Tej cyul tzokpaj ke ẍplon
2
Cykꞌajtzan oque chun twi witz Sión; cykꞌajtzan oque te jun tkanil te xobajil twiꞌ ju witz xjan te Kman. Baꞌn tuꞌn cytzaj luꞌlun cycyakil aj Judá, porque ma tzul canun ju kꞌij te castiw tuꞌn Kman: 2 Jun tkꞌijlalil klolj wen, jun tkꞌijlalil te kꞌek muj ex te xlecun. Ic cyten ke ẍplon ic tzaꞌn txkan soldad nimxix cyipun ex nim cyajlal, ma baj noj cywiꞌ ke witz cyuꞌn, mer ic tzaꞌn tkan kꞌij oc in jawil koptzꞌaj. Bajx tzaj jun maj icju ex mlay tzaj juntl maj ic tzaꞌn jlu. 3 Ic cyten ke ẍplon ic tzaꞌn kꞌakꞌ tcyakil in baj naj tuꞌn; in baj tzꞌeꞌy tuꞌn naꞌnxtok tpon canun ex cucx tbaj tzꞌeꞌy tuꞌn te tibajxi. Tej cypon canun ke ẍplon, ic tten twitz txꞌotxꞌ ic tzaꞌn tkan awal tbanilxix tuj Edén, octzun cypon canun, ic nnoꞌc cyuꞌn ic tzaꞌn tzkij txꞌotxꞌ mintiꞌ awal tuj. Misicyer jun in cyaj clet cyuꞌn. 4 Aju cyilbilal ẍplon mer ic tzaꞌn cyilbilal chej ex in che ojkelan wen ic tzaꞌn ke xjal cyjax cyibaj chej. 5 Aju tkꞌajkꞌajel oc cylipan cywi witz mer ic tzaꞌn cykꞌajkꞌajel ke carwaj oc cybet tuj kꞌoj, mer ic tzaꞌn oc in spokokon t-xak tzeꞌ oc ttzꞌeꞌy tuꞌn kꞌakꞌ ex mer ic tzaꞌn txkan soldad at nim cyipun txolsaꞌn cyten tuꞌn cykꞌojin. 6 Biꞌx in che tzaj luꞌlun ke xjal oc cyqueꞌyinte, ex tcyakil cywitz puro spelin nnoꞌc. 7 In che ojkelan ic tzaꞌn ke xjal, cyuw cycꞌuꞌj tuj kꞌoj ex in che jax cywiꞌ ke muro toc tiꞌjele tnam ic tzaꞌn ke soldad; teyle te junjun in xi tiꞌn tbe, misicyer jun in xi tiꞌn juntl be. 8 Misicyer jun in jaw tzꞌak tiꞌj juntl tucꞌil; teyle junjun kꞌiꞌnx tbe; masque in kꞌajt cycub plech cyxol, mintiꞌ in che baj sputj. 9 In che oc tzokpaj tiꞌj tnam, in che ocx ojkelan twi muro tocsaꞌn tiꞌj tnam, in che jax tuꞌn cyocx cyuj cyja xjal, ex mer ic tzaꞌn elekꞌ ke in che ocx ttzi ventan.10 In tzaj luꞌlun txꞌotxꞌ cywitz ex biꞌx in tzaj yucch cyaꞌj, biꞌx nnoꞌc yupj twitz kꞌij tucꞌix twitz xjaw, ex mintiꞌtl in che koptzꞌaj cheꞌw. 11 A Kman nejenel cywitz t-soldad ex in binjtz tkꞌajkꞌajel twiꞌ. Mas cyajlal ke t-soldad ex nim cyipun keju in japun ju tyol cyuꞌn. Maꞌxix toclen ex xobajilxix aju tkꞌijlalil tzul tuꞌn Kman. ¿Alcye jun jacu tzicꞌx tuꞌn?
Aju tkꞌakꞌbil tcꞌuꞌj Kman
12 Atzun jaꞌlo, cyajtz meltzꞌaje wucꞌile tuꞌn tcyakil cyanmiye; cyyoꞌn cube weꞌyaj, che okꞌe ex che ayayane, chi Kman. 13 Cyajtz meltzꞌaje tucꞌil Kman aju Cydiose, tzajx taꞌw tuj cyanmiye ex mya tuꞌn tbaj cysbitꞌun cyxbalune. Porque ate Kman at xtalbil tucꞌil ex at nim tkꞌakꞌbil tcꞌuꞌj, nim tpasens ex nim tcꞌujlalil ex jacu chewix tcꞌuꞌj tuꞌn miꞌn tcub cycastiwoye. 14 Mya yajcu cub t-ximan tuꞌn miꞌn tcub tkꞌoꞌn cycastiwoye, ex tzul tkꞌoꞌn t-xtalbil cyeye cyjaꞌ: Tzul twitz awal ex taꞌl twitz uva tuꞌntzun t-xi cykꞌoꞌne jun oyaj te Kman aju Cydiose.
