JOEL
Baj waꞌn awal cyuꞌn ẍplon
1
Atzun yol jlu tzaj tmaꞌn Kman te Joel aju tcyꞌajal Petuel. 2 Cykꞌontz cywiꞌye tiꞌj ju yol lu akeye tij xjal ex cycyakile akeye najl tuj txꞌotxꞌ lu. ¿Ope cyilxiye jun yajbil ic tzaꞌn jlu ojtxi? ¿Ope tzajxi jun maj icju tej cyten ke ktzan cymane? 3 Cymanxe cye cycꞌwaꞌle tuꞌntzun t-xi cymaꞌn cycꞌwaꞌle cye ke cycꞌwaꞌl ex tuꞌn t-xi cymaꞌn cycꞌwaꞌl ke cycꞌwaꞌl, cye keju che ul te tibajxi. 4 Tcyakil baj cywaꞌn ke ẍplon cyjaꞌ: Aju in cyaj tuꞌn jun cꞌloj, in baj twaꞌn juntl cꞌloj ex iclex in bant tuꞌn junjun cꞌloj tejxi tbaj tcyakil cyuꞌn.5 Akeye chyoꞌmni cywiꞌye, tzulx cynable ex che okꞌe. Che ayayane akeye cꞌal vin, porque aju taꞌl uva cꞌelel kꞌiꞌn cyeye. 6 Ke ẍplon ic cyten ic tzaꞌn txkan soldad at nim cyipun ex nim cybaj, aju twitz cyeꞌ ic tten ic tzaꞌn twitz teꞌ jun tman balun, ex aju cycyaꞌ ic tten ic tzaꞌn tcyaꞌ ttxu balun; ma che oc tzokpaj tiꞌj ntanmiye. 7 Aju kawal uva ma baj naj cyuꞌn, ex ma baj cywaꞌn ju kawal higo; jumajx ma baj cywaꞌn ttxcꞌomil tzeꞌ ex puro sak ma cyaj tiꞌj tkꞌab cyuꞌn. 8 Che okꞌtzune, ic tzaꞌn jun kꞌapoj chꞌixtok tmojeꞌ, ka ma cyim ju cuꞌxun cyjaꞌtok tmojeꞌ tucꞌil, nnoꞌc ten okꞌel ex nnoꞌc tkꞌoꞌn t-xbalun kꞌek te techal tiꞌj tbis; 9 cyjaꞌxtzun in che okꞌ ke pal, akeju ajbel te Kman, porque mintiꞌtl twitz triw tuj tja Dios ex mintiꞌtl taꞌl twitz uva te jun oyaj te Kman. 10 Jumajx ma naj ju cojbil ex puro bis taꞌ txꞌotxꞌ. Ma naj triw, ma che tzkij ke tkan uva, ex chꞌix cytzkij ke tkan olivo. 11 E ttzaj baj cycꞌuꞌje akeye xjal akꞌnal tuj cojbil, ex che ayayane akeye awal tkan uva, porque ma che naj tkan awal tucꞌix twitz triw ex twitz sebad. 12 Ma che baj tzkij ke tkan uva ex ma che naj ke tkan higo. Ax icx ma che tzkij ke carnad ẍokꞌ, ke tkan xaꞌj, ke tkan mansan ex tcyakil tzeꞌ tuj cojbil. Cyjaꞌtzun, ma naj tcyakil cytzalajbil xjal. 13 Akeye in che ajbene te Dios, baꞌn tuꞌn tex akꞌbil cyuꞌne toc cyxbalune chꞌiꞌx twitz te jun techal tiꞌj cybise, ex che okꞌe tuꞌn taꞌw, porque tuj tja Dios, aju in che ajbene te, mintiꞌtl twitz awal ex mintiꞌ taꞌl twitz uva te jun oyaj te. 14 Cymanxe cye xjal tuꞌn tcub cybuyin cyib ex cymanxe tuꞌn tcub cyyoꞌn weꞌyaj; cychmon oc cyibe tuj tja Kman Dios, cyucꞌix ke tij xjal ex cycyakil keju najl tuj txꞌotxꞌ lu, ex che cubsane twitz Kman.
15 Ay becꞌbil kwitz, porque ma tzul lakꞌeꞌ tkꞌijlalil castiw tuꞌn Kman. Tkꞌijlalil xobajil, porque ko najel tuꞌn, ex atzun ctzajel t-samaꞌn Kman aju at tipumal tuꞌn tbant tcyakil tuꞌn. 16 Ma tzꞌel kꞌiꞌn kwa kwitzx ex mintiꞌtl ju tzalajbil tuj tja Kdios. 17 Biꞌx ma kꞌay iyaj tjakꞌ txꞌotxꞌ, ma naj ju triw ex ma che baj xitj ke txꞌutxꞌ. 18 Nok in che muyin ke wacẍ tuꞌn tlaj cywa, nok in che betjeꞌ jyol cꞌul; ex chꞌix cycyim ẍneꞌl tuꞌn weꞌyaj. 19 Nman, in chin cubsane twitza tuꞌn tlaj ma baj tzꞌeꞌy chaꞌx cꞌul tuꞌn kꞌakꞌ tuj tzkij txꞌotxꞌ, ax icx ma baj tzꞌeꞌy tcyakil tzeꞌ tuj cojbil. 20 Cyucꞌix ke jil te tjakꞌ cꞌul in che cubsan twitza, porque biꞌx ma che aj tzkij ke aꞌ ex ma baj tzꞌeꞌy cꞌul tuj cojbil.