2 Ax icx tzaj tmaꞌntl anjel weye:

—Jaꞌlo cxel nyecꞌune teya aju axix toc. Che cawiltl ox rey tuj Persia, ex te tibajxi cꞌoquel tcyajin rey, ex cꞌoquel mas kꞌinun cywitz ke ox rey che tel nej. Octzun tchꞌiy tipumal tuꞌn tkꞌinumabl, cꞌoquel tkꞌoꞌn il cyiꞌj xjal tuꞌn cykꞌojin tiꞌj cawbil tuj tnam Grecia. 3 Pero te tibajxi ccawil jun rey at nim tnabl tuꞌn tkꞌojin, ccawil cyibaj nimcu nasyon ex cbantel tuꞌn nok alcyex tajbil. 4 Oc tcyuwsante tib, cnajel tcawbil ex te cyaje paꞌn cꞌelel, pero mya cye tcꞌwaꞌl cyjel ten aju cawbil lu, ex mlay pon tipumal ic tzaꞌn nej, porque otok baj paꞌn, ex junxitl che cawil te t-xel.

5 Aju rey te Ejipt ctel nimxix tipumal, pero at jun cyxol nejenel cye ke t-soldad ctel mas nim tipun ic tzaꞌn te; cꞌoquel nimxix tipun ex aju tcawbil cꞌoquel te maꞌxix. 6 Octzun tel junjun abkꞌi, aju rey te Ejipt ex aju rey te Siria cbantel tiꞌj jun cyyol cycabil, ex aju rey te Ejipt cxel tkꞌoꞌn tmeꞌjel tuꞌn tmojeꞌ tucꞌil rey te Siria, nok tuꞌn tten tzalajbil cyxol cabe nasyon. Pero aju ximbetz lu cnajel, porque tzaꞌnx te xuꞌj, ax icx tal, tucꞌix tchmil ex cyucꞌix keju at cyoclen ttxlaj che bel byoꞌn. 7 Pero at jun cyxol ke tiyjil xuꞌj lu cꞌoquel tzokpaj cyiꞌj ke soldad te Siria, ctzyetel lugar te tcolbil tib rey tuꞌn, ex akeju t-soldad ctel cyipun ex cbel cyiꞌj ke soldad te Siria cyuꞌn. 8 Ax icx che xel tiꞌn ke tilbilal nnoꞌc cydiosin xjal, cyucꞌix ke tilbilal binchamaj tiꞌj cꞌuxbil nnoꞌcx kꞌot tuj kꞌakꞌ tuꞌn tcub ulj, junx cyucꞌil txkantl macbil wiꞌyilxix kꞌan pwak ex sak pwak cytxꞌotxꞌil, tuꞌn cypon tiꞌn tuj Ejipt. Ex tuj junjun abkꞌi mintiꞌ kꞌoj cꞌoquel cyxol cabe nasyon lu, 9 aju rey te Siria cꞌoquel tzokpaj tiꞌj tcawbil rey te Ejipt, pero jurat cꞌajel meltzꞌaj tuj ttanmi.

10 Cbantel cyten ke tcyꞌajal rey te Siria tuꞌn cykꞌojin ex cbantel cyten nimxix soldad cyuꞌn. Jurattzun naj ctzajel jun tcyꞌajal cyucꞌil ke t-soldad tuꞌn ttzyet ju cawbil tuj Ejipt tuꞌn; cnajel tcyakil tuꞌn ic tzaꞌn tuꞌn jun nima otok chꞌiy wen, ex te tibajxi cꞌajetz meltzꞌaj tuꞌn toc tzokpaj tiꞌj lugar te tcolbil tib rey te Ejipt. 11 Tuꞌnju cyocxlen tzokpaj ke soldad te Siria, ctzajel nimxix tkꞌoj rey te Ejipt, cꞌeletz kꞌojlel cyiꞌj soldad te Siria nimxix cyajlal, ex biꞌx che najel tuꞌn te jumajx. 12 Tcublenxi cyiꞌj tuꞌn, ex cycyimlenxi elaꞌ mil soldad te Siria tuꞌn, cjawil tniman tib, pero aju tipumal mlay ten nim tyemp. 13 Aju rey te Siria cꞌoquel tchmoꞌn juntl maj ke t-soldad mas nim cybaj ic tzaꞌn nej, ex tbajlenxi junjun abkꞌi cꞌoquel tzokpaj juntl maj tiꞌj rey te Ejipt, cyucꞌil nimxix soldad kꞌiꞌmlex cymacbil in che ajben tuj kꞌoj.

