Aju witzicꞌbaj cyiꞌj cyaje txcup
7
Tuj tnejel abkꞌi ttzyetlen tcawin Belsasar tuj Babilonia, tej coẍltok Daniel twi twatbil, oc jun twitzicꞌ ex tzaj yecꞌun nimcu te ic tzaꞌn tuj witzicꞌ, ex cub ttzꞌiban aju mas il tiꞌj otok til, chi cyjaꞌ: 2 Tuj nwitzicꞌe ma wile aju cyaje cykꞌikꞌ in che xupin ex in pulwin nintz mar cyuꞌn. 3 Ex minaben o wile cyaje nintz txcup, part che queꞌyin, e jatz tuj mar. 4 Aju tnejel txcup ic queꞌyin ic tzaꞌn jun balun, pero at t-xicꞌ ic tzaꞌn t-xicꞌ tꞌiw. Matok in chin queꞌyine tiꞌj tej ẍe el bakoꞌn ke t-xicꞌ, jaw waban, oꞌcx ke tkan, e cub waleꞌ twitz txꞌotxꞌ ic tzaꞌn jun xjal, ex oc tnabl ic tzaꞌn tnabl jun xjal.5 Aju tcabin txcup ic queꞌyin ic tzaꞌn jun oso; jun pacꞌ ttxlaj mas maꞌ tjaw twitz juntl, ex jacun ox tbakil xuꞌcbaj tuꞌn, ex o nbiye tej t-xi kꞌmaꞌn te: Weꞌctza ex chyoꞌna tiꞌj chibj nok nicꞌpunx jacu baj tuꞌna.
6 Aju toxin txcup ic queꞌyin ic tzaꞌn jun tigre, pero at cyaje t-xicꞌ ttzal tiꞌj; ax icx o wile at cyaje twiꞌ, ex xi kꞌoꞌn toclen tuꞌn tcawin.
7 Aju tcyajin txcup o wile ic tzaꞌn tuj witzicꞌ nnoꞌc konicꞌan, puro xobajilxix, at nim tchiylal ex nim tipun wen. Matijxix ke twitz teꞌ ex puro cꞌuxbil ke; tcyakil in baj tpachꞌuꞌn, tcyakil in baj tchyoꞌn ex ke ttxꞌakan in che baj tbetzꞌan tuꞌn tkan. Aju txcup lu at laj tcach toc tiꞌj twiꞌ ex junxitl queꞌyin cywitz keju otok che wile nej tuj nwitzicꞌe.
8 Matok in chin queꞌyine cyiꞌj ke tcach, tej twile tzaj chꞌiy juntl tcach mas chꞌin cyxol mastl. Entons e jatz bakoꞌn ox tcach, tuꞌntzun tbant tten aju otok tzaj chꞌiy te tibajxi. Aju tal cach lu at tbakꞌ twitz ic tzaꞌn tbakꞌ twitz jun xjal, at ttziꞌ ic tzaꞌn ttziꞌ xjal ex in jaw tniman tib tuꞌn tyol.
Aju jwisi tuꞌn Dios
9 Cucxtok in chin queꞌyine tiꞌj tejxi cycub kꞌoꞌn junjun kꞌukbil te cawbil ex cub keꞌ jun Tij Xjal tibaj jun. Aju t-xbalun toc, puro sak queꞌyin ic tzaꞌn ttxa cheꞌw, ex aju ttzmal twiꞌ ic queꞌyin ic tzaꞌn sak lan txꞌjomaj wen. Aju tkꞌukbil ic queꞌyin ic tzaꞌn tkan kꞌakꞌ, atzun ke t-rwedil ic che queꞌyin ic tzaꞌn kꞌakꞌ in cꞌant wen,
10 ex twitz nneꞌtz jlet jun nima ic tzaꞌn kꞌakꞌ. Elaꞌ mil xjal in che ajben te, ex elaꞌ miyón waꞌlketok twitz. Cubtzun keꞌ jwes tuꞌn ttzyet tuꞌn tcub cysentens ke xjal tuꞌn, ex e jaket ke libro.
11 In chin queꞌyintoke ex in chin ximantoke tiꞌj ju yol te nimbil tib in tmaꞌntok cach mas chꞌin. Tej matok in chin queꞌyine tiꞌj, cub byoꞌn nintz txcup, baj paẍuꞌn ex ocx kꞌoꞌn tuj kꞌakꞌ tuꞌn tbaj tzꞌeꞌy. 12 Ax icx ke mastl txcup el kꞌiꞌn cyoclen, pero e cyaj kꞌoꞌn tuꞌn cyankꞌin chꞌintl ex maxi tuꞌn cynaj oc tpon or cye.
