Aju yol oc tzꞌiban twitz ja
5
E tzaj ttxcoꞌn Belsasar aju rey te Babilonia jun mil xinak maꞌxix cyoclen tuj tnam, tuꞌn cywaꞌn tucꞌil tuj jun nintz waꞌn, ex tej in che waꞌntok, xi cycꞌan nim vin. 2-3 Tuꞌnju otok chyoꞌn twiꞌ Belsasar tuꞌn vin, xi tmaꞌn tuꞌn cytzaj kꞌiꞌn ke copa kꞌan pwak ex sak pwak cytxꞌotxꞌil, akeju otok che tzaj tiꞌn Nabucodonosor aju ktzan tchman tuj tja Dios tuj Jerusalén. E ultzun kꞌiꞌn ke copa, ex atzun ke e ajben te tcꞌabl rey ex te cycꞌabl ke t-xuꞌjil ex ke t-xuꞌjil mas chꞌin cyoclen, ex keju otok che pon tuj nintz waꞌn. 4 Cycyakil in che cꞌantok vin ex in che nimsantok cybi cydios, akeju tilbilal kꞌan pwak, sak pwak, kꞌan cꞌuxbil, cꞌuxbil, tzeꞌ ex abj cytxꞌotxꞌil.5 Tujxtzun or lu jaw jlet jun kꞌabaj cytxlaj candil, ex oc ten tzꞌibal tuꞌnx twi kꞌabaj twitz ja. Tejtzun tqueꞌyinte rey aju kꞌabaj in tzꞌiban, 6 puro spelin oc tuꞌn t-xobil, biꞌx naj tnabl, biꞌx el baj tipun, ex ke tkan e oc ten luꞌlul. 7 Jawtzun schꞌin ex e tzaj ttxcoꞌn ke aj kꞌij ateꞌ tuj Babilonia, cyucꞌix ke aj nabl ex keju in che xnakꞌtzan cyiꞌj cheꞌw twitz cyaꞌj, ex xi tmaꞌn cye:
—Alcye jun ma jaw schꞌinte aju tzꞌiban tzalu ex ka ma tzaj tchicꞌbaꞌn ti t-xilen, cꞌoquel kꞌoꞌn jun t-xbalun tbanilxix ẍjulin queꞌyin, cbel kꞌoꞌn jun uwj tkul, kꞌan pwak ttxꞌotxꞌil, ex cꞌoquel kꞌoꞌn toclen tuꞌn toc te toxin cawil tuj ncawbile.
8 Cycyakil aj nabl in che ajbentok te rey e ocx tuja, pero mi jun el tnicꞌ tiꞌj yol tzꞌiban twitz ja ex mi jun bant tchicꞌbante te rey ti t-xilen. 9 Atzunte rey Belsasar tzaj nimxix t-xobil ex jumajx spelin oc queꞌyin. Ke xjal at cyoclen ttxlaj mintiꞌ el cynicꞌ tiꞌj alcye tuꞌn tbant cyuꞌn. 10 Atzunte ttxu rey, tej tbinte tkꞌajkꞌajel twiꞌ rey ex tkꞌajkꞌajel cywiꞌ ke xjal maꞌ cyoclen otok che tzaj ttxcoꞌn, ocx tuja jatum otok tzꞌoc nintz waꞌn, ex tma:
—Tat Rey, baꞌnwt tzꞌel tkꞌija te jumajx. Miꞌn tzaj baj tcꞌuꞌja ex miꞌn tzꞌoc twitza te spelin, 11 porque tuj tcawbila at jun xinak at cyxew ke dios xjan tucꞌil. Tuj tkꞌijlalil ojtxi, tej toctok tchmana te rey, el tnicꞌ tiꞌj, aju xinak lu at tnabl ex at nim tojtzkibl ic tzaꞌn cye ke dios. Tuꞌntzun jlu, ate rey Nabucodonosor aju ktzan tchmana oc kꞌonte xinak lu te nejenel cyxol cycyakil ke chman, ke aj kꞌij, ke aj nabl ex keju in che xnakꞌtzan cyiꞌj ke cheꞌw, 12 porque ate Daniel, aju Beltsasar tbi oc tkꞌoꞌn ktzan rey, at mastl tnabl cywitz mastl xjal, at tojtzkibl ex at nim tnabl tuꞌn tpjet witzicꞌ tuꞌn ex tuꞌn t-xi tchicꞌbaꞌn alcye t-xilen junjun yol bajx tzꞌel nicꞌbaj tiꞌj ex tuꞌn ttzakꞌwet junjun yol cyuw ttxꞌolbanjtz. Txcontza Daniel jaꞌlo, ex atzun ctzajel chicꞌbante teya ti t-xilen aju ma tzꞌoc tzꞌiban twitz ja, chi ttxu rey.