14 Octzun tbant jlu, nimcu xjal cjawil cyiꞌn cyib tiꞌj rey te Ejipt. Cyxol ke jlu at junjun xinak aj Israel puro mya baꞌn ke, cjawil cyiꞌn cyib tiꞌj tuꞌntzun tjapun aju tzaj yecꞌun teya tuj witzicꞌ, pero mlay che camban ke. 15 Ctzajeltzun rey te Siria ex cjawil tbinchaꞌn junjun waꞌlbil tiꞌjele tnam toc muro tiꞌj tuꞌntzun wen tocx, ex cbel tiꞌj tuꞌn. Mi ke mejor soldad te Ejipt mlay che weꞌ cywitz ke aj kꞌoj lu. 16 Aju rey lu oc tbinchaꞌ nok alcye tajbil ex mi aꞌl jun jacu tnimari tib tuꞌn tkꞌojin tucꞌil. Cyjel ten tuj lugar tbanil txꞌotxꞌ tbi ex aju txꞌotxꞌ lu cyjel ten tjakꞌ tcawbil. 17 Ax icx cbantel tten tuꞌn ttzyet tcyakil txꞌotxꞌ Ejipt tuꞌn; cbantel jun ttrat tucꞌil rey lu ex cxel tkꞌoꞌn tmeꞌjel te t-xuꞌjil, tuꞌntzun tcamban tiꞌj txꞌotxꞌ Ejipt, pero aju t-ximbetz lu mlay japun. 18 Te tibajxi cꞌoquel tzokpaj cyiꞌj ke tnam ateꞌ tuj mlaj txꞌotxꞌ, ex nimcu cye ke tnam lu che tzyetel tuꞌn, pero ctzajel tchꞌixwi tuꞌn jun nejenel cye soldad te juntl nasyon, ex tibajx ctzajel mya baꞌn. 19 Entons cꞌajel meltzꞌaj tuꞌn tpon tuj lugar te tcolbil tib tuj ttanmi, pero cbel tiꞌj ex cbel byoꞌn.

20 Cꞌoquel juntl rey te t-xel, ex ate rey lu cxel t-samaꞌn jun xjal peyil chojenj tuꞌntzun tchmet tkꞌinumabl tuj tcawbil, pero nok nicꞌxi kꞌij ctel, jurat cbel byoꞌn, masque mya tuj kꞌoj cymel.

21 Te tibajxi jlu, cꞌoquel juntl rey puro icꞌbilxix mintiꞌtok toclen tuꞌn toc te rey, pero nok minaben ctzyetel cawbil tuꞌn nok tuꞌn sbubl. 22 Ke soldad in che kꞌojin tiꞌj che najel te jumajx tuꞌn, ax icx cbel tbyoꞌn aju nejenel cye pal. 23 Ax icx che bel t-sbun keju otok bant tiꞌj jun cyyol tucꞌil, ex masque mya nim xjal ctel tucꞌil, pero a ccambal. 24 Mi aꞌltok jun bilte oc tocx tuj txꞌotxꞌ mas kꞌinunxix, ex oc tbinchaꞌ aju mintiꞌ o tbincha jun cyxol ke t-xeꞌchel. Aju kꞌinumabl otok tzꞌel cyiꞌn tuj kꞌoj, cbel t-sipan cyxol ke t-soldad, ex cbajel t-ximan tzaꞌn tten tuꞌn toc tzokpaj cyiꞌj ke tnam toc muro cyiꞌj, pero nok nicꞌxi tyemp ctel.

