JEREMÍAS
1
Ke tyol Jeremías aju tcyꞌajal Hilcías. Ate Jeremías cyiyjil jun cꞌloj pal najl tuj tnam Anatot tuj cytxꞌotxꞌ tiyjil Benjamín. 2 Tuj toxlajin abkꞌi ttzyetlen tcawin rey Josías tuj Judá, tzaj yolin Kman tucꞌil Jeremías. Ate Josías tcyꞌajal Amón. 3 Ax icx o yolin Kman tucꞌil Jeremías tuj tkꞌijlalil tej tten Joacim aju tcyꞌajal Josías te rey tuj Judá, ex cucx tzaj yolin tejxi tjapun baj junlaj abkꞌi tcawin juntl tcyꞌajal Josías tuj Judá, aju Sedequías tbi, ex tuj tjweꞌyin xjaw te abkꞌi lu tej cyex kꞌiꞌn aj Jerusalén tuj cytanmi, tuꞌn cyxiꞌ kꞌiꞌn tuj juntl tnam najchak.In txocon Kman tiꞌj Jeremías
4 Tzajtzun yolin Kman wucꞌile ex tma: 5 Naꞌnxtok toc tena tuj talbil ttxuꞌya ya otok jaw nscꞌoꞌna, ex naꞌnxtok tul itzꞌja ya otok tzꞌel npaꞌna, ex biꞌx banimaj wuꞌne tuꞌn toca te nsanjele, tuꞌn t-xi tmaꞌna nyole cye xjal ateꞌ cyuj txkantl nasyon, chi Kman weye.
6 Atzun weye xi ntzakꞌweꞌne: Ay Tat, ma cꞌwaꞌlx kine ex mlay bant nyoline.
7 Atzunte Kman tzaj tmaꞌntl weye: Miꞌn tmaya ka ma cꞌwaꞌlxa. Cxeꞌla nok jatum oc t-xi nsamaꞌna, ex cxel tmaꞌna tcyakilju cxel nmaꞌne teya. 8 Miꞌn xoba cywitz xjal, porque akine chin tel tucꞌila te clol teya, chi Kman tzaj tmaꞌn weye.
9 Tzajtzun tnukpiꞌn Kman tkꞌab ex oc tmacoꞌn ttxoꞌw ntziꞌye ex tma: Cꞌoquex nkꞌoꞌne nyole tuj ttziꞌya. 10 Jaꞌlo cxel nkꞌoꞌne toclena cyibaj ke cawbil ex cyibaj ke nasyon, tuꞌn cyjatz baket ex tuꞌn cycub xitit, tuꞌn cynaj ex tuꞌn cycub kꞌuchj, ax icx tuꞌn cyjaw binchet ex tuꞌn cycuꞌx awat.
11 Tzajtzun yolin Kman wucꞌile ex tzaj tkanin weye: ¿Titzun ma tila Jeremías?
—Ma wile jun tkꞌab tzeꞌ almendro, nchiye xi ntzakꞌweꞌne.
12 Ax toc tuꞌna, chi Kman, tzaj tmaꞌn weye. Cyjaꞌtzun tten cꞌoquel ncwente