Ma kbi jun tkanil tuꞌn Kman, ma txi samaꞌn jun sanjel kꞌmalte cyuj ke nasyon cyjaꞌ: Chux keye, koꞌke kꞌojlel cyiꞌj aj Edom, chi sanjel.

Chi Kman in tmaꞌn cyjaꞌ cye aj Edom: 2 Che oquel nkꞌoꞌne te chꞌin cyoclene cyxol mastl nasyon ex che elel icꞌune cyuꞌn. 3 Tuꞌnx ju cynimbil cyibe ma che cub sbuꞌne. Najl keye tuj tpaꞌxil pic ex cyjax cyjaye cywi witz, ex tuꞌntzunju in cymaꞌne: ¿Alcye jun jacu cub kiꞌj tuꞌn? Che chiye. 4 Masque che jax lakꞌeꞌye wen ic tzaꞌn jun tꞌiw, ex masque cub cykꞌoꞌne cykꞌuꞌye cyxol ke cheꞌw, maxtzun ma chixin che tzajel nxoꞌne, chi Kman.

5 Nokwit elekꞌ keju che ul elkꞌalte cyiꞌje te konicꞌan, mlaylo txi cyiꞌn tcyakilju at cyeye; nokwit xilil twitz uva keju che ul cyiꞌje, jaculo cyaj cykꞌoꞌn junjun rasim twitz uva. Pero atzun ke aj kꞌoj cyiꞌje jumajx ma che naje cyuꞌn. 6 Akeye tiyjil Esaú, cxel kꞌiꞌn tcyakilju at cyeye. Cxel elkꞌaꞌn tcyakil cykꞌinumable. 7 Cycyakil ke xjal mojl cyyole cyucꞌil che cbel sbuꞌne cyuꞌn; che elex lajoꞌne twitz cytxꞌotxꞌe cyuꞌn. Ex ajunpe ke cyamiwoye cjawil cyiꞌn cyib cyiꞌje, ex ke cyamiwoye kꞌukl cycꞌuꞌje cyiꞌj cbel cykꞌoꞌn cꞌobil tuj cybeye. Mintiꞌ cynabl ke aj Edom.

8 Chi Kman in tmaꞌn: Oc tcub cycastiw ke aj Edom wuꞌne, che najel cycyakil ke xjal at cynabl, akeju ateꞌ cyxol, ex cꞌelel wiꞌne cyojtzkibl xjal, akeju ateꞌ tuj tiwitz txꞌotxꞌ cye tiyjil Esaú. 9 Ke xinak aj Temán, akeju cyuw cycꞌuꞌj tuj kꞌoj, che tzajel luꞌlun tuꞌn cyxobil, ex keju ateꞌ tuj tiwitz txꞌotxꞌ cye tiyjil Esaú, mi jun cyjel ankꞌin.

10 Cbel cychꞌixwiye ex jumajx che najele tuꞌnju el cyelkꞌaꞌne aju at cye tiyjil Jacob, aju cyermaniye, ex cub cybyoꞌne. 11 Tej tetz cyiꞌn aj kꞌoj aju kꞌinumabl at tuj tnam, tej cyocx paꞌn ke tlamel tnam Jerusalén cyuꞌn ke soldad tzajni ke tuj juntl tnam, atzun cyeye nok xi cyqueꞌyine. Tej tjaw cyiꞌn swert tiꞌj tuꞌn tel cyiꞌn aju at cye aj Jerusalén ex tej t-xi cyiꞌn cykꞌinumabl, ax icxtzun cybinchaye ic tzaꞌn cybincha ke aj kꞌoj. 12 Miwt e jaw tzalaje tej ttzaj mya baꞌn cyibaj cyermaniye akeju aj Judá; miwt e jaw tzalaje tej tcyile tej cynaj, ex miwt e xmayine cyiꞌj tej ttzaj nim bis cyiꞌj. 13 Miwt e ocxe tuj tnam etzan wuꞌne tej ttzaj yajbil cyiꞌj ex miwt e tzalaje cyiꞌj tej ttzaj xitbil cyibaj ex tej ttzaj ju mya baꞌn cyibaj, ex miwt xi cyelkꞌaꞌne cykꞌinumabl tej ttzaj xitbil cyibaj. 14 Miwt e cub weꞌye cyuj tcrusil be tuꞌn tcub cybyoꞌne ke xjal in che etz tzokpaj, ex miwt xi cykꞌoꞌne ke xjal in che el ok tuj cykꞌab aj kꞌoj tej ttzaj xitbil cyibaj.

15 Ma tzul lakꞌeꞌ tkꞌijlalil tuꞌn tul Kman tuꞌn cyoc cycyakil nasyon tuj xjel tuꞌn. Akeye aj Edom, aju ma cybinchaye cyiꞌj txkantl, atzun cbantel cyiꞌje, oc cycꞌmaꞌye aju chojbil cyeye tiꞌj cybinchbene mya baꞌn. 16 Akeye aj Israel, como puro cꞌa aju tcuꞌx tuj copa, aju xi cycꞌaꞌne twiꞌ ju witz xjan etzan wuꞌne, axtzun cꞌa aju tcuꞌx tuj copa cxel kꞌot cye txkantl nasyon, aju cucx cxel cycꞌaꞌn ex che najel te jumajx.

17 Pero at junjun che cletel twi witz Sión ex cꞌoquel ju witz lu te jun lugar xjan. Ake tiyjil Jacob ctzyetel juntl maj cyuꞌn aju txꞌotxꞌ etzan cyuꞌn nej. 18 Ke tiyjil Jacob ic che oquel ic tzaꞌn kꞌakꞌ, ex ke tiyjil José ic che oquel ic tzaꞌn tkan kꞌakꞌ, ex atzun ke tiyjil Esaú ic che oquel ic tzaꞌn tkan triw jurat in baj tzꞌeꞌy. Jumajx che bajel tzꞌeꞌy tuꞌn kꞌakꞌ lu, mi jun tiyjil Esaú cyjel clet. Akine Dios in chin kꞌmante jlu.

19 Ke aj Israel ateꞌ tuj txꞌotxꞌ Néguev ctzyetel aju tiwitz txꞌotxꞌ cyuꞌn, aju cytxꞌotxꞌ tiyjil Esaú, ex keju najl tuj chkꞌajlaj t-xe witz ctzyetel cytxꞌotxꞌ aj Filistey cyuꞌn. Ax icx ctzyetel cytxꞌotxꞌ aj Efraín cyuꞌn, tucꞌix cytxꞌotxꞌ aj Samaria ex atzun ke aj Benjamín ctzyetel cytxꞌotxꞌ aj Galaad cyuꞌn. 20 Atzun txkantl aj Israel, akeju otok che pon kꞌin cyuj mastl nasyon, ctzyetel cytxꞌotxꞌ aj Canaán cyuꞌn tuꞌn tpon baj max tuj tnam Sarepta, ex ke aj Jerusalén, akeju otok che pon kꞌin tuj tnam Sefarad, che tzyetel ke tnam ateꞌ tuj txꞌotxꞌ Néguev cyuꞌn. 21 Ke xjal otok che camban oc che jawix twi witz Sión tuꞌn tcub cykꞌoꞌn cysentens ke xjal najl tuj tiwitz txꞌotxꞌ cye tiyjil Esaú ex a Kman ccawil tibaj tcyakil.