MIQUEAS
Cbel tcastiw tnam Samaria tuꞌn Dios
1
Atzun yol lu tzaj tmaꞌn Kman te Miqueas, aju aj Moreset, tuj tkꞌijlalil tej tcawin Jotam, tuj tkꞌijlalil tej tcawin Acaz ex tuj tkꞌijlalil tej tcawin Ezequías, rey ke tuj tnam Judá. Tzaj kꞌmaꞌn te tiꞌj tnam Samaria ex tiꞌj tnam Jerusalén.2 Cycyakile akeye tnam cybintze ju yol lu, ex akeye xjal najl tuj tcyakil twitz txꞌotxꞌ cykꞌontz cywiꞌye tiꞌj. Max ctzajel yolin Kman Dios tuj tja, aju ja xjan; cꞌoquel te testiw tiꞌj cybinchbene mya baꞌn.
3 Cyqueꞌyinxe, lu Kman cꞌeletz tuj lugar jatum najl ex ctzajel bet cywiꞌ ke witz.
4 Che bel ulj ke witz tjakꞌ tkan, ic tzaꞌn in cub ulj xcab oc tocx kꞌot tuj kꞌakꞌ, ex te cabe che elel ke chkꞌajlaj cyxe witz, mer ic tzaꞌn otok cuꞌtz txkan aꞌ tuj tmij.
5 Cbantel tcyakil jlu nok tuꞌn tlaj miban che bin ke tiyjil Jacob ex tuꞌn tlaj cyil aj Israel. ¿Jatum ateꞌ ke tiyjil Jacob miban che bin? Ateꞌ tuj tnam Samaria. ¿Jatum ateꞌ ke lugar jatum in che cꞌulun aj Judá cywitz ke tilbilal? Lu ateꞌ tuj tnam Jerusalén. 6 Cyjaꞌtzun in tmaꞌn Kman: Biꞌx cbajel xitj tnam Samaria wuꞌne tuꞌn toc te jun cojbil jatum tuꞌn tcuꞌx awet tkan uva. Ke abj otok che cub tilj tuj tnam che bajel nsputine tuj chkꞌajlaj t-xe witz, ex oꞌcx t-simyentil cyjel ten tuj kꞌanchaꞌl. 7 Cycyakil ke tilbilal at cyuꞌn che bajel buchj, ex tcyakil cyoyaj in pon cyiꞌn tuj tja cydios che bajel patit. Biꞌx che bajel naj cycyakil ke tilbilal nnoꞌc cydiosin, porque chmet tcyakil jlu cyuꞌn tiꞌj oyaj in cyaj cykꞌoꞌn xinak cye ke xuꞌj jawni cywitz cyucꞌil xinak ax ateꞌ tuj tja cydios, ex ax ke oyaj lu che ajbel te chojbil cye ke xuꞌj jawni cywitz cyucꞌil xinak tuj juntl nasyon, chi Dios.
Oc ten Miqueas okꞌel tuꞌn tbis
8 Tuꞌn jlu chin oquel tene okꞌel cyuw wen tuꞌn taꞌw nbise, miꞌn tzꞌoc nkꞌoꞌne nxajbiye oc nbete, ex miꞌn tzꞌoc nkꞌoꞌne nxbalune; chin oquel tene wuyil ic tzaꞌn in wuyin jun xoꞌj tuꞌn tbis, ex chin jawil schꞌine ic tzaꞌn in kꞌajt jun chyuꞌj avestrús. 9 Porque aju cꞌixbisabl cyiꞌj aj Samaria mintiꞌ kꞌanbil tiꞌj: aju cꞌixbisabl lu ma pon canun tuj txꞌotxꞌ Judá ex ttzi tpwertil tnam Jerusalén, aju tnam jatum najl ke nxjalile.
10 Miꞌn txi cymaꞌne jlu cye aj Gat, ex miꞌn che oc tene okꞌel. Cytolin jaw cyibe tuꞌn taꞌw cꞌixcꞌoj tuj kuk tuj tnam Bet-le-afra. 11 Akeye xjal najl tuj tnam Safir, e cyxi kꞌiꞌne pres tuj juntl lugar mintiꞌ cyxbalune tocsaꞌn tuꞌntzun tcub cychꞌixwiye. Ke xjal najl tuj tnam Zaanán mlay che etz. At okꞌel tuj lugar Bet-esel, tuꞌntzun jlu mlayx che oninjtze tuꞌn. 12 Ke xjal najl tuj tnam Marot in xi cyẍoquin cyiꞌj tuꞌn taꞌw cꞌixcꞌoj ex cyajbil tuꞌn cyten tuj txubtxaj, porque ma tzul castiw tuꞌn Kman ex ma pon canun ttzi tpwertil tnam Jerusalén. 13 Akeye xjal najl tuj tnam Laquis e oque miban che bine ic tzaꞌn ke aj Israel, ex tuꞌn cylaje e binchan il ke aj Sión, cyjaꞌtzun, cycꞌaloꞌn oque cycheje cyiꞌj ke cycarwaje tuꞌn cyel oke. 14 Akeye aj Judá, te jumajx cycolin cyaje tnam Moreset-gat; aju tnam Aczib cꞌoquel te cꞌobil cye cyrey aj Israel.
15 Chi Kman in tmaꞌn: Akeye xjal najl tuj tnam Maresa, ctzajel nsamaꞌne jun xjal tuꞌn tcub cyiꞌje tuꞌn, ex keju at mas cyoclen cyxol aj Israel, atzun che xel ok tuj toyꞌ pic Adulam tuꞌn cyclonte cyib. 16 Ex atzun cyeye aj Judá, cymatzoꞌmele tcyakil ttzmal cywiꞌye te jun techal tiꞌj cybise, tuꞌn cylaj ke cycꞌwaꞌle cꞌujlaꞌnxix cyuꞌne. Jumajx cymatzoꞌmele ttzmal cywiꞌye tuꞌntzun tcyaj ic tzaꞌn tiꞌj twiꞌ jun cꞌutz tzꞌaꞌj tiꞌj, porque ke cycꞌwaꞌle che xel kꞌiꞌn pres tuj juntl tnam najchak.