13 Xitzun kꞌiꞌn Daniel twitz rey, atzunte rey xi tkanin te:
—¿Apeya Daniel, aju tzaj kꞌiꞌn pres tuj Judey junx cyucꞌil mastl xjal Judiy tuꞌn ktzan nchmane aju rey Nabucodonosor? 14 Ma nbiye at T-xew Dios tucꞌila, at nim tnabla, at tojtzkibla ex nneꞌl tnicꞌa tiꞌj tcyakil. 15 Ke xinak at cynabl ex ke aj kꞌij ma che ul wucꞌile tuꞌn tjaw cyschꞌiꞌn aju tzꞌiban twitz ja ex tuꞌn ttzaj cychicꞌbaꞌn weye ti t-xilen, pero mintiꞌ ma tzꞌel cynicꞌ tiꞌj. 16 Pero ma nbiye ka jacu pjet tuꞌna ke yol mintiꞌ nneꞌl nicꞌbaj cyiꞌj ex jacu tzakꞌwet tuꞌna junjun yol mas cyuw. Ka ma jaw t-schꞌiꞌna ke yol lu ex ka ma tzaj tchicꞌbaꞌna weye ti t-xilen, jacu tzꞌoc nkꞌoꞌne t-xbaluna tbanilxix ẍjulin queꞌyin, cbel nkꞌoꞌne jun uwj tkula, kꞌan pwak ttxꞌotxꞌil, ex cꞌoquel nkꞌoꞌne toclena tuꞌn toca te toxin cawil tuj ncawbile. chi rey.
17 Atzunte Daniel xi ttzakꞌweꞌn te rey:
—E tten toyaja te teya ex baꞌn tuꞌn t-xi tkꞌoꞌna oclenj lu te juntl. Masque mi jun ctzajel ncꞌmoꞌne, pero jacu txi ntxꞌolbaꞌne aju in tmaꞌn yol ma tzꞌoc tzꞌiban twitz ja.
18 A Dios aju maꞌ toclen, xi kꞌonte cawbil te tchmana Nabucodonosor, ax icx oc tkꞌoꞌn toclen te maꞌxix, ex xi tkꞌoꞌn tajwalil ex nimbil te. 19 Tuꞌnju toclen xi kꞌoꞌn, ke xjal najl cyuj cycyakil tnam ex nasyon ex cycyakil cꞌloj yol o ten tchiylal cye ex e luꞌlun twitz. E cub tbyoꞌn junjun xjal, atzun junjuntl mintiꞌ; o tbincha nok alcye tajbil, xi tkꞌoꞌn cyoclen junjun, atzun junjuntl el tiꞌn cyoclen. 20 Pero tej tjaw tniman tib ex tej toc jawni twitz, el kꞌiꞌn toclen te rey ex tajwalil. 21 Ex lajoꞌn cyxol xjal ex oc tnabl ic tzaꞌn tnabl jun txcup, ax o cyaj ten cyxol chej te tjakꞌ cꞌul. Cꞌul xi twaꞌn ic tzaꞌn cye wacẍ, ex o tzꞌacꞌ t-ximlal tuꞌn tkꞌab cheꞌw, ex maxitzun ul tnabl tejxi tel tnicꞌ tiꞌj ka ate Dios maꞌxix toclen cyibaj cycyakil cawbil ex in che oc tkꞌoꞌn ke cawil nok alcye taj tuꞌn cyoc tkꞌoꞌn. 22 Atzun teya, aya Belsasar, masque biꞌn tuꞌna ti o baj tiꞌj ktzan tchmana, pero mintiꞌx ma cub tmansin tiba, 23 nokpe ma tzꞌoc tena xmayil tiꞌj Kman aju at tuj cyaꞌj, ex ma txi tmaꞌna tuꞌn cytzaj kꞌiꞌn ke copa akeju e tzaj kꞌiꞌn tuj tja Dios tuj Jerusalén; ma cꞌana vin cyuj ke copa lu junx cyucꞌil ke xjal ma che tzaj ttxcoꞌna, ex ma jaw tnimsaꞌna cybi ke dios kꞌan pwak, sak pwak, kꞌan cꞌubil, cꞌuxbil, tzeꞌ, ex abj cytxꞌotxꞌil. Akeju dios lu miban che queꞌyin, miban che bin ex mintiꞌ chꞌin baꞌn cyuꞌn. Atzunte Dios, aju in tkꞌoꞌn tchwinklala ex Tajaw tcyakilju in tbinchaꞌna, naꞌnx tjaw tnimsaꞌna tbi. 24 Cyjaꞌtzun ma tzaj t-samaꞌn ju kꞌabaj lu, aju ma cub tzꞌibante yol lu. 25 Aju yol tzꞌiban twitz ja, atzun jlu: MENE, MENE, TEKEL, UPARSIN, 26 ex atzun cyxilen jlu: MENE: Atzun in tmaꞌn: Ate Dios ma kꞌmante jteꞌ kꞌij tuꞌn tcawina ex jaꞌlo ma pon baj; 27 TEKEL: atzun in tmaꞌn: Ma malonjtza tuj balans ex mya cabal ma tzꞌel talila; 28 PERES: Atzun in tmaꞌn: Aju tcawbila cꞌelel kꞌiꞌn teya ex cxel kꞌot cye aj Media ex cye aj Persia, chi Daniel te rey.
29 Tbajlenxitzun jlu, xi tmaꞌn rey Belsasar tuꞌn toc kꞌoꞌn t-xbalun Daniel tbanilxix ẍjulin queꞌyin, ex tuꞌn tcub cotbaꞌn jun tuꞌ kꞌan pwak ttxꞌotxꞌil ex xi tmaꞌn cye cycyakil xjal ka ate Daniel otok tzꞌoc toclen te toxin cawil tuj tcawbil rey.