Nman Dios, maꞌxix toclena ex xobajilxixa, in japun tuꞌna tcyakilju yol in tzaj ttziyana, ex in tzaj kꞌakꞌan tcꞌuꞌja cyiꞌj keju in che cꞌujlan teya ex in che japun ke tmandamyenta cyuꞌn: 5 Ma ko binchane il, ma kbinchaye mya baꞌn, ma kbinchaye aju puro ploj, ma tzꞌel kpaꞌn kibe tiꞌja, mintiꞌ ma txi knimane tmandamyenta ex tleya. 6 Mintiꞌ ma txi knimane cyyol ke tmajena akeju t-sanjela, akeju e tzaj t-samaꞌna tuꞌn cyyolin cye ke kreye, cye ke nejenel keye, cye ke kxeꞌchele ex cye cycyakil tnam xjal aj Israel. 7 Aya Nman tzꞌaklxixa, atzun keye, akoꞌye aj Israel, ma tzaj kchꞌixwiye jaꞌlo, tzaꞌnx ke aj Judá ex keju najlke tuj Jerusalén, ax icx cycyakil aj Israel, akeju ateꞌ nikayin ex akeju ateꞌ najchak cyuj ke mastl nasyon jatum o che pon tkꞌoꞌna tuꞌn tlaj il o cybincha twitza. 8 Atzun keye Nman, ma tzaj kchꞌixwiye, ax icx ke kreye, ke nejenel kxole ex ke kxeꞌchele, tuꞌnju ma ko binchane il twitza. 9 Atzun teya Nman Dios, at nim tkꞌakꞌbil tcꞌuꞌja ex in cub tnajsaꞌna kile masque ma tzꞌel kpaꞌn kibe tiꞌja, 10 mintiꞌ ma txi kbiꞌne tyola Nman Dios, ex mintiꞌ ma txi knimane tleya, aju tzaj cymaꞌn ke tmajena akeju t-sanjela. 11 Cycyakil aj Israel ma che icꞌ tibaj tleya ex mintiꞌ ma txi cyniman tyola; cyjaꞌtzun ma tzaj castiw lu kibaje, porque ma japun aju yol axix toc tzaj tmaꞌna, aju tzꞌiban tuj tley Moisés aju tmajena, porque ma ko binchane il twitza. 12 Tej ttzaj t-samaꞌna nimxix mya baꞌn kibaje, atzun ma japun aju tyola tzaj tmaꞌna kiꞌje ex cyiꞌj keju e cawin kibaje; bajx tzaj jun castiw maꞌxix twitz txꞌotxꞌ ic tzaꞌn jlu, ic tzaꞌn ju ma tzaj tibaj tnam Jerusalén. 13 Tcyakilju mya baꞌn ma tzaj kibaje lu, ma japun ic tzaꞌnx tzꞌiban tuj tley Moisés, pero naꞌnx koc tene jyolte onbil tucꞌila tuꞌn tel knicꞌe tiꞌj tyola axix toc, ex naꞌnx tcyaj kcoline tuꞌn kbinchane mya baꞌn. 14 Cyjaꞌtzun Nman Dios, ma tzaj t-samaꞌna castiw lu kibaje, porque teya tzꞌaklxixa tuj tcyakilju in bant tuꞌna, atzun keye mintiꞌ ma txi knimane tyola.

15 Nman Dios, o txi tyecꞌuna tipumala maꞌxix tej cyetz tiꞌna ke xjal tuj Ejipt, akeju etzan tuꞌna, ex biꞌx cyaj bant ojtxi tuꞌn cyyolin xjal baꞌn tiꞌja ex cucx jaꞌlo, atzun keye ma ko binchane il ex ma bant ju mya baꞌn kuꞌne. 16 Nman, baꞌn kuꞌne at xtalbil tucꞌila, cyjaꞌtzun miꞌn cucx tkꞌojina ex miꞌn cucx ttzaj ttxꞌuꞌjila tiꞌj tnam Jerusalén, porque aju tnam lu etzan tuꞌna ex teya aju witz xjan. Cycyakil xjal najlke cyuj ke tnam nikayin ateꞌ in che xmayin tiꞌj tnam Jerusalén ex cyiꞌj ke xjal etzan tuꞌna, tuꞌn tlaj kile ex tuꞌn tlaj cyil ke kxeꞌchele. 17 Jaꞌlotzun Kman Dios, bintza nyole ex nkanbetze akine tmajena, queꞌyintza tjaya puro bisbajilxix taꞌ, ex kꞌakꞌantz tcꞌuꞌja tiꞌj, tuꞌntzun tjaw nimsaꞌn tbiya. 18 Nman Dios, txalbantz twiꞌya ex bintza, queꞌyintza aju xitbil ma tzaj kiꞌje ex tiꞌj ju tnam etzan tuꞌna. Mintiꞌ in ko cubsane twitza tuꞌnju baꞌn koꞌye, nok oꞌcx tuꞌnju at nim tkꞌakꞌbil tcꞌuꞌja. 19 Ko tbintza Nman ex najsama kile. Binchama kiꞌje Nman ex tzaja onil keye tuꞌntzun tjaw nimsan tbiya; miꞌn ayona mastl kꞌij Nman, porque teya aju tnam lu cyucꞌix tnam xjal etzan ke tuꞌna.

