4 O wile cyjaꞌ ttzaj jun nintz cykꞌikꞌ tuj txꞌotxꞌ tuj tbankꞌab kꞌij ex tuj txkan muj nneꞌtz jun kꞌakꞌ ic tzaꞌn tkan kꞌancyok ex in koptzꞌaj tiꞌjele wen. Tuj tmijil kꞌakꞌ in koptzꞌaj jun tiꞌxti mer ic tzaꞌn cꞌuxbil in koptzꞌaj wen; 5 tujx tmijil kꞌakꞌ at o che wile mer ic che queꞌyin ic tzaꞌn cyaje jil ex aju cyilbilal mer ic tzaꞌn cyilbilal xjal. 6 Teyle junjun cye at cyaje cywitz ex cyaje cyxicꞌ; 7 jikun cyiꞌj cykan ex aju t-sapatil cykan mer ic tzaꞌn t-sapatil tkan wacẍ, ex in che koptzꞌaj ic tzaꞌn kꞌan cꞌuxbil tzꞌumin twitz. 8 Mya nok oꞌcx cyaje cywitz ex cyaje cyxicꞌ at, ax at cyaje cykꞌab, ic tzaꞌn tkꞌab xjal toc tiꞌj cyaje cytxlaj tjakꞌ cyxicꞌ. 9 Nnoꞌc mojeꞌ jun cyxicꞌ tiꞌj juntl. Oc cyxiꞌ bet nok jatum cyaj tuꞌn cyxiꞌ, mintiꞌ in kꞌon cyximlal welt.

10 Aju tilbilal cywitz ke cyaje jil lu cyjaꞌ tten: Jun cywitz mer ic tzaꞌn twitz xjal; atzun juntl cywitz tuj cybankꞌab mer ic tzaꞌn tilbilal balun; juntl cywitz tuj cynayaj mer ic tzaꞌn tilbilal jun tor, ex aju cywitz ma tiꞌjxi mer ic tzaꞌn tilbilal jun tꞌiw. 11 Cabe cyxicꞌ in jaw cylicꞌun twitz cyaꞌj ex in pon tacl te jun tiꞌj te juntl, aju cabetl cyxicꞌ in ajben te txaybil cyximlal. 12 Cycyakil in che bet nok jatum cyaj tuꞌn cyxiꞌ ex mintiꞌ in kꞌon cyximlal welt, cyjaꞌ cyxiꞌ jatum kꞌiꞌn ke tuꞌn tipumal Dios.

13 Aju che queꞌyin ke jil mer ic tzaꞌn xkꞌaꞌl in cꞌant ex ka mer ic tzaꞌn ttxan tzaj cyjaꞌ t-xiꞌ ex cyjaꞌ ttzaj cyxol. Aju kꞌakꞌ in cꞌant wen ex nneꞌl tkan kꞌancyok tiꞌj. 14 Cyjaꞌ cyxiꞌ ke jil lu ex cyjaꞌ cytzaj jurat naj mer ic tzaꞌn tkan kꞌancyok.

15 O wile ke jil lu, ex teyle junjun tcub jun rwed ttxlaj twitz txꞌotxꞌ. 16 Keju cyaje rwed junx che queꞌyin, ex junx binchben cye, in che koptzꞌaj wen mer ic tzaꞌn jun tbanil abj topasio tbi. Aju queꞌybil cye, mer ic tzaꞌn kꞌeꞌl tex juntl rwed tujxi juntl. 17 In bant tuꞌn cyxiꞌ nok jatum: ka cubni, ka jawni, ka elni ex ka ocni ex mya il tiꞌj tuꞌn tkꞌon welt cyximlal. 18 O wile toc jun cꞌuxbil tolin tiꞌj tiꞌj junjun rwed te tzuybil cye, maꞌ twaꞌlil ex xobajilxix queꞌyin ex nim tbakꞌ cywitz toc cyiꞌjele. 19 Oc cyicꞌ bet ke jil, ax icx ke rwed in che icꞌ bet cyucꞌil, ex oc cyjaw lipan ke jil twitz txꞌotxꞌ, ax icx ke rwed in che jaw lipan. 20 Ke jil in che yucch tuꞌn cyxiꞌ tuj juntl lugar nok jatum oc cyxi kꞌiꞌn tuꞌn tipumal Dios, ex junx in che jaw lipan ke rwed cyucꞌil, porque aju ipumalj yucul cye cyaje jil, axju in yucun cyiꞌj ke rwed. 21 Oc cyjaw yucch ke jil, ax icx ke rwed in che jaw yucch, ex oc cycub weꞌ ke jil, ax icx ke rwed in che cub weꞌ; oc cyjaw lipan ke jil twitz txꞌotxꞌ, ax icx ke rwed in che jaw lipan junx cyucꞌil, porque aju ipumalj yucul cye cyaje jil, axju in yucun cyiꞌj ke rwed.

22 O wile jun tiꞌxti mer ic tzaꞌn jun waꞌlbil tcubsaꞌn tibajxi cywiꞌ, in koptzꞌaj wen ic tzaꞌn cristal. 23 Tjakꞌ ju tiꞌxti mer ic tzaꞌn jun waꞌlbil in xi cylicꞌun ke jil cyxicꞌ ex in pon tacl te jun tiꞌj te juntl. Cyuꞌn cabetl cyxicꞌ nnoꞌc cytxayin cyximlal. 24 Ex o nbiye tkꞌajkꞌajel cyxicꞌ oc in che bet mer ic tzaꞌn tkꞌajkꞌajel nima otok jaw chꞌiy, ex mer ic tzaꞌn tkꞌajkꞌajel twi Dios aju Tajaw Tcyakil, ex ic tzaꞌn tkꞌajkꞌajel cywiꞌ txkan soldad. Oc cycub weꞌ ke jil in cub cyiꞌn cyxicꞌ. 25 Ex etz jun tkꞌajkꞌajel tibaj ju waꞌlbil aju tcubsaꞌn tibajxi cywiꞌ ke jil. 26 Tibaj ju waꞌlbil o wile jun kꞌukbil ic queꞌyin ic tzaꞌn jun tbanil abj zafiro tbi, ex at jun kꞌukl tcub tibaj ju kꞌukbil, ic queꞌyin ic tzaꞌn jun xjal. 27 O wile t-ximlal, xiꞌynix tiꞌj tmij ponin baj tiꞌj twiꞌ ic queꞌyin ic tzaꞌn kꞌan cꞌuxbil in koptzꞌaj wen toc kꞌakꞌ tiꞌj. Ex xiꞌynix tiꞌj tmij cupun t-xe tkan ic queꞌyin ic tzaꞌn kꞌakꞌ in koptzꞌaj tcyakil tiꞌjele, 28 mer ic tzaꞌn t-xmacal lobaj in jaw jlet tuj tkꞌijlalil jbal. Ictzun tten cub tyecꞌun tib tajwalil Kman nwitze; in koptzꞌaj wen tcyakil tiꞌjele. Tej twile jlu, in cub ẍmejeꞌye ex pon tacl tibaj nwitze max twitz txꞌotxꞌ.