Che najel aj Israel tuꞌn tjwisi Kman
9
O wile Kman tcub ttxlaj t-altar ex tzaj tmaꞌn weye: Pejcyꞌaꞌn oca twi tkan ja tuꞌntzun cybaj yucch ke tkul, tuꞌntzun tcub tilj cyibaj xjal. Atzun keju che cyjel ankꞌin che bel nbyoꞌne tuꞌn spad; masque che el ok, pero mi jun ccletel; 2 masque cheꞌx ewal cyib max t-xeꞌpun txꞌotxꞌ tuj cynajbil cyimni, pero che jawitz wiꞌne, ex masque che jax max twitz cyaꞌj, pero che beletz wiꞌne. 3 Ka ma che jax ewal cyib twi witz Carmelo, max chin pole jyolte cye ex max che tzyetel wuꞌne; ka ma cheꞌx ewal cyib nwitze max t-xeꞌpun mar, cxel nsamaꞌne jun nintz lobaj cyiꞌj tuꞌn cyoc txꞌaꞌn tuꞌn; 4 ex ka ma cheꞌx kꞌiꞌn pres najchak cyuꞌn aj kꞌoj cyiꞌj, max ma chixin cxel nsamaꞌne spad tuꞌn cycub byoꞌn tuꞌn. Cucx cbel ten nwitze cyibaj, pero mya tuꞌn tbinchet baꞌn cye, nok oꞌcx tuꞌn tbinchet mya baꞌn cyiꞌj, chi Dios.5 Oc toc macoꞌn txꞌotxꞌ tuꞌn Kman aju Tajaw Tcyakil, biꞌx in cub ulj ex cycyakil xjal najl twitz in che oc ten okꞌel. In jaw chꞌiy txꞌotxꞌ ex in cub lakꞌeꞌ, ic tzaꞌn in chꞌiy nima Nilo ex in cub tiꞌj.
6 Cub tkꞌoꞌn Dios tnajbil tuj cyaꞌj ex tuꞌn o bant twitz cyaꞌj tjax tibaj txꞌotxꞌ; in tzaj ttxcoꞌn aꞌ tuj mar ex in tzaj tkoꞌn twitz txꞌotxꞌ; Kman Dios atzun tbiju.
7 Chi Kman in tmaꞌn cye aj Israel: Te weye mya mas mejor keye cywitz aj Etiopía. Ax toc e tzaj wiꞌne tuj Ejipt, pero icxtzun e tzaj wiꞌne ke aj Filistey tuj Cret ex ke aj Aramey tuj Kir, akeju ateꞌ ttxlaj cytxꞌotxꞌe, chi Kman. 8 Tcub twitz Kman cyibaj aj Israel akeju binchal il, ex in tmaꞌn: Biꞌx cnajel cycawbil wuꞌne tuꞌn miꞌn ttentl twitz txꞌotxꞌ; pero mlay che naj cycyakil tiyjil Jacob wuꞌne, chi Kman. 9 Cxel nmaꞌne tuꞌn cyoc aj Israel tuj sarand cyuj cycyakil nasyon ic tzaꞌn nneꞌl txijet twitz triw tuj sarand, ex mi jun twitz nneꞌl tzꞌak twitz txꞌotxꞌ. 10 Il tiꞌj tuꞌn cycyim tuꞌn spad cycyakil keju in che binchan il cyxol ke xjal etzan wuꞌne, akeju in cymaꞌn: Baka at jun mya baꞌn tzul kiꞌj ex baka jacu tzaj xitbil, che chi.
Tzul tkꞌijlalil tuꞌn cyten aj Israel juntl maj tuj cytanmi
11 Aju tcawbil David o cub xitj ic tzaꞌn jun ja in cub tilj, pero tzul tkꞌijlalil tuꞌn tjaw nbinchaꞌne juntl maj. Cxel nkꞌoꞌne ju cawbil juntl maj cye tiyjil David tuꞌn tten tcawbil icxix tzaꞌn tten nej, 12 tuꞌntzun toc juntl maj te cyetzbil aj Israel aju cytxꞌotxꞌ junjuntl aj Edom otok che cyaj ankꞌin, cyucꞌix cycyakil mastl nasyon etzantok wuꞌne nej. Ate Kman in kꞌmante jlu, ex cjapunel tuꞌn icju.
13 Tzul tkꞌijlalil cucxtok cychmon xjal tiꞌj twitz triw oc tul canun naj tyemp tuꞌn tjaw kꞌuꞌt txꞌotxꞌ, ex naꞌnxtok tel baj yatzꞌoꞌn taꞌl twitz uva otok jaw chmoꞌn, oc tul naj tkꞌijlalil tuꞌn tcuꞌx awet triw. Cywiꞌ ke nmak witz ex cywiꞌ ke tal witz ctel nim taꞌl twitz uva. 14 Che ajetz wiꞌne ke aj Israel akeju etzan wuꞌne tuj txꞌotxꞌ jatum otok che pon kꞌiꞌn; cjawil cybinchaꞌn juntl maj ke cytanmi otok che cub xitj ex atzun che najal cyuj; cbelex cyawaꞌn tkan uva ex che cꞌal tiꞌj taꞌl twitz; cbelex cyawaꞌn mastl awal ex che loꞌl tiꞌj twitz. 15 Che bel nkꞌoꞌne tuj cyex cytxꞌotxꞌ ex mlay che ex kꞌiꞌn juntl maj tuj txꞌotxꞌ xi nkꞌoꞌne cye. Akine Cydios in chin kꞌmante ju yol lu.