2 Aju ketzbile atzun taꞌ jaꞌlo tuj cykꞌab stranjer xjal; ke kjaye ma tzꞌel cyetzan ke xjal mintiꞌ ojtzkiꞌn cywitz kuꞌne.

3 Ma ko cyaje meba, o che cyim kmane; atzun ktxuꞌye ma che cyaj ten meba xuꞌj.

4 Aju aꞌ etzantok kuꞌne nej, atzun jaꞌlo lokꞌaj nneꞌl kuꞌne; aju siꞌ etzantok kuꞌne nej, atzun jaꞌlo in xi kchjoꞌne twiꞌ.

5 Cucx in ko yajlanjtze cyuꞌn, in ko sicte ex mintiꞌ in tzaj cykꞌoꞌn chꞌin ambil tuꞌn kojlane.

6 Ocx kkꞌon kibe tjakꞌ cycawbil aj Ejipt ex tjakꞌ cycawbil aj Asiria tuꞌn ttzaj cykꞌoꞌn kwaye.

7 Ke kxeꞌchele o che binchan il ex o che cyim, ex akoꞌye ma cub kcastiwoye tuꞌn cylaj.

8 In che cawin ke majen kiꞌje, ex mi aꞌl jun baꞌn tclonte keye tuj cykꞌab.

9 Xi koyin kchwinklale tuꞌn tcnet kwaye, tuꞌnju atzun ateꞌ ke elekꞌ tuj lugar mintiꞌ cynajbil xjal tuj.

10 In julin ktzꞌumale tuꞌn cyak ic tzaꞌn tuj jun jorni, tuꞌn tlaj cyak in tzaj kiꞌje tuꞌn weꞌyaj.

11 Ma che cub ipan ke xuꞌj najl tuj tnam Sión, ax icx ke kꞌapoj najl cyuj ke tnam tuj Judá.

12 Ke nejenel kxole ma che jaw yobin tiꞌj cykꞌab, ke tij xjal mintiꞌ in cheꞌx niman.

13 Ke cuꞌxun ma che oc kꞌoꞌn te cheꞌl triw; atzun ke tal kꞌa ma che cub tzꞌak tjakꞌ talil siꞌ.

14 Mintiꞌtl in che cub keꞌ ke tij xjal ttzi tpwertil tnam; mintiꞌtl in binjtz cybitz ke cuꞌxun.

15 Mintiꞌtl tzalajbil tuj kanmiye; aju kbixbile te tzalajbil ma tzꞌoc te bis.

16 Ma tzꞌel kꞌiꞌn koclene; becꞌbil kwitze, ma ko binchane il.

17 Tuꞌn tlaj jlu at bis tuj kanmiye; ex cyjaꞌtzun ma tzꞌoc muj tiꞌj tbakꞌ kwitze.

18 Aju tnam Sión ma cub xitj ex mi aꞌl xjal at tuj; oꞌcx ke wech in che bet tuj.

19 Atzun teya Nman, cucx ctembila te jumajx; cucx ccawila tuj tcyakil tabkꞌiyil te jumajx.

20 ¿Tikuꞌn ma tzicꞌ knaꞌnjtze tuꞌna te jumajx? ¿Tikuꞌn ma ko cyaj tcolina nimcu kꞌij?

21 Nman, ko tiꞌn aja tucꞌila, ex jacutzun ko aj meltzꞌaje. Kꞌontza tzalajbil keye ic tzaꞌn o ko tzalaje nej.

22 Atzun teya ma ko el ticꞌuna te jumajx; nimxix tkꞌoja ma tzaj kiꞌje.