2 Cyuj ke tkꞌijlalil lu, akine Daniel nimxix o chin bisune tuj ox seman. 3 Mintiꞌ xi nchyoꞌne jun tiꞌxti mas tbanil, mintiꞌ xi nchyoꞌne chibj, mintiꞌ xi ncꞌane taꞌl twitz uva ex mintiꞌ oc nkꞌoꞌne perjum wiꞌje, tejxi tbaj ox seman. 4 Tuj 24 tajlal tnejel xjaw te abkꞌi, atintoke ttzi matij nima Tigris. 5 Nok minaben xi nqueꞌyine ex o wile jun xinak toc t-xbalun lino ex toc jun cꞌalbil tcꞌuꞌj puro kꞌan pwak tbanilxix. 6 Aju t-ximlal in koptzꞌaj ic tzaꞌn tal abj topacio, aju twitz in koptzꞌaj wen mer ic tzaꞌn xleꞌlaj cyaꞌj, ke tbakꞌ twitz ic che queꞌyin ic tzaꞌn ttxaꞌn tzaj in cꞌant, ke tkꞌab ex ke tkan in che koptzꞌaj ic tzaꞌn kꞌan cꞌuxbil, ex aju tkꞌajkꞌajel twiꞌ in kꞌajt ic tzaꞌn tkꞌajkꞌajel cywiꞌ nim xjal.

7 Oꞌcx akine o wile jlu ic tzaꞌn tuj witzicꞌ; akeju xinak ateꞌtok wucꞌile mintiꞌ o cyil, tuꞌnju tzaj nimxix cyxobil ex e jeꞌl ok tuꞌn t-xi cyewan cyib. 8 Njunalxtoke atine tej ttzaj yecꞌun jlu weye ic tzaꞌn tuj witzicꞌ, ex puro spelin in oque ex in cyaj tene mintiꞌtl wipune. 9 Tejtzun nbinteye tej toc ten yolil, in cub mutzkꞌaje ex in icꞌ tane. 10 At jun kꞌabaj tzaj tzyunte weye ex in jaw wabane tuꞌn, tejxi njaw txaqueꞌye, 11 ex tzaj tmaꞌn weye: Aya Daniel aju cꞌujlaꞌnxix tuꞌn Dios, chebaxix bintza aju cxel nmaꞌne teya: Weꞌctza, porque ma chin tzaj samaꞌne tucꞌila, chi weye.

Tej tbaj tmaꞌn ke yol lu, in jawtzun weꞌye in chin luꞌlune wen. 12 Tzajtzun tmaꞌn weye cyjaꞌ: Aya Daniel miꞌn xoba, porque atxix tuj tnejel kꞌij tej o tajbeya tuꞌn tel tnicꞌa cyiꞌj ke tiꞌxti cyuwxix cyxilen ex tej tcub tmansin tiba twitz Tdiosa, o tbi Dios aju tcubsbila ex cyjaꞌtzun ma chin tzaje tucꞌila. 13 Aju juꞌẍ nejenel in cawin tibaj nasyon Persia oc tzokpaj wiꞌje tuj 21 kꞌij, pero ate Miguel, jun cye keju anjel maꞌxix cyoclen, ul onil weye, porque njunaltoke otok chin cyaj tene cytxlaj ke rey te Persia. 14 Ma chin tzaje tucꞌila tuꞌn t-xi nmaꞌne teya aju cbajel cyiꞌj t-xjalila te tibajxi, porque aju o tzaj yecꞌun teya ic tzaꞌn tuj witzicꞌ, atzun in yolin tiꞌj mancbil tkꞌijlalil.

15 Tej in kꞌmantok ke yol lu, atzun weye nok cyjaꞌ cub nqueꞌyine twitz txꞌotxꞌ ex mintiꞌ jun yol xi nmaꞌne. 16 Pero at jun ic queꞌyin ic tzaꞌn jun xinak oc maconte ntziꞌye. Xitzun nmaꞌne teju waꞌl tcub nwitze: Tat, ma tzaj nimxix nbise tuꞌn tlaj ju ma wile ex ma chin cyaj tene mintiꞌ wipune tuꞌn. 17 ¿Tzaꞌn tten tuꞌn nyoline tucꞌila, akine tmajena? Jumajx ma tzꞌel baj wipune ex mintiꞌtl in jawil nxewe, nchiye.

18 Ex aju ictok queꞌyin ic tzaꞌn jun xinak in oc tmacoꞌn juntl maj, tzaj tkꞌoꞌn acꞌaj wipune, 19 ex tzaj tmaꞌn weye: Miꞌn xoba ex miꞌn bisuna. Cꞌujlaꞌnxixa tuꞌn Dios, cyuwx tcꞌuꞌja ex tenx tipuna, chi xinak.

Acux in yolin wucꞌile, o nnaꞌye cyjaꞌtok toc wipune ex xi nmaꞌne: Tat, chux yolina wucꞌile porque ma tzaj tkꞌoꞌna juntl maj wipune. 20 Tzajtzun tmaꞌn weye cyjaꞌ: ¿Baꞌnpe tuꞌna tikuꞌn ma chin ule tucꞌila? Porque jaꞌlo chin ajel meltzꞌaje juntl maj kꞌojlel tucꞌil ju juꞌẍ nejenel in cawin tibaj nasyon Persia. Ex octzun nbaj kꞌojine tucꞌil, ctzajel aju juꞌẍ nejenel in cawin tibaj nasyon Grecia. 21 Jaꞌlo cxel nmaꞌne teya aju tzꞌiban tuj ju libro axix toc. Tuj kꞌoj nnoꞌc wuꞌne cyucꞌil, oꞌcxcu a Miguel in onin wiꞌje, aju anjel in colin cyiꞌj aj Israel.