NAHUM
Aju tkꞌoj Dios tiꞌj tnam Nínive
1
Atzun tkanil lu tzaj tmaꞌn Dios te Nahum aju aj Elcos. Aju tkanil lu tiꞌj tnam Nínive. 2 Tocxix twitz Kman tiꞌj tcyakil ex nnaꞌj tkꞌoꞌn t-xel mya baꞌn. Nnaꞌj tkꞌoꞌn t-xel mya baꞌn cye keju in jaw cyiꞌn cyib tiꞌj ex at-xix tkꞌoj, ex in tzaj tkꞌoj cyiꞌj ke aj kꞌoj tiꞌj. 3 Yaj in tzaj tkꞌoj Kman ex at nimxix tipumal, mlay tzicꞌx tiꞌj tuꞌn miꞌn tcub tcastiw xjal at til. In bet Kman tuj cykꞌikꞌ jbal ex xcyakinpaẍ, ex aju muj, atzun kuk in jaw cyuꞌn tkan. 4 In xi tmayoꞌn aju mar ex biꞌx in tzkij tuꞌn, ex in che tzkij cycyakil ke nima tuꞌn. Ke cojbil tuj txꞌotxꞌ Basán ex tuj Carmelo in che tzkij, ax icx in che tzkij ke bech ateꞌ tuj Líbano. 5 Ke nmak witz in che jaw luꞌlun twitz, ex ke tal witz in che cub ulj twitz. Oc tyecꞌunte tib, in tzaj luꞌlun tcyakil txꞌotxꞌ ex cyucꞌix keju najlke twitz. 6 ¿Alcye jun jacu cub weꞌ twitz oc ttzaj tkꞌoj? ¿Alcye jun jacu tzicꞌx tuꞌn aju tkꞌoj? In tzaj nim ttxꞌuꞌjil ic tzaꞌn kꞌakꞌ, ex tuꞌn in che cub pax ke pic. 7 Baꞌnte Kman; ate jun colbil tuj tkꞌijlalil xobajil, cwentin tuꞌn keju kꞌukl cycꞌuꞌj tiꞌj. 8 Atzun keju in jaw cyiꞌn cyib tiꞌj che najel tuꞌn, ic tzaꞌn in naj tcyakil tuꞌn jun nima otok chꞌiy wen, ex ke aj kꞌoj tiꞌj che xel tlajoꞌn tuj klolj. 9 ¿Tikuꞌn in che ximane tuꞌn cykꞌojine tiꞌj Kman? Che najele tuꞌn te jumajx, mya il tiꞌj tuꞌn tcub cab maj cycastiwoye tuꞌn. 10 Masque ic cyten ic tzaꞌn chꞌiꞌx t-sacun tib, ex masque chyomni cywiꞌ tuꞌn kꞌeꞌn, che bajel tzꞌeꞌy te jumajx mer ic tzaꞌn tzkij chꞌim.11 Aya tnam Nínive, tuja etz aju xjal cub ximante tuꞌn tbinchante mya baꞌn tiꞌj Kman; jun xjal kꞌol nabl jumajx mya baꞌn.
12 Tuꞌntzun jlu in tmaꞌn Kman cye ke xjal etzan tuꞌn: Masque nimxix cybaj ke aj Asiria ex nimxix cyipun, pero at jun kꞌij che bel byoꞌn ex che najel. Wuꞌne ma che cꞌixbisanjtze, pero jaꞌlo ya mlay che oc ncꞌixbisaꞌntle. 13 Cbajel npaẍuꞌne aju yuw tcub cyibaje ex che bel ntzakine ke caden toc cyiꞌje, chi Kman.
14 Atzun cyeye aj Nínive, ma tma Kman cyiꞌje cyjaꞌ: Mlay che tentl ke cyiyjile tuꞌn cucx ttzaj naꞌn cybiye; cbel nxitune tcyakil wik tilbilal ateꞌ tuj tja cydiose, ex atzun che belex nmakuꞌne ma chixin, porque jumajx mya baꞌn keye.
Tkanil tuꞌn tnaj tnam Nínive
15 Cyqueꞌyinxe cywiꞌ ke witz, lu sanjel tzul kꞌolte tkanil baꞌn te colpibl cyeye. Akeye aj Judá, cyicꞌsaꞌn cube ke ninkꞌij; japunx cyuꞌne aju o txi cytziyane te Dios. Ke xjal mya baꞌn mlay che ultl kꞌojlel cyiꞌje; ma che naj te jumajx.