Daniel 8

Aju witzicꞌbaj tiꞌj tman ẍneꞌl ex tman chip

Tuj toxin abkꞌi ttzyetlen tcawin rey Belsasar, akine Daniel at juntl o wile ic tzaꞌn tuj witzicꞌ, te tibajxi aju otok tzaj yecꞌun weye nej. 2 Tuj nwitze mer ic tzaꞌn atine tuj nintz tnam Susa, aju tnam mas maꞌ toclen cyxol mastl tnam tuj txꞌotxꞌ Elam, ex ic tzaꞌn a atine ttzi nima Ulai. 3 Xi nqueꞌyine ex o wile jun tman ẍneꞌl at ttzi nima, at cabe tcach nmak ke, pero mas yajxi tzaj chꞌiy jun ex mas maꞌ oc twitz tnejel. 4 O wile aju tman ẍneꞌl lu in jaw ttacoꞌn tcach tuj telex kꞌij, tuj tbankꞌab kꞌij ex tuj tnayaj kꞌij ex mi aꞌl juntl txcup jacu xcyeꞌ tiꞌj ex mi tuꞌn tcolpaj tuꞌn, tuꞌnju at nimxix tipun. In tbinchaꞌntok tman ẍneꞌl nok alcye baꞌn tuj twitz ex cyjaꞌ toc mastl tipun.

5 Cucxtok in ximane tiꞌj jlu, tej twile cyjaꞌ ttzaj jun tman chip tuj telex kꞌij, in kelan wen mer ic tzaꞌn mintiꞌ in che cub aj tkan twitz txꞌotxꞌ. Aju tman chip lu, attok jun nintz tcach cyxol ke tbakꞌ twitz. 6 Tej tpon jatum taꞌtok tman ẍneꞌl at cabe tcach, aju otok wile ttzi nima, xi kelan tacolte tuꞌn tcyakil tipun, 7 ex biꞌx e jeꞌl tokj ke cabe tcach tman ẍneꞌl tuꞌn ex mintiꞌ o ten tipun tuꞌn tkꞌojin tucꞌil. Biꞌx pon tzꞌak tman ẍneꞌl tuꞌn twitz txꞌotxꞌ ex baj twaban ex mi jun o colin tiꞌj tman ẍneꞌl.

8 Aju tman chip oc nimxix tipun, pero tej toc mastl tipumal etz kꞌulpaj tcach ex e tzaj chꞌiy cyajetl tcach te t-xel. Aju cyaje tcach lu xi cyumlaꞌn tcyajil pacꞌ twitz txꞌotxꞌ. 9 Tiꞌj jun cyxol keju cyaje cach lu, el jlet jun titzꞌin ex o chꞌiyxix wen, pon canun max tuj tnayaj kꞌij, tuj tjawitz kꞌij ex tuj lugar Tbanil Txꞌotxꞌ tbi. 10 Aju cach lu o chꞌiyxix wen ex pon canun twaꞌl max cyxol ke cheꞌw twitz cyaꞌj, biꞌx e tzaj tzꞌak junjun cheꞌw tuꞌn ex e baj twaban, 11 ax icx oc tkꞌoꞌn tib te mas maꞌ toclen twitz ju Nejenel cye keju ateꞌ tuj cyaꞌj ex tuꞌn o mayet, tuꞌn miꞌn t-xi kꞌoꞌn aju chojbil in xi kꞌoꞌn cycyakil kꞌij, ex baj t-xitun aju at tuj tja Dios. 12 Ex tuꞌnju mya baꞌn cybincha junjun xjal, ke xjal etzan tuꞌn Dios tucꞌix ju chojbil, e jeꞌx kꞌoꞌn tuj tcwent ju yajlal cye; ex aju tley Dios axix toc oc tkꞌoꞌn te mintiꞌ tajben. O tbincha ic tzaꞌnx tajbil, ex baꞌn ela tcyakil te.

