3 Pero el ok Jonás twitz Kman, tuꞌn tpon tuj tnam Tarsis. Xiꞌ ttzi mar tuj tnam Jope, ex atzun cnet jun barc tuꞌn, cyjaꞌ t-xiꞌ tuꞌn tpon tuj tnam Tarsis. Xiꞌtzun tchjoꞌn tpasaj ex jaxtzun tuj barc tuꞌn tpon ma chixin, tuj twitz ka tuꞌn tel ok twitz Kman. 4 Tzajtzun jun nintz cykꞌikꞌ cyuwxix wen tibaj mar tuꞌn Kman, ex mer ic tzaꞌn cyjaꞌtok tbaj yuchꞌj barc tuꞌn tipumal aꞌ. 5 Akeju yucul barc tzaj nimxix cyxobil, ex teyle junjun oc ten cubsal twitz tdios, ax icx ex cyxoꞌn tcyakil iktz tuj mar tuꞌntzun tel talil tikatz barc. Atzun te Jonás otok cuꞌx tal max t-xeꞌpun barc, ex mi naꞌn tuꞌn tuꞌn watl. 6 Atzunte nejenel tuj barc pon tucꞌil Jonás ex xi tmaꞌn te:

—¿Ti nbaj teya, txa watin? Weꞌctza ex cubsana twitz Tdiosa. Kape jacu tzaj kꞌakꞌan tcꞌuꞌj kiꞌj tuꞌn kclet.

7 Atzun cye yucul barc cyma cyxolx:

—E tjaw swert kuꞌn, tuꞌntzun tel knicꞌ tiꞌj alcye at til tiꞌj ju mya baꞌn ma tzaj kiꞌj.

Jawtzun swert cyuꞌn ex aju swert cub tzꞌak tibaj Jonás. 8 Xiꞌtzun cymaꞌn te:

—Kꞌmantza keye tikuꞌn ma tzaj mya baꞌn kibaj. ¿Alcye takꞌuna? ¿Jatum tzajniya? ¿Alcye ttanmiya ex alcye tiyjila? Che chi xjal.

9 Atzunte Jonás xi ttzakꞌweꞌn:

—Aj Ebrey kine ex in chin cꞌulune te Kman aju Dios at tuj cyaꞌj, aju binchante mar ex txꞌotxꞌ, chi Jonás.

10 Tzaj nimxix cyxobil ke yucul barc, ex xi cymaꞌn te:

—¿Tikuꞌn ma tbinchaya jlu?

Porque el cynicꞌ tiꞌj ka otok tzꞌel ok Jonás twitz Kman porque ax Jonás otok txi kꞌmante cye.

11 Ex tuꞌnju cyjaꞌ ttzaj pulin mar nimxix wen, xi cykanin te: ¿Ti cbantel kuꞌne tiꞌja tuꞌntzun tcub numeꞌ mar? Che chi.

12 —Chin cyxoꞌnxe tuj mar, tuꞌntzun tcub numeꞌ. Baꞌn wuꞌne, akine at wile, ex tuꞌntzun jlu ma tzaj nintz cykꞌikꞌ lu cyibaje, chi Jonás, xi ttzakꞌweꞌn.

13 Ke yucul barc o cyajbe tuꞌn cyajtz meltzꞌaj ex e oc ten yuculte barc tuꞌn tcyakil cyipun, tuꞌntzun cyicꞌel juntl maj ttzi txꞌotxꞌ, pero mintiꞌx pon cyxcyeꞌ tiꞌj, porque ate mar nok masxix tzaj pulin wen. 14 E octzun ten cubsal twitz Kman, che chi cyjaꞌ:

—Aya Kman, miꞌn takꞌa ambil tuꞌn kcyime tuꞌn tlaj til ju xinak lu. Ex miꞌn tzꞌoc tkꞌoꞌna te kile aju tcamic ka mintiꞌ til, porque ma bant tuꞌna ic tzaꞌnx tajbila, che chi.

15 Cuꞌxtzun xoꞌn Jonás cyuꞌn tuj mar ex atzunte mar cub numeꞌ. 16 Tejtzun cyqueꞌyinte ke yucul barc jlu, tzaj nimxix tchi Kman cyiꞌj; xi cykꞌoꞌn jun chojbil te Kman ex xi cytziyan tuꞌn cyniman te.

17 Pero banin tten jun nintz cyiẍ tuꞌn Kman tuꞌn t-xi balkꞌuꞌn Jonás tuꞌn. Oxe kꞌij ex oxe konicꞌan ten Jonás tuj tcꞌuꞌj cyiẍ.