25 Tucꞌil nim tipumal ex cyuw tcꞌuꞌj, cꞌoquel tzokpaj tiꞌj rey te Ejipt cyucꞌil nimcu soldad ucꞌin tuꞌn. Atzunte rey te Ejipt cꞌeletz cyucꞌil nimcu t-soldad nimxix cyipun ex cꞌoquel ten kꞌojlel tiꞌj, pero nok minaben cbel tiꞌj tuꞌn sbubl ex mlay xcyeꞌ cyiꞌj aj kꞌoj. 26 Ax keju otok che tzaj ttxcoꞌn tuꞌn cywaꞌn tucꞌil, cbantel tiꞌj cyuꞌn tuꞌn tnaj tcawbil, ake t-soldad cbel cyiꞌj ex nimcu che najel. 27 Akeju cabe rey lu nok oꞌcx che ximal tiꞌj tuꞌn cybinchante mya baꞌn jun tiꞌj juntl; che bel keꞌ tiꞌj jun mes tuꞌn cyyolin ex cycabil che nicꞌal yol, pero mi jun cye cjapunel t-ximbetz, porque naꞌnxtok tuꞌn tpon or. 28 Aju rey te Siria cꞌajel meltzꞌaj tuj ttanmi tucꞌil tcyakil kꞌinumabl otok tzꞌel tiꞌn tuj kꞌoj, ex tuꞌnju in kꞌojl tiꞌj tnam scꞌoꞌmaj tuꞌn Dios, entons cjapunel aju otok cub t-ximan, ex te tibajxi cꞌajel meltzꞌaj tuj ttanmi. 29 Octzun tpon tkꞌijlalil banimaj tiꞌj, cꞌoquel tzokpaj juntl maj tiꞌj rey te Ejipt, pero tuj kꞌoj lu mlay camban ic tzaꞌn tnejel maj. 30 Che ul ke barc, kꞌiꞌn ke soldad cyuꞌn tzajnike tuj telex kꞌij, ex che oquel tzokpaj tiꞌj, ctzajel nim t-xobil ex cꞌelel ok. Ctzajeltzun nimxix tkꞌoj tiꞌj tnam scꞌoꞌmaj tuꞌn Dios, ex oc tbinchaꞌ nok alcye tajbil cyiꞌj, atzun keju otok cyaj cycolin aju yol cyaj bant tiꞌj tuꞌn Dios cyucꞌil nok tuꞌn cyajben te, oc tbinchaꞌ baꞌn cye.

31 Ke t-soldad cbajel cytzꞌilsaꞌn tuj tja Dios tuꞌn mya baꞌn, tucꞌix ju ja jatum nnoꞌcx cyclon cyib xjal, ex cmayetel cyuꞌn tuꞌn miꞌn cyxi kꞌot ke chojbil akeju in cheꞌx kꞌot tcyakil kꞌij, ex ax tuj tja Dios cꞌoquex cykꞌoꞌn jun tilbilal icꞌbilxix. 32 Cꞌoquel tilil tuꞌn rey tuꞌn cycambet tucꞌil xmoxbil akeju otok tzꞌel cypaꞌn cyib tiꞌj yol otok cyaj bant tiꞌj tuꞌn Dios cyucꞌil, atzun keju kꞌukl cycꞌuꞌj tiꞌj Dios che tel waꞌlxix ex miꞌn txi cyniman tyol. 33 Ke xjal at cynabl cyxol t-xjalila cxel cykꞌoꞌn xnakꞌtzbil cye nimcu xjal, pero tzul jun tkꞌijlalil che bel byoꞌn, che bel patun, cxel elkꞌaꞌn tcyakilju at cye ex at junjun che oquel te majen cyuj txꞌotxꞌ mintiꞌ ojtzkiꞌn cyuꞌn, pero nok nicꞌxi tyemp ctel jlu. 34 Octzun tpon tkꞌijlalil oc ttzaj yajbil, oc cycꞌmaꞌ chꞌin onbil ex nimcu cꞌoquel cymojban cyib cyucꞌil, pero nok tten cyuꞌn. 35 Ax icx che bajel yajlaꞌn junjun cye keju che kꞌolte cynabl tnam xjal. Aju joybil cyiꞌj cꞌajbel tuꞌn t-sakix tuj cyanmi ex tuꞌn cyten mintiꞌ cypaltil ocxi tpon mancbil tkꞌijlalil banimaj tiꞌj.

