3
Oc tul canun aju kꞌij lu, chi Kman, che tzokpetel ke xjal aj Judá ex ke aj Jerusalén ex cxel nkꞌoꞌne cyoclen juntl maj. 2 Che oquel nchmoꞌne cycyakil nasyon, che xel wiꞌne tuj chkꞌajlaj Josafat ex atzun che oquel tuj xjel wuꞌne tiꞌj alcye ma cybincha cyiꞌj ke xjal etzan wuꞌne, ake aj Israel, tuꞌnju e baj sputj cyuꞌn tuj tcyakil twitz txꞌotxꞌ ex baj cysipan aju txꞌotxꞌ etzan wuꞌne. 3 E oc ten kꞌil swert tiꞌj alcyechak tuꞌn t-xi kꞌinte cye ke xjal etzan wuꞌne, ex xi cycꞌayin ke tal kꞌa ex ke tal txin, atzunju pwak cywiꞌ baj cynajsaꞌn twi cycꞌa vin ex cyucꞌil ke xuꞌj jawni cywitz cyucꞌil xinak.Tzul jwisi tuꞌn Kman cyibaj nasyon
4 ¿Ti cyaje weye, akeye aj Tiro, aj Sidón ex aj Filistey? ¿Atpe wile tuj cywitze tuꞌnju cyaje tuꞌn cyoc tzokpaje wiꞌje? ¿Cyajpeye tuꞌn t-xelin cyuꞌne wiꞌje? Ka ic tten cyuꞌne, jurat naj cbel nkꞌoꞌne castiw cyibajxe tuꞌn tlaj cybinchbene mya baꞌn. 5 Akeye e jeꞌx elkꞌante npwake aju sak pwak ex kꞌan pwak, ex xi cyiꞌne nkꞌinumable cyuj cyja cydiose. 6 Najchak ma che pon cyiꞌne ke aj Judá cyucꞌix ke aj Jerusalén, ex ma cheꞌx cycꞌayine te cymajen ke xjal Grieg. 7 Atzun jaꞌlo che ajetz wiꞌne ke xjal lu jatum ma che pon cycꞌayine, icxtzun ctembil cyiꞌje wuꞌne ic tzaꞌnx ma cybinchaye cyiꞌj. 8 Che xel ncꞌayine ke cycyꞌajale ex ke cymeꞌjele cye xjal Judiy, atzun ke jlu cxel cycꞌayin cye aj Sabey; ake xjal lu najchak taꞌ cytanmi. Akine Dios in chin kꞌmante jlu.
9 Cymanxe jlu cye nasyon: Cybincham cytene tuꞌn cykꞌojine, cytxcontze ke xjal cyuw cycꞌuꞌj tuj kꞌoj; e cytzaj cycyakil ke soldad tuꞌn ttzyet kꞌoj cyuꞌn. 10 Cybincham cyspadiye tiꞌj cychꞌoque ex cybincham cylanse tiꞌj cyjoble triw; ex aju xjal mintiꞌ tipun, baꞌn tuꞌn tmante: At nim wipune. 11 Cycyakile akeye nasyon nikayin ateꞌye, cytzaj ojkeline tuꞌn toc cychmon cyibe ma chixin. Nman Dios, kꞌintza ke t-soldadiya cyuw cycꞌuꞌj tuj kꞌoj. 12 Chi Kman in tmaꞌn cyjaꞌ: E tbant cyten ke nasyon ex e cytzaj tuꞌn cyul tuj chkꞌajlaj Josafat, porque atzun chin bel keꞌye tuꞌn tcub cysentens cycyakil nasyon nikayin ateꞌ. 13 Tuꞌnju jumajx mya baꞌn ke, che cyjoꞌn jawe ic tzaꞌn in jaw joꞌt triw oc tkꞌanax, porque ma pon tyemp tuꞌn tjaw chmet twitz awal. Che cypatzꞌun cube ic tzaꞌn nneꞌl patzꞌut taꞌl twitz uva, porque ma noj aju putzꞌbil twitz uva, ex ma che baj noj ke tcubil tuꞌn taꞌl twitz. 14 At nimxix txkan xjal ma che ul tuj chkꞌajlaj jatum cbantel tiꞌj tuꞌn tcub cysentens tuꞌn Kman, porque ma tzul canun tkꞌijlalil jwisi tuꞌn Kman. 15 Cꞌoquel klolj twitz kꞌij, ax icx twitz xjaw, ex mlay che koptzꞌaj ke cheꞌw. 16 Oc tjaw tkꞌajkꞌajel twi Kman cyuw wen twi witz Sión tuj Jerusalén, biꞌx che tzajel luꞌlun cyaꞌj ex txꞌotxꞌ. Pero ate Kman cꞌoquel te cycolbil cyib ke aj Israel, akeju etzan tuꞌn.
Aju colpibl tzul te tnam Judá
17 Chi Dios: Cꞌelel cynicꞌe tiꞌj, ax toc akine Dios aju Cymane; atzun najl kine twi witz Sión, aju witz xjan etzan wuꞌne. Aju tnam Jerusalén cꞌoquel te jun tnam xjan; mlayx cub tiꞌj juntl maj cyuꞌn xjal cyuj mastl nasyon. 18 Tuj tkꞌijlalil tzul che pokꞌtel tkan uva cywiꞌ nmak witz, ex che chmetel ke wacẍ cywiꞌ ke tal witz, ex nim aꞌ ctel cyuj ke tkꞌab xak tuj cytxꞌotxꞌ aj Judá. Cjawil jlet jun twi aꞌ tuj njaye ex cbajel aꞌlin ju chkꞌajlaj Sitim tuꞌn. 19 Atzunju tnam Ejipt cbel xitj, ex ju tnam Edom cꞌoquel te tzkij txꞌotxꞌ tuꞌn tlaj e oc tzokpaj tiꞌj tnam Judá ex cub cybyoꞌn ke xjal mintiꞌ cyil tujx cytanmi. 20-21 Che cymel wuꞌne tuꞌn t-xelin cybinchben, ex mlay cub nnajsaꞌne til aju xjal at til. Atzun ju txꞌotxꞌ Judá ex aju tnam Jerusalén cucx che najal xjal cyuj, ex atzun weye akine Cymane oc chin najale twi witz Sión, chi Dios.