Akeye aj Nínive, aju xitul cyeye lu tzul cyiꞌje. Cykꞌon cube ke xkꞌukil tuj ja te cycolbil cyibe. Cyxkꞌukin oque be. Cykꞌonc cyspadiye cycꞌuꞌje. Cykꞌoncxix cyipune wen. 2 Porque che jawil nimsaꞌn juntl maj ke tiyjil Jacob tuꞌn Kman, che jawil nimsaꞌn ke aj Israel ic tzaꞌn nej tej naꞌnxtok tel kꞌiꞌn aju at cye, ex naꞌnxtok cycyaj kꞌoꞌn ic tzaꞌn tkan uva otok tzꞌel jetzꞌj tkꞌab. 3 Cyak queꞌyin ju makbil kꞌiꞌn cyuꞌn ke xinak cyuw cycꞌuꞌj tuj kꞌoj, ex cyak queꞌyin cyxbalun ke soldad. Banin cyten tuꞌn cykꞌojin. In che txilcꞌaj cycarwaj; in meltzꞌajeꞌ cyspad. 4 In che lipan ke carwaj tucꞌil cytxꞌuꞌjil cyuj cay, in cheꞌx tuj jun pacꞌ plas ex in che aj tuj juntl pacꞌ, ic cyten ic tzaꞌn jun ttxan tzaj in cꞌant, in che bet ic tzaꞌn xleꞌlaj cyaꞌj. 5 In che tzaj ttxcoꞌn rey ke xjal at cyoclen ttxlaj, ex atzun cye in che jaw tolj oc cyxi lipan tuꞌn cypon jatum taꞌ muro ex jatum taꞌ lugar banimaj tuꞌn toc cyclon cyib tiꞌj. 6 In che jaket ke makbil nima, ex aju tja rey in cub tilj. 7 In xi kꞌiꞌn t-xuꞌjil rey pres cyucꞌix ke tmajen xuꞌj; in che okꞌ ic tzaꞌn ke paloma ex nnoꞌc cykꞌajtzaꞌn ttzi cyxuꞌc tuꞌn bis. 8 Ic tzaꞌn aꞌ nneꞌtz kojl otok pax makbil te, ictzun tten in che el ok ke xjal najlke tuj tnam Nínive. Che weꞌcuye, cyajtz meltzꞌaje juntl maj, che chi xjal in xi cymaꞌn cye, pero mi jun nnaꞌjtz meltzꞌaj. 9 Cyelkꞌanxe sak pwak. Cyelkꞌanxe kꞌan pwak. Nimxix tkꞌinumabl tnam Nínive at. Nimxix txcaj tiꞌxti wiꞌyilxix chmoꞌmaj cyuꞌn.