36 Cbantel tcyakil tuꞌn rey nok alcye tajbil, cjawil tniman tib, cꞌoquel tkꞌon tib te maꞌ toclen cywitz cycyakil dios nnoꞌc cydiosin xjal, ex cꞌoquel ten yolil mya baꞌn tiꞌj Dios axix toc. Tcyakil baꞌn cꞌelel te ocxi ttzaj t-samaꞌn Dios tcastiw, porque aju at tuꞌn tbant tuꞌn Dios, cbantel tuꞌn. 37 Cꞌelel ticꞌun rey lu cydios ke t-xeꞌchel, cyucꞌix ke dios in che cꞌulun xuꞌj cywitz, cyucꞌix mastl dios nnoꞌc cydiosin xjal, porque cꞌoquel tkꞌon tib te maꞌxix toclen cywitz cycyakil. 38 Masque icju, pero cꞌoquel ten cꞌulul twitz jun dios tuj twitz ka tuꞌn oc cletel, aju dios lu mintiꞌ ojtzkiꞌn cyuꞌn ke t-xeꞌchel, ex cxel toyin kꞌan pwak te, tucꞌix sak pwak, cyucꞌix ke tal abj tbanilxix, cyucꞌix ke oyaj wiꞌyilxix. 39 Tuꞌnju onbil tuꞌn jun dios mintiꞌ ojtzkiꞌn cyuꞌn xjal, cꞌoquel tzokpaj kꞌojlel cyiꞌj ke ja te cycolbil cyib xjal, ex cꞌoquel tkꞌoꞌn cyoclen xjal te maꞌxix, akeju in cymaꞌn ka ate jlu rey, ex cxel tkꞌoꞌn cytxꞌotxꞌ te chojbil cye.

40 Octzun tpon mancbil tkꞌijlalil, aju rey te Ejipt cꞌoquel tzokpaj tiꞌj rey te Siria, pero aju rey te Siria cꞌeletz ic tzaꞌn cykꞌikꞌ jbal ex cꞌoquel tzokpaj tiꞌj rey te Ejipt; cꞌeletz cyucꞌil ke tcarwaj in che ajben tuj kꞌoj, cyucꞌix ke t-soldad cyjax cyibaj chej, ex nimcu barc. Cꞌicꞌel cyuj nimcu nasyon ic tzaꞌn jun nima nneꞌx tilj tuj tbe oc tchꞌiy wen. 41 Ax icx cꞌoquex tuj txꞌotxꞌ toc tbi Txꞌotxꞌ Tbanilxix ex cbel cyiꞌj nimcu nasyon tuꞌn, pero ke xjal najl tuj Edom, tuj Moab ex mas mijcu cye keju najl tuj txꞌotxꞌ Amón che cletel. 42 Ctzyetel txkantl nasyon tuꞌn, ax icx te Ejipt mlay cyaj clet. 43 Cxel tiꞌn nimcu kꞌinumabl kꞌan pwak, sak pwak, ex cycyakil ke macbil tbanilxix ateꞌ tuj Ejipt. Ax icx cbel cyiꞌj ke nasyon Libia ex Etiopía tuꞌn. 44 Pero ctzajel t-xobil tuꞌn jun tkanil ctzajel tuj tjawitz kꞌij ex tuj txꞌotxꞌ tuj tbankꞌab kꞌij, cꞌajel meltzꞌaj tucꞌil nim ttxꞌuꞌjil ex che bel tbyoꞌn nimcu xjal. 45 Atzun cbel ten tcampament cyxol mar tucꞌil witz xjan ex tbanilxix. Pero cpol or tuꞌn tcyim ex mi aꞌl jun cꞌonil tiꞌj.