke nasyon tuꞌn cyyolin tuj tumelxix, tuꞌntzun ntzaj naꞌne cyuꞌn cycyakil xjal ex tuꞌn cyajben weye mojl cyyol. 10 Taj jlajxi ke nima tuj Etiopía, jatum cysputun cyib ke xjal etzan wuꞌne, che tzajel cubsal nwitze ex ctzajel cyiꞌn oyaj te weye. 11 Akeye xjal etzan wuꞌne, tuj tkꞌijlalil tzul mlay tzajtl cychꞌixwiye tiꞌj cybinchbene tej tjaw cyiꞌn cyibe wiꞌje, porque che elex wiꞌne cyxole keju nnoꞌc cykꞌoꞌn cyib te maꞌxix ex in jaw cyniman cyib, ex mlaytl jaw cyniman cyibe juntl maj twiꞌ ju witz xjan etzan wuꞌne. 12 Che cyjel nkꞌoꞌne cyxole ke xjal mans ex chꞌin cynabl, ex cꞌoquel keꞌ cycꞌuꞌj wiꞌje. 13 Keju che cyjel ankꞌin cyxol aj Israel mlay cybinchatl aju mya tzꞌaklxix, mlay che nicꞌan yol ex mlaytl che sbun. Che waꞌl ex che ojlal ex mi aꞌl jun cꞌoquel xobtzan cye.
Bitz te tzalajbil tiꞌj Jerusalén
14 Che bitzane akeye aj Sión. Cykꞌonx tkꞌajkꞌajel cywiꞌye te tzalajbil akeye aj Israel. Che tzalajxe akeye aj Jerusalén, che tzalajxe tuꞌn tcyakil cyanmiye.
15 Ma tzꞌel tiꞌn Kman aju sentens tcub cyibaje ex ma che ex tlajoꞌn ke aj kꞌoj cyiꞌje. Ate Kman at cyxole, aju rey cye aj Israel; mlay che xobtle twitz ju mya baꞌn.
16 Tuj tkꞌijlalil tzul cxel kꞌmet cye aj Jerusalén cyjaꞌ: Miꞌn che xobe akeye aj Sión, ex miꞌn che cub numje.
17 Ate Kman at cyxole aju Cydiose at nimxix tipumal, ex che cletele tuꞌn. Ctzalajel Kman cyiꞌje. Cbel txuleꞌ tucꞌil tcꞌujlalil, ctzalajel cyiꞌje tucꞌil bitz,
18 ic tzaꞌn tuj jun ninkꞌij.
Chi Kman in tmaꞌn:
Akine chin clolte cyeye tuj ju mya baꞌn in xobtzante cyeye, ex tuj ju chꞌixbil tcub cyibaje.
19 Tuj tkꞌijlalil tzul cbel nkꞌoꞌne cycastiw keju in che yajlante cyeye. Wuꞌne che cletel ke cox ex che tzajel nchmoꞌne keju o che el tzpet, che jawil nnimsaꞌne ex cꞌelel wiꞌne ju icꞌbil cyeye cyuꞌn xjal; ke xjal tuj tcyakil twitz txꞌotxꞌ che yolil baꞌn cyiꞌje.
20 Tuj tkꞌijlalil tzul che tzajel wiꞌne ex che oquel nchmoꞌne, che tele juntl maj wuꞌne tuj txubtxaj; wuꞌne che jawil nimsaꞌne ex cycyakil xjal twitz txꞌotxꞌ che yolil baꞌn cyiꞌje. Akine Dios ma chin kꞌmante jlu.