Tej tcuꞌx kꞌoꞌn Daniel tuj cyjul balun
6
Jaw t-scꞌoꞌn rey Darío jun syent tucꞌ winkin gobernador te onil te ex tuꞌn cycawin cyuj cycyakil lugar te tcawbil. 2 Cyxol keju cawil lu, e jaw scꞌoꞌn oxe xjal mas maꞌ cyoclen tuꞌn cyoc te nejenel cye mastl, tuꞌntzun toc cykꞌoꞌn cwent cyiꞌj ke mastl gobernador ka baꞌn in che akꞌnan, tuꞌn miꞌn ttzaj jun mya baꞌn tiꞌj rey. Ajun Daniel cyxol ke oxe lu. 3 Tuꞌnju tojtzkibl Daniel, jurat el nicꞌbaj tiꞌj ka a at mas tnabl cywitz mastl nejenel ex gobernador; tuꞌntzunju o ximan rey tiꞌj tuꞌn toc kꞌoꞌn Daniel tuꞌn rey te nejenel tuj enter cawbil. 4 Atzun ke gobernador ex ke cabetl tucꞌil Daniel e oc ten jyolte tumel tuꞌn tcub tzꞌak Daniel tuj jun til tiꞌj akꞌuntl in bant tuꞌn tuj tcawbil rey, pero tuꞌnju puro tzꞌaklxix te Daniel, mintiꞌx cnet jun til cyuꞌn tuꞌn t-xi cymaꞌn te rey. 5 Cyjaꞌtzun o cyma: Mlay cnet jun til Daniel kuꞌn, nok oꞌcx jacu cnet til kuꞌn tiꞌj tocslabl tiꞌj Tdios, che chi.6 Cyjaꞌtzun, mojeꞌ jun cyyol ke gobernador ex ke nejenel, tuꞌn cyxiꞌ yolil twitz rey Darío, ex tej cypon twitz rey xi cymaꞌn te:
—Tat Rey, baꞌnwt tzꞌel tkꞌija te jumajx. 7 Ma bant tiꞌj kuꞌne kcyakile akoꞌye gobernador ex ke mastl at cyoclen tuꞌn cycawin cyuj ke tnam, tuꞌn tbant jun ley tuꞌna, ka tuj jun xjaw mi jun xjal tuꞌn tcub ten cubsal twitz juntl dios ex mi twitz juntl xinak, nok oꞌcx twitza, Tat Rey. Alcyetzun jun mintiꞌ ma txi tniman, il tiꞌj tuꞌn tcuꞌx xoꞌt tuj cyjul balun. 8 Cyjaꞌtzun, baꞌn tuꞌn tex tmaꞌna ju ley lu ex kꞌoꞌnc tbiya tiꞌj tuꞌntzun miꞌn tchꞌexpet, ic tzaꞌnx cyley aj Media ex aj Persia mintiꞌ tumel tuꞌn cychꞌexpet, che chi.
9 Tuꞌntzun jlu oc tkꞌoꞌn rey Darío tbi tiꞌj ley lu. 10 Tejtzun tbinte Daniel ka otok tzꞌoc tbi rey tiꞌj ley lu, aj tja ex ocx tjakoꞌn tventan tja tumlal tnam Jerusalén, ex ox maj junjun kꞌij in cub ẍmejeꞌ naꞌl Dios ex in tkꞌoꞌn chjonte te, ic tzaꞌnx in bant tuꞌn nej. 11 Entons akeju aj kꞌoj tiꞌj Daniel oc cychmon cyib ex e jeꞌx queꞌyilte, ex o cnet Daniel cyuꞌn; lu in naꞌn Dios ex in kanin onbil te Tdios. 12 Jurat naj e jeꞌx kꞌmalte te rey cyjaꞌ:
—Tat Rey, ¿Myapetzun o bant jun ley tuꞌna ex o tzꞌex kꞌmet cye xjal, ka tuj jun xjaw mi jun xjal tuꞌn tcubsan twitz jun dios ex ka twitz juntl xjal, nok oꞌcx twitza, ex alcyetzun jun xjal miꞌn ma japun ju ley lu tuꞌn cbelex xoꞌt tuj cyjul balun? ¿Myape ax toc jlu? Che chi. Xi ttzakꞌweꞌn rey:
—Ax toc, aju ley lu il tiꞌj tuꞌn tjapun ic tzaꞌnx cyley aj Media ex aj Persia ex mlay chꞌexpet.
13 Atzun cye xi cymaꞌntl te rey:
—Ate Daniel, aju tzaj kꞌiꞌn junx cyucꞌil mastl xjal e tzaj tuj Judá, mintiꞌ in niman teya, ax icx mintiꞌ ma txi tniman aju ley ma tzꞌex kꞌmet, porque ma ko oc noje tiꞌj in naꞌn Dios ox maj jun kꞌij.