15 Cykꞌajtzan oque chun twi witz Sión, cymanxe cye xjal tuꞌn tcub cybuyin cyib ex cymanxe cye tuꞌn tcub cyyoꞌn weꞌyaj. 16 Cychmon oque ke xjal etzan tuꞌn Dios, cychmon oque ke tij xjal ex ke cꞌwaꞌl, cyucꞌix keju cucx cychꞌuꞌn, ex cyucꞌix keju cꞌitzke cyoclen mojeꞌ, e cyetz tuj cyja. 17 E cyjaw okꞌ ke pal akeju in che ajben te Kman, e cyjaw okꞌ t-xol ttzi tja Dios tucꞌix altar, ex cymanx cyjaꞌ: Najsama Kman aju cyil ke xjal etzan tuꞌna, miꞌn takꞌa ambil tuꞌn cyxmayin xjal cyiꞌj keju etzan tuꞌna; miwt cub cyiꞌj cyuꞌn mastl nasyon ex miwt cyma ke xjal mya ocslal tiꞌja: ¿Jatum taꞌ Cydios ke xjal lu?
18 Tzajtzun tloꞌch tcꞌuꞌj Kman tuꞌn tlaj mya baꞌn cybincha xjal tiꞌj txꞌotxꞌ etzan tuꞌn, ex tzaj tzꞌeꞌy tcꞌuꞌj cyiꞌj ke xjal etzan tuꞌn 19 ex tma cyjaꞌ: Cxel nkꞌoꞌne triw tucꞌix taꞌl twitz uva ex tucꞌix cychiꞌye aseyt tuꞌntzun cynojxixe wen, ex mlay txi nkꞌoꞌne juntl maj ambil tuꞌn cyxmayinjtze cyuꞌn ke mya ocslal. 20 Che elel wiꞌne ke ẍplon cyxole, akeju ma che tzaj tuj tbankꞌab kꞌij, ex che xel nlajoꞌne tuj tzkij txꞌotxꞌ. Akeju nejenel cywitz che xel nlajoꞌne tuj mar tuj tjawitz kꞌij, ex keju lepchix cytzaj cyiꞌj che xel nlajoꞌne tuj nintz mar tuj telex kꞌij, aju cyximlal biꞌx ckꞌaytel ex oc che xewtel. Oc nbinchaꞌye ju nbinchbene maꞌ t-xilen. 21 Aya txꞌotxꞌ, tzalajxa nim ex miꞌn xoba porque che bantel ke binchben maꞌ cyxilen tuꞌn Kman. 22 Miꞌn che xobe akeye txcup te tjakꞌ cꞌul, aju cywable tuj cꞌul tzul t-xul, ke tzeꞌ ctzajel cykꞌoꞌn cywitz ex ke tkan higo tucꞌix tkan uva ctzajel cykꞌoꞌn nim cywitz. 23 Che tzalajxe akeye xjal najl tuj tnam Sión, che tzalajxe tiꞌj Kman aju Cydiose, porque a Kman ma tzaj kꞌonte jbal cyibaje tujxix tkꞌijlalil, aju jbal in cuꞌtz nej ex aju in cuꞌtz te tibajxi, ic tzaꞌnxix in cuꞌtz ojtxi. 24 Cjawil cychmoꞌne nim twitz triw, nim taꞌl twitz uva cchmetel tuj tcubil, ax icx chibj aseyt.
25 Nim cxel nkꞌoꞌne cyeye te t-xel ju twitz cyawale o naj cyuꞌn junjun ẍplon cyuj ke abkꞌi o che ex, ic cyten ke jlu ic tzaꞌn txkan soldad nim cyajlal tej cytzaj nsamaꞌne cyiꞌje. 26 Che waꞌle ocxi cynoje wen, ex chin jawil cynimsaꞌne, akine Cydiose, porque akine in binchante ke binchben maꞌ cyxilen cyeye. Ex mlay cub juntl maj cychꞌixwi ke xjal etzan wuꞌne. 27 Cꞌelel cynicꞌe wiꞌje, akeye aj Israel, akine atine cyucꞌile, akine Dios aju Cymane ex mintiꞌ juntl. Mlay cub juntl maj cychꞌixwiye, akeye etzan wuꞌne.
Tzul tkꞌoꞌn Dios aju Xewbaj Xjan
28 Te tibajxi tcyakil jlu ctzajel nkꞌoꞌne Nxewe tuj cyanmi cycyakil xjal: Ke cycyꞌajale ex ke cymeꞌjele che oquel te nsanjele tuꞌn t-xi cypacbaꞌn nyole cye xjal, ke tij xjal cyxole cꞌelel cynicꞌ tiꞌj tuj witzicꞌ aju wajbile cye, ex ke cuꞌxun ateꞌ cyxole at ctzajel yecꞌun cye mer ic tzaꞌn tuj witzicꞌ. 29 Ax icx ctzajel nkꞌoꞌne Nxewe tuj cyanmi ke majen xinak ex ke majen xuꞌj tuj tkꞌijlalil tzul; 30 Ctzajel nyecꞌune nbinchbene maꞌ t-xilen twitz cyaꞌj, ax icx twitz txꞌotxꞌ ctzajel nyecꞌune chicꞌ ex kꞌakꞌ tucꞌix sib in bukin. 31 Cmeltzꞌajel kꞌij tuꞌn toc te klolj, ex aju xjaw cꞌoquel queꞌyin ic tzaꞌn chicꞌ; cbantel jlu naꞌnxtok tpon tkꞌijlalil tuꞌn tul Kman, jun kꞌij maꞌ toclen ex xobajilxix. 32 Pero cycyakil keju in che cubsan twitz Kman che cletel, porque aju colbil atzun taꞌ twi witz Sión ex tuj tnam Jerusalén, ic tzaꞌn o tzaj ttziyan Kman. Ke xjal scꞌoꞌmaj tuꞌn che ankꞌil.