13 Cucxtok in chin queꞌyine tiꞌj jlu, mer ic tzaꞌn tuj witzicꞌ nnoꞌc konicꞌan, ex minaben o wile cyjaꞌ ttzaj jun tuj muj, ic queꞌyin ic tzaꞌn jun xjal, xiꞌ jatum taꞌtok Tij Xjal ex pon lakꞌbaꞌn nikayin twitz. 14 Tetzun jlu xi kꞌoꞌn ipumalj, ajwalil ex cawbil, ex cycyakil xjal cyuj cycyakil nasyon ex cycyakil xjal junxitlchak cyyol in che ajbentok te. Aju tipumal ex tcawbil cucx ctel te jumajx, mlay chꞌexpaj ex mlay cub xitun.
15 Akine Daniel biꞌx naj nnable ex biꞌx in jaw secꞌpaje tiꞌj ju otok wile. 16 In pon lakꞌeꞌye ttxlaj jun ajbel waꞌltok tcub, ex xi nkanine te tuꞌn ttzaj tchicꞌbaꞌn tcyakilju otok wile. Tzajtzun tchicꞌbaꞌn weye ex tma: 17 Akeju cyaje txcup lu, atzun ke cyaje rey che cawil twitz txꞌotxꞌ. 18 Pero te tibajxi, aju cawbil cxel kꞌoꞌn cye ke xjal etzan tuꞌn Dios maꞌxix toclen, ex atzun ke jlu che cawil tuj tcyakil tabkꞌiyil te jumajx.
19 O wajbeye tuꞌn nbinteye ti t-xilen aju tcyajin txcup, porque junxitl queꞌyin cywitz mastl ex aju tilbilal puro xobajilxix, ke twitz teꞌ puro cꞌuxbil ke ex ke tpas tkꞌab puro kꞌan cꞌuxbil ke, tcyakil in baj tpaẍuꞌn ex in baj tchyoꞌn; atzun ke ttxꞌakan in che baj tbetzꞌan tuꞌn tkan. 20 Ax icx o wajbeye tuꞌn nbinteye cyiꞌj laj tcach, ex tiꞌj tal tcach mas chꞌin, aju at tbakꞌ twitz ex at ttziꞌ ex in jaw tniman tib tuꞌn tyol, ex mer ic tzaꞌn mas maꞌ toclen cywitz mastl cach, porque otok che el kꞌiꞌn ox cach tuꞌntzun tbant tten. 21 Entons o wile, oc ten tal cach lu kꞌojlel cyiꞌj ke xjal etzan tuꞌn Dios ex cub cyiꞌj tuꞌn, 22 max tejxi tpon Tij Xjal, ex xi tbinchaꞌn cyiꞌj tuꞌn cyclet ke xjal etzan tuꞌn Dios maꞌxix toclen, porque otok pon tkꞌijlalil tuꞌn ttzyet cycawin ke xjal etzan tuꞌn.
23 Ax icx tzaj tmaꞌn weye: Aju tcyajin txcup, atzun tcyajin cawbil ctel twitz txꞌotxꞌ ex junxitl tnabl cywitz ke mastl cawbil. Cbel cyiꞌj cycyakil xjal twitz txꞌotxꞌ tuꞌn, che bajel tbetzꞌan tjakꞌ tkan ex che bajel tpaẍuꞌn. 24 Akeju laj cach, atzun ke laj rey che cawil tuj cawbil lu. Te cyibajxi jlu, tzul juntl rey tuꞌn tcawin, junxitl tnabl cywitz laj ex cꞌelel tiꞌn cyoclen ox rey cyxol ke jlu, 25 cꞌoquel ten xmayil tiꞌj Dios maꞌxix toclen ex cꞌoquel ten yajlal cye xjal etzan tuꞌn, cjyol tumel tuꞌn tchꞌexpet tley Dios ex ke ninkꞌij, ex ke xjal etzan tuꞌn Dios che tel tjakꞌ tcawbil tuj ox abkꞌi tucꞌ mey.
26 Cbel keꞌ Jwes ex cbel t-sentens rey lu tuꞌn, cꞌelel tiꞌn toclen ex biꞌx cnajel te jumajx. 27 Cꞌelel kꞌiꞌn cycawbil, cyipumal ex cyajwalil cycyakil nasyon ateꞌ twitz txꞌotxꞌ, ex cxel kꞌoꞌn cye ke xjal etzan tuꞌn Dios maꞌxix toclen. Aju tcawbil Dios cyjel ten te jumajx, ex cycyakil xjal te twitz txꞌotxꞌ che ajbel te ex cxel cyniman tyol.
28 Atzun in pon baj txꞌolbabl tiꞌj ju o wile. Atzun weye biꞌx naj nnable ex puro spelin in oque, pero mintiꞌ el tkanil wuꞌne tiꞌj ju o wile, chi Daniel.