20 Tej cucxtok nnaꞌne Dios, ex tej cucxtok tjatz npaꞌn wile, ex tej cucxtok t-xi nmaꞌne te Dios aju il otok cybincha ke nxjalile aj Israel, ex tej cucxtok ncubsane twitz Kman aju Ndiose tiꞌj ju witz xjan etzan tuꞌn, 21 ex tej matok in chin naꞌne Dios, aju anjel Gabriel tbi, aju otok cub tyecꞌun tib nwitze nej ic tzaꞌn tuj witzicꞌ, ul lipan jatum atine tej chꞌixtok tpon or tuꞌn t-xi kꞌot ju chojbil te Dios, aju in xi kꞌot tcyakil kale, 22 ex tzaj tchicꞌbaꞌn weye, chi cyjaꞌ:

—Daniel, lu kine ma chin ule tucꞌila kꞌol tnabla ex tojtzkibla. 23 Tej xkeꞌ tnaꞌna Dios, ate Dios ma tzaj tzakꞌwente teya. Ma chin tzaje kꞌmalte teya aju taj Dios tuꞌn tbinteya, porque cꞌujlaꞌnxixa tuꞌn. Jaꞌlotzun chebaxix bintza aju cxel nmaꞌne teya, tuꞌntzun tel tnicꞌa tiꞌj aju ma tzaj yecꞌun teya ic tzaꞌn tuj witzicꞌ.

24 O bant tiꞌj tuꞌn tjapun 70 seman cyibaj ke t-xjalila ex tibaj ttanmiya xjan, tuꞌntzun tnaj aju mya baꞌn ex il, tuꞌn tbaj chjet il ex tuꞌn t-xeꞌt jun cawbil tuj tumelxix te jumajx, tuꞌntzun tjapun aju o kꞌmanjtz cyuꞌn ke t-sanjel Dios ex tuꞌn toc kꞌoꞌn toclen aju Xjal Mas Xjanxix. 25 Il tiꞌj tuꞌn tbinteya jlu ex tuꞌn tel tnicꞌa tiꞌj: Ocxi tetz orden tuꞌn tjaw binchet juntl maj tnam Jerusalén, ex maxi oc tul ju Nejenel aju ctzajel kꞌoꞌn toclen, cꞌelel wuk seman tucꞌix juntl 62 seman. Che bajel binchet juntl maj ke cay ex ju muro, pero tuj tkꞌijlalil mya baꞌn. 26 Tbajlenxitzun 62 seman, cbel byoꞌn aju nejenel otok tzꞌoc kꞌoꞌn toclen ex mi jun ccolil tiꞌj. Atzunju tnam Jerusalén tucꞌix tja Dios che bel xitun cyuꞌn t-soldad jun rey tzul; jurat cbajel naj tnam tuꞌn, ic tzaꞌn nnuꞌl tilj jun nima, ex cucx ctel kꞌoj max te mancbil ex cucx ctel xitbil ic tzaꞌn banimaj tiꞌj. 27 Ex oc ttzyet juntl seman, cbantel tiꞌj jun tyol rey cyucꞌil nimcu xjal, pero tuj tmijil seman cmayetel tuꞌn, tuꞌn miꞌn t-xi kꞌot chojbil ex oyaj. Ex ax tuj tja Dios cꞌoquex tkꞌoꞌn jun tilbilal icꞌbilxix. Aju xjal lu cucx cbinchal mya baꞌn maxi oc tnaj, ic tzaꞌn banimaj tiꞌj.