14 Tej tbinte rey jlu, tzaj nimxix tbis ex o jyon tumel tuꞌn tclet Daniel tuꞌn. Tuj enter kꞌij o jyon tiꞌj alcye tumel tuꞌn tclet tuꞌn, 15 pero akeju xinak lu e pon juntl maj twitz rey ex cyma:
—Tat Rey, baꞌn tuꞌna, aju cyley aj Media ex aj Persia mlay chꞌexpet. Tcyakilju in mayonjtz tuꞌn rey, ex cycyakil ke ley toc tbi rey cyiꞌj, mlay tzicꞌx tiꞌj tuꞌn miꞌn cyjapun, che chi.
16 Xitzun tmaꞌn rey tuꞌn ttzaj kꞌiꞌn Daniel ex tuꞌn tcuꞌx kꞌoꞌn tuj cyjul balun. Pero tej naꞌnxtok tcuꞌx kꞌoꞌn, xi tmaꞌn rey te:
—Awt ju Tdiosa, aju in ajbena te tcyakil kꞌij, clonte teya, chi rey.
17 Tejtzun tcuꞌx xoꞌn Daniel tuj cyjul balun, tzaj cyiꞌn jun abj ex cub cykꞌoꞌn ttzi jul, atzunte rey tzaj tiꞌn t-sey ex oc t-seyarin ttzi jul, ax icx ke aj sanjelal maꞌ cyoclen tuj tcawbil oc cyseyarin ttzi jul tuꞌntzun tjapun t-sentens Daniel ic tzaꞌnx in tmaꞌn ley otok bant tiꞌj. 18 Ajtzun rey tja ex cub coẍeꞌ, mintiꞌ o waꞌn ex mintiꞌ o tajbe tuꞌn cyul xjal kꞌol chnab twitz ic tzaꞌn in bant tcyakil konicꞌan; ax icx mintiꞌ ocx watl tuj twitz enter konicꞌan. 19 Tej ttzaj t-xe cyaꞌj, jaw weꞌ ex xiꞌ naj ttzi cyjul balun. 20 Tejtzun tpon rey ttzi cyjul balun, xi schꞌin tucꞌil tkꞌajkꞌajel twiꞌ bisbajilxix ex tma:
—Daniel, aya tmajen Dios itzꞌ, ¿mape cleta tuj cytzi balun tuꞌn Tdiosa aju in ajbena te tcyakil kꞌij? Chi rey.
21 Atzunte Daniel tzaj ttzakꞌweꞌn:
—Tat Rey, baꞌnwt tzꞌel tkꞌija te jumajx. 22 Ma tzaj t-samaꞌn Ndiose t-anjel, ex ma lamet cytzi balun, tuꞌn miꞌn nxi chyoꞌne cyuꞌn, porque baꞌn tuꞌn Dios mintiꞌ wile twitz, ax icx mintiꞌ jun wile ma nbinchaye twitza, Tat Rey.
23 Jawtzun tzalaj rey nimxix ex xi tmaꞌn tuꞌn tjatz kꞌiꞌn Daniel tuj cyjul balun. Tejtzun tjatz cyiꞌn, mintiꞌ cnet jun ẍil tiꞌj Daniel cyuꞌn, tuꞌnju o keꞌxix tcꞌuꞌj tiꞌj Tdios. 24 Xitzun tmaꞌn rey tuꞌn cytzaj kꞌiꞌn ke xinak, akeju otok che kꞌmante te rey ka at til Daniel, ex e cuꞌx xoꞌn tuj cyjul balun, cyucꞌix cyxuꞌjil ex cycꞌwaꞌl; ex naꞌnxtok cycuꞌpun tzꞌak cyxol balun tej cyjatz tꞌicpaj balun tzyulte cye twitz cyaꞌj, ex biꞌx e baj tzakun cyuꞌn.
25 Xitzun ttzꞌiban rey Darío jun uꞌj cye xjal cyuj cycyakil nasyon, tuj teyle junjun yol baꞌn cyuꞌn tuj tcyakil tcawbil, chi cyjaꞌ: Cuchiwt baꞌn ateꞌye ex baꞌnwt tzꞌel cykꞌije. 26 Akine rey Darío in xi nkꞌoꞌne jun ley tuj tcyakil txꞌotxꞌ jatum in chin cawine, tuꞌn cynimane cycyakile te Dios, aju Tdios Daniel, ex tuꞌn cyxobe twitz.
Porque atzun Dios itzꞌ, ex cucx tten te jumajx. Aju tcawbil mlay naj ex aju tipumal mintiꞌ bajsbil te.
27 Ate Dios colol cye xjal ex kꞌol tzokpibl, ex in tbinchaꞌn ke binchben maꞌ cyxilen tzaꞌnx tuj cyaꞌj ax icx twitz txꞌotxꞌ. A ma clonte Daniel tuj cytzi balun, chi rey tuj uꞌj.
28 Cyjaꞌtzun, ax toclen Daniel xi tiꞌn ic tzaꞌn nej tuj enter tyemp tej tcawin Darío, ax icx tej tcawin Ciro aju rey te Persia.