2
Akeye aj Judá, akeye mintiꞌ in tzaj cychꞌixwiye, cychmon oc cyibe 2 naꞌnxtok ttzaj cyiꞌje aju o bant tiꞌj, naꞌnxtok tbaj kꞌij ic tzaꞌn muꞌp in xi ikan tuꞌn cykꞌikꞌ, naꞌnxtok ttzaj ttxꞌuꞌjil Kman cyiꞌje, ex naꞌnxtok tul tkꞌijlalil tuꞌn ttzaj tkꞌoj Kman cyiꞌje. 3 Cyjyome Kman cycyakile akeye xjal mans ateꞌye twitz txꞌotxꞌ, akeye in che niman ke tmandamyent. Che bete tuj tumel ex che oque mans, mya yajcu che clete tuj ju kꞌij oc ttzaj tkꞌoj Kman.Aju castiw ctzajel cyibaj ke nasyon
4 Mintiꞌ xjal cyjel ten tuj tnam Gaza ex cbajel xitj tnam Ascalón; kꞌijl che elex lajoꞌn ke xjal najl tuj tnam Asdod ex te jumajx che elex lajoꞌn ke najl tuj tnam Ecrón.
Aju castiw ctzajel cyibaj ke nasyon
5 Ay becꞌbil cywitze akeye xjal aj Creta najlkeye ttziꞌyile mar. Akeye aj Canaán najlkeye tuj cytxꞌotxꞌ aj Filistey; ma tma Kman tuꞌn tcub cysentense, cbel xitun cytanmiye tuꞌn ex mintiꞌ jun xjal cyjel ten tuj. 6 Aju txꞌotxꞌ tcub ttzi mar cꞌoquel te cywabl alumaj, atzun che pol ke pastor, ex cꞌoquel te cypeꞌn ẍneꞌl. 7 Ke aj Judá che cyjel ankꞌin, che etzal tiꞌj txꞌotxꞌ lu oc ttzaj Kman Dios onil cyiꞌj, ex che tel baꞌn ic tzaꞌn nej. Atzun ma chixin che cwentil cyiꞌj ke cyẍneꞌl, ex che ojlal konicꞌan cyuj ke ja otok che cyaj colin tuj tnam Ascalón.
8-9 Atzun jlu in tmaꞌn Kman aju Tajaw Tcyakil, aju Cydios aj Israel: Ma nbiye aju yasbil cyuꞌn aj Moab ex aju xmaybil cyuꞌn aj Amón. Ma che yolin mya baꞌn cyiꞌj ke xjal etzan wuꞌne, ma jaw cyniman cyib ex ma che ocx lakꞌeꞌ tuj cytxꞌotxꞌ aj Judá. Cyjaꞌtzun in xi nmaꞌne jun yol wuꞌnx wibe; icx cbajel cyiꞌj aj Moab ic tzaꞌn o baj tiꞌj tnam Sodoma, ex ic cbajel cyiꞌj aj Amón ic tzaꞌn baj tiꞌj tnam Gomorra; cꞌoquel cytxꞌotxꞌ ic tzaꞌn jun cojbil oꞌcx chꞌiꞌx at tuj, cꞌoquel te tkan atzꞌan, cꞌoquel te jun lugar jumajx mintiꞌ xjal tuj. Ke xjal che cyjel ankꞌin cyxol keju etzan wuꞌne cꞌeletz cyiꞌn tcyakilju at cye ex che oquel tajwil cytxꞌotxꞌ.
10 Atzun castiw cbel cyibaj aj Moab ex aj Amón, tuꞌnju jaw cyniman cyib ex e xmayin cyiꞌj ke xjal etzan tuꞌn Kman aju Tajaw Tcyakil. 11 Ctzajel nimxix xobajil cyiꞌj tuꞌn Kman. Cbel t-xitun cycyakil cydios xjal at twitz txꞌotxꞌ; ke xjal tuj tcyakil lugar che cꞌulul twitz, ax icx ke xjal ateꞌ cyuj cycyakil nasyon. 12 Ax icx cyeye, akeye aj Etiopía, che najele tuꞌn t-spad Kman. 13 Cnajel txꞌotxꞌ Asiria tuꞌn, aju at tuj tbankꞌab kꞌij, mintiꞌ xjal cyjel tkꞌoꞌn tuj tnam Nínive ex cꞌoquel tuꞌn ic tzaꞌn tzkij txꞌotxꞌ. 14 Tujtzun che oquex ten ẍneꞌl ex tcyakil txcaj txcup te tjakꞌ cꞌul. Ke ẍin ex ke tol che tal cyibaj ke tkan ja, ckꞌajtel cywiꞌ cytziꞌ ke ventan, ex nojni cꞌoquel cytzi ja tuꞌn ttxꞌakan tiꞌxti, porque che cyjel kꞌanchaꞌlin ke tbanil tzeꞌ cyjax twi ja.
15 Atzun tnam lu jaw tnimanxix tib ex in ankꞌintok mintiꞌ tbis, ex ke xjal najltok tuj in cymaꞌntok cyjaꞌ: Oꞌcxcu akoꞌye ex mi aꞌl juntl, che chi. Pero ma cyaj ten mintiꞌ xjal tuj ex ma tzꞌoc te cyja txcup te tjakꞌ cꞌul. Ke xjal che icꞌel bet nikayin tiꞌj tnam che oquel ten xmayil tiꞌj ex cꞌelel cychitoꞌn cykꞌab.