2 Cyjaꞌtzun tten o xeꞌt tyol Kman tucꞌil Oseas tuꞌn t-xi tmaꞌn cye aj Israel, chi cyjaꞌ: Ke aj Israel ma tzꞌel cypaꞌn cyib wiꞌje tuꞌnju ma che oc ic tzaꞌn jun xuꞌj jawni twitz cyucꞌil xinak. Icxtzun teya, txiꞌya ex kꞌintza jun t-xuꞌjila jawni twitz cyucꞌil xinak, ex baꞌn tuꞌn tul tcꞌwaꞌla tiꞌj tuꞌntzun cyoc ke cꞌwaꞌl lu te tal jun xuꞌj jawni twitz cyucꞌil xinak, chi Dios te Oseas.

3 Tzajtzun tiꞌn Oseas ju xuꞌj Gomer tbi, aju tmeꞌjel Diblaim, tuꞌn toc te t-xuꞌjil, oc ten tal ex tzaj jun tcyꞌajal Oseas tiꞌj. 4 Xiꞌtzun tmaꞌn Kman te Oseas: Jezreel tbi tal kꞌa cꞌoquel tkꞌoꞌna, porque chꞌix tpon tyemp tuꞌn tcub nkꞌoꞌne cycastiw ke tiyjil rey Jehú, tuꞌn tlaj e cub byoꞌn xjal tuꞌn tuj lugar Jezreel, ex biꞌx cnajel wuꞌne aju cycawbil rey cyxol aj Israel. 5 Masque nim cyipun ke cysoldad aj Israel, che najel wuꞌne tuj chkꞌajlaj Jezreel tuj tkꞌijlalil tzul, chi Kman te Oseas.

6 Oc ten juntl tal Gomer ex txin tal ul itzꞌj. Tzajtzun tmaꞌn Kman te Oseas: Lo-ruhama tbi tal txin cꞌoquel tkꞌoꞌna, porque mlay tzaj kꞌakꞌan ncꞌuꞌje juntl maj cyiꞌj aj Israel ex mlay cub nnajsaꞌne cyil. 7 Atzun cyiꞌj aj judá ctzajel kꞌakꞌan ncꞌuꞌje. Wuꞌnxe che cletel, akine Cymane ex Cydiose; mya tuꞌn kꞌoj che cletel wuꞌne, mya tuꞌn xobl plech, mya tuꞌn spad, ex miꞌn che ajben chej mi ke xjal cyjax cyibaj chej, chi Kman te Oseas.

8 Tej tel tal txin Lo-ruhama tiꞌj tchꞌuꞌ, oc ten juntl tal Gomer ex ul itzꞌj juntl tal, kꞌa. 9 Tzajtzun tmaꞌntl Kman te Oseas: Lo-ami tbi tal kꞌa cꞌoquel tkꞌoꞌna, porque mya etzantl keye wuꞌne ex myatl Cydiose kine.

10 Tzul tkꞌijlalil tuꞌn cyoc aj Israel ic tzaꞌn ttxa tzꞌaꞌn ttzi mar, misicyer jun jacu bant tmalon tiꞌj ex mlay bant tajlanjtz. Mlay kꞌmanjtz cye tuꞌn Dios cyjaꞌ: Mya etzan keye wuꞌne, chiwt, nok oꞌcx cxel tmaꞌn Dios cye: Akeye tcꞌwaꞌl Dios itzꞌ. 11 Cꞌoqueltzun cychmon cyib aj Judá ex ke aj Israel ex cjawil cyscꞌoꞌn oꞌcxcu jun nejenel cyxol, ex tuj tcyakil part che tzajel tuꞌn cyul meltzꞌaj tuj Jerusalén. Maꞌxix toclen aju tkꞌijlalil Jezreel.