Aju mancbil tkꞌijlalil
12
Tujtzun tkꞌijlalil lu cbel tyecꞌun tib aju anjel maꞌ toclen Miguel tbi, aju in colin cyiꞌj ke t-xjalila. Aju tkꞌijlalil lu te nim cꞌixcꞌoj ex bis, naꞌnx tbaj jun maj icju atxix tej cycub xeꞌt ke nasyon. Oc tpon tkꞌijlalil lu, cycyakil ke t-xjalila tzꞌiban cybi tuj libro che cletel. 2 Nimcu xjal otok che cyim che jawil ankꞌin, junjun tuꞌn tten cychwinklal te jumajx, atzun ke mastl che elel tuj cychꞌixwi ex che elel icꞌun te jumajx. 3 Ke xjal at cynabl che koptzꞌajel ic tzaꞌn kꞌij twitz cyaꞌj, ex akeju in che xnakꞌtzan cye xjal tuꞌn cyoc te tzꞌaklxix che koptzꞌajel ic tzaꞌn ke cheꞌw twitz cyaꞌj tuj tcyakil tabkꞌiyil te jumajx.4 Aya Daniel, miꞌn tzꞌel tkanil jlu tuꞌna, ex kꞌonca jun sey tiꞌj libro lu tuꞌntzun miꞌn tjaket, maxi cjaketel oc tjapun mancbil tkꞌijlalil. Nimcu xjal che betjebel, ex aju cynabl xjal cchꞌiyil, chi anjel.
5 Akine Daniel o wiltle cabe xinak waꞌlkeꞌ, jun taj jlajxi nima ex jun tajtz jlajtzi, 6 ex jun cye xi tkanin teju xinak toc t-xbalun lino, aju waꞌl tcub tibaj nima: ¿Jtoj ban cyjapun ke techal lu, maꞌxix cyxilen? 7 Atzunte xinak toc t-xbalun lino e jaw tkꞌoꞌn ke tkꞌab twitz cyaꞌj ex tzaj tnaꞌn tbi Dios tiꞌj tyol, aju Dios itzꞌ te jumajx, ex tma: Tuj ox abkꞌi tucꞌ mey cwebel tuꞌn cyyajlanjtz ke xjal etzan tuꞌn Dios, ex atzun cjapunel tcyakil jlu.
8 O nbiye aju o tma pero mintiꞌ el nnicꞌe tiꞌj. Entons xi nkanine te: Nman, ¿titzun cbajel te tibajxi tcyakil jlu? 9 Atzunte tzaj ttzakꞌweꞌn: Daniel, kꞌoncu beya, porque tcyakil jlu il tiꞌj tuꞌn tten tuj ewaj ocxi tjapun baj mancbil tkꞌijlalil. 10 Octzun ttzaj yajbil cyiꞌj xjal, nimcu che oquel te tzꞌaklxix ex txꞌjomaj tuj cyanmi ex mintiꞌ cypaltil. Pero ke binchal mya baꞌn, cucx cbantel mya baꞌn cyuꞌn ex mlay tzꞌel cynicꞌ tiꞌj ju in baj, atzun cye xjal at cynabl, cꞌelel cynicꞌ tiꞌj tcyakil. 11 Te tibajxitzun ttzajlen tkꞌoꞌn rey orden tuꞌn miꞌn cyxi kꞌot ke chojbil, akeju in cheꞌx kꞌot cycyakil kꞌij, ex te tibajxi tocxlen rey tzꞌilsalte tuj tja Dios, atxtzun jun mil tucꞌ 290 kꞌij tuꞌn tjapun baj tcyakil. 12 At tzalajbil teju xjal in ayon ex cucx kꞌukl tcꞌuꞌj oc tjapun baj jun mil tucꞌ 335 kꞌij. 13 Atzun teya Daniel, cucx ttena tzꞌaklxix ocxi tcyima. Octzun tjapun baj mancbil tkꞌijlalil, cjawil ankꞌina tuꞌn tcꞌmonteya chojbil teya.