13 Te tibajxi, o nbiye xi tkanin jun anjel te juntl anjel: ¿Jtoj ban tjapun baj tyemp tiꞌj ju mya baꞌn in binchanjtz tibaj altar jatum in cub patit chojbil tcyakil kꞌij? ¿Jteꞌ kꞌij ctel aju il xobajilxix, tuꞌn cybaj yajlaꞌn ke ocslal ex tuꞌn tbaj waban ju ja te cꞌulbil te Kman cyuꞌn xjal? 14 Atzunte juntl anjel xi ttzakꞌweꞌn: Maxi oc tjapun cab mil tucꞌ ox syent kꞌij. Te tibajxitzun jlu, aju ja te cꞌulbil te Dios cbajel sakset juntl maj, chi anjel.

15 Akine Daniel, tej matok in chin queꞌyine tiꞌj ex in chin ximantoke tiꞌj tuꞌn tel nnicꞌe tiꞌj ti t-xilen, minaben cub tyecꞌun tib nwitze jun ic queꞌyin ic tzaꞌn jun xjal, 16 ex o nbiye tkꞌajkꞌajel twiꞌ jun xjal tzaj kꞌajt tiꞌjxi nima Ulai in tmaꞌn: Gabriel, chicꞌbanxa teju xinak lu ti t-xilen aju ma tzaj yecꞌun te.

17 Atzunte pon lakꞌeꞌ ntxlaje ex biꞌx in secꞌpaje tuꞌn ex in cub ẍmejeꞌye tejxi tpon tacl tibaj nwitze max twitz txꞌotxꞌ, atzunte tzaj tmaꞌn weye: Aya xinak, tzꞌelx tnicꞌa tiꞌj aju ma tzaj yecꞌun teya, atzun in yolin tiꞌj bajsbil tkꞌijlalil.

18 Tej matok in yolin wucꞌile, in cub mutzkꞌaje twitz txꞌotxꞌ ex in icꞌ tane, atzunte oc tmacoꞌn kine ex in jaw wabane tuꞌn, 19 ex tma: Cxel nchicꞌbaꞌne teya aju cbajel oc tjapun baj tkꞌijlalil ttxꞌuꞌjil Dios, porque aju witzicꞌbaj lu, atzun in yolin tiꞌj bajsbil tkꞌijlalil.

20 Aju tman ẍneꞌl at cabe tcach, atzun in yolin cyiꞌj ke rey te Media ex te Persia. 21 Atzunju tman chip, atzun in yolin tiꞌj rey te Grecia, ex aju tcach ma tij tetz cyxol ke tbakꞌ twitz, atzun tnejel rey te Grecia. 22 Aju cyaje tcach e tzaj chꞌiy tej tjaw tokj tnejel tcach, atzun t-xilen: Tujx nasyon lu che jawil jlet cyaje cawbil, pero mlay pon cyipumal ic tzaꞌn tipumal tnejel rey.

23 Octzun tpon baj tkꞌijlalil tuꞌn cycawin ke rey lu, ex otok chmet nimxix il cyxol xjal, at jun rey jawni twitz ex cye sbun, cꞌoquel te cawil. 24 Cꞌoquel te maꞌxix tipumal, pero mya tuꞌn tex tipun. Nimcu cbajel t-xitun, ex tcyakil baꞌn cꞌelel te. Che bel tbyoꞌn ke xinak maꞌ cyoclen, ex ke xjal etzan tuꞌn Dios che najel tuꞌn. 25 Nok tuꞌnju jawni sbun, ccambal. Cjawil tniman tib ex nok minaben che bel tbyoꞌn nimcu xjal. Cꞌoquel ten kꞌojlel tiꞌj Nejenel cye cycyakil cawil, pero biꞌx cnajel, masque mya cyuꞌn xjal.

26 Aju ma tzaj yecꞌun teya ic tzaꞌn tuj witzicꞌ tiꞌj cab mil tucꞌil ox syent kꞌij, axix toc jlu, pero miꞌn tzꞌel tkanil tuꞌna, porque cjapunel ocxi tel nim kꞌij.

27 Akine Daniel o nnaꞌye ya mintiꞌtl wipune, ex biꞌx in yabte cab ox kꞌij. Te tibajxi ul nnable ex in akꞌnane tiꞌj akꞌuntl te rey. Nim in oc tene ximal tiꞌj ju otok tzaj yecꞌun weye, porque mintiꞌ el nnicꞌe tiꞌj.