Tnaꞌj Dios Habacuc
3
A jlu jun tnaꞌj Dios Habacuc aju t-sanjel Dios:2 Nman, o nbiye tkanil tiꞌja, ex o tzaj nxobile tuꞌn. Nman, ax icx binchama tuj tkꞌijlalil jaꞌlo ke nmak tbinchbena o che bant ojtxi, tuꞌntzun icx keye tuꞌn tel knicꞌe tiꞌj. Masque at tkꞌoja kiꞌje, pero kꞌakꞌantz tcꞌuꞌja kiꞌje.
3 Atzun ctzajel Dios tuj txꞌotxꞌ Temán; ex aju Dios xjan ctzajel twi witz Parán. Ma baj noj twitz cyaꞌj tuꞌn tajwalil, ex nim ma jaw nimsaꞌn tbi cyuꞌn xjal tuj tcyakil twitz txꞌotxꞌ.
4 In koptzꞌaj t-spicꞌumal ic tzaꞌn tkan kꞌij ex in che etz ke tkan spicꞌun tuj tkꞌab; atzun ewan tipumal tuꞌn.
5 Nejni txꞌuꞌj yabil twitz, ex lepchix ttzaj yabil nintz cyak, aju in baj naj nimcu xjal tuꞌn.
6 Biꞌx in tzaj luꞌlun txꞌotxꞌ oc tcub weꞌ; ex biꞌx in che tzaj luꞌlun ke nasyon oc in xi tqueꞌyin cyiꞌj. Biꞌx in che baj kotxꞌin ke ojtxi witz, ex biꞌx in che cub xitj. Mintiꞌ bajsbil te tipumal Dios.
7 O che wile ke xjal aj Cusán ateꞌ tuj jun nintz yajbil, ex ke aj Madián nim cyxobil ma tzaj.
8 ¿Maj ma tzaj tkꞌoja cyiꞌj ke nima, Nman? ¿Maj ma tzaj tkꞌoja tiꞌj mar? ¿Maj noktzun tuꞌn jlu in jaxa tuj tcarwaja jawoꞌn cyuꞌn tcheja, tuꞌn tcub tiꞌj nimcu tuꞌna?
9 Ma bant tten aju xobl plech tuꞌna, ex banin cyten nimcu tplecha. Cyuꞌn ke nima ma baj julix txꞌotxꞌ tuꞌna.
10 Biꞌx in che tzaj luꞌlun ke witz oc tqueꞌyinjtza cyuꞌn; ex in tzaj tilj nim jbal twitz cyaꞌj. In jaw jululun aju mar maꞌ t-xeꞌ oc tjaw pulin nimxix wen.
11 Aju kꞌij ex xjaw mintiꞌtl e bet, ax e weꞌ tuꞌn tlaj cyspicꞌumal ke tplecha ex tuꞌnju spicꞌun nneꞌl koptzꞌaj tiꞌj tlansa.
12 In baj tbetina twitz txꞌotxꞌ tuꞌn tkꞌoja; in che baj twabana ke nasyon tuꞌn ttxꞌuꞌjila.
13 Ma tzꞌetza colol cyiꞌj ke xjal etzan tuꞌna ex tiꞌj ju rey jaw t-scꞌoꞌna. Ma baj t-xituna twi tja aju xjal binchal mya baꞌn ex biꞌx ma cyaj kꞌanchaꞌlin t-simyentil tuꞌna.
14 Cub tbyoꞌna ju nejenel cye tuꞌnx tlans, tej cytzaj kꞌojlel kiꞌje tucꞌil nim cyipun; ic tzaꞌn cykꞌikꞌ tuꞌn kbaj sputje cyuꞌn. In che tzalajtok tuꞌn tcub kiꞌje cyuꞌn tuj ewaj ic tzaꞌn ke xjal mintiꞌ cycolbil cyib.
15 In baj tbetina tibaj mar cyuꞌn ke tcheja, ex tibaj aꞌ maꞌ twitz in baj t-xtulkꞌin tib.
16 Tej nbinteye tcyakil jlu, biꞌx tzaj luꞌlun ncꞌuꞌje, biꞌx e tzaj luꞌlun ke ttxoꞌw ntziꞌye, biꞌx el bakꞌch tcyakil nximlale ex tcyakil nximlale biꞌx tzaj luꞌlun. Masque icju, pero chin bel txuleꞌye ayolte aju kꞌij oc ttzaj tkꞌoꞌn Dios yajbil cyibaj ke soldad in che yajlan kiꞌj.
17-18 Masque mintiꞌ ma tzaj tkꞌoꞌn t-xmacal tkan higo, ex mintiꞌ ma tzaj tkꞌoꞌn twitz tkan uva ex aju tkan olivo; masque mintiꞌ ma tzaj cykꞌoꞌn twitz awal tuj cojbil, ex masque che cub baj cycyakil ke ẍneꞌl, ex mi juntl wacẍ cyaj ten tuj peꞌn, tuꞌn tcyakil jlu chin tzalajele tiꞌj Kman Dios aju clol weye.
19 Porque in tzaj tkꞌoꞌn Kman Dios wipumale, ex jurat in che bet ke nkane tuꞌn ic tzaꞌn che bet ke masat, ex in chinx tiꞌn tuj lugar maꞌ tjaw jatum tuꞌn nclete.