2 Atzun jlu in tmaꞌn Kman: Te jumajx cnajel wuꞌne tcyakilju at twitz txꞌotxꞌ. 3 Che najel wuꞌne ke xjal, ke alumaj, ke cyiẍ tuj mar, cyucꞌix ke chyuꞌj ex txkantl jil in che lipan twitz cyaꞌj; cbel nkꞌoꞌne tolsabl cywitz ke binchal mya baꞌn, ex te jumajx che najel ke xjal wuꞌne twitz txꞌotxꞌ, chi Kman.

4 Cbel nkꞌoꞌne cycastiw ke aj Judá ex cycyakil keju najlke tuj Jerusalén. Che najel wuꞌne cycyakil ke tilbilal Baal ateꞌx tuj lugar lu, cyucꞌix keju in che cꞌulun cywitz ex cyucꞌix ke pal in che ajben cywitz. 5 Che najel wuꞌne ke xjal in che jax cywi ja tuꞌn cycꞌulun cywitz cheꞌw, twitz kꞌij ex twitz xjaw, ex cyucꞌix ke xjal in che cub ẍmejeꞌ tuꞌn ttzaj cytziyan jun yol weye ex tucꞌix tbi Milcom aju cydios in tzaj cynaꞌn. 6 Ax icx che najel wuꞌne ke xjal nneꞌl cypaꞌn cyib wiꞌje, cyucꞌix keju mintiꞌ in che jyon wiꞌje ex mintiꞌ in che tzaj kanilte alcye tuꞌn tbant cyuꞌn, chi Kman.

7 Che txulecuye twitz Kman Dios tuꞌnju nikaꞌ taꞌ tkꞌijlalil castiw tuꞌn. Ma bant cyten xjal tuꞌn Kman tuꞌn cycub byoꞌn, ex ma bant cyten keju ma che tzaj ttxcoꞌn byol cye.

8 Chi Kman in tmaꞌn cyjaꞌ: Tuj tkꞌijlalil castiw cbel nkꞌoꞌne cycastiw ke nejenel, cyucꞌix ke tcyꞌajal rey ex cyucꞌix cycyakil keju nneꞌl cycanoꞌn cymod xjal cye txkantl nasyon. 9 Ax icx tuj tkꞌijlalil lu cbel nkꞌoꞌne cycastiw keju in che ocx elkꞌal tuj cyja xjal, ex in noj tuj cyja cypatrón tuꞌn cyelkꞌaben ex tuꞌnju otok tzꞌel cyiꞌn cye xjal tuꞌn sbubl.

10 Tuj tkꞌijlalil lu, chi Kman, cbinjtzel oc cyjaw schꞌin xjal tuꞌn bis max ttzi tpwertil tnam, Pwert cye Cyiẍ tbi. Che tzajel schꞌin ke xjal tuj jun piẍ acꞌaj tnam ex cbinjtzel nim tkꞌajkꞌajel kotxꞌ max cywiꞌ ke tal witz. 11 Che wuꞌyine, akeye xjal najl t-xe witz tuj tnam, tuꞌnju che najel cycyakil ke comersyant, ax icx che najel cycyakil ke xjal nnuꞌl cyiꞌn sak pwak tuꞌn cylakꞌon tiꞌj cꞌaẍjel.

12 Tuj tkꞌijlalil lu cbajel nqueꞌyine tuj Jerusalén tuꞌn lámpara. Cbel nkꞌoꞌne cycastiw ke xjal akeju tuj cynabl tuj txubtxaj ateꞌ, mintiꞌ jun xobajil jacu tzaj cyiꞌj ex in cymaꞌn tuj cyanmi: Mlay tbincha Kman jun baꞌn ex mi jun mya baꞌn. 13 Cyjaꞌtzun cꞌelex kꞌiꞌn cykꞌinumabl ex che bajel xitun cyja. Cjawil cybinchaꞌn cyja, pero mlay che najan cyuj; cbelex cyawaꞌn tkan uva, pero mlay che cꞌan tiꞌj taꞌl twitz, chi Kman.

14 Nikaꞌ taꞌ tuꞌn tul canun ju nintz tkꞌijlalil jwisi tuꞌn Kman. Nikaꞌ taꞌ, lu tzul naj. Xobajilxix tkꞌajkꞌajel jwisi tuꞌn Kman; cyucꞌixpe ke xjal mas cyuw cycꞌuꞌj tuj kꞌoj che jawil schꞌin. 15 Aju kꞌij lu kꞌij te kꞌoj, te bis, te cꞌixcꞌoj, te xitbil, tuꞌn tbaj naj tcyakil, ex jun kꞌij puro klolj ex kxopinxix te nim muj ex kꞌek muj; 16 jun kꞌij tuꞌn cyoc kꞌajtzet ke chun ex tuꞌn cyjaw schꞌin ke soldad cyjaꞌ cyxiꞌ kꞌojlel cyiꞌj ke tnam toc muro cyiꞌj, ex cyiꞌj ke ja maꞌ cywaꞌl te cycolbil cyib xjal.

17 Chi Kman in tmaꞌn cyjaꞌ: Che oquel nkꞌoꞌne ke xjal tuj yajbil. Che betel ic tzaꞌn moẍ, tuꞌnju o che binchan il nwitze. Cbajel kojl cychcꞌel, cꞌoquel ic tzaꞌn kuk mintiꞌ tajben, ex cꞌelex xoꞌn cyximlal cyimni ic tzaꞌn cytxaꞌ alumaj.

18 Tuj kꞌij oc ttzaj tkꞌoj Kman mlay che clet ke xjal tuꞌn sak pwak mi tuꞌn kꞌan pwak at cyucꞌil, tuꞌnju ic tten tkꞌoj Kman ic tzaꞌn kꞌakꞌ, ctzꞌeꞌyil tcyakil twitz txꞌotxꞌ tuꞌn. Cycyakil ke xjal najlke twitz txꞌotxꞌ che najel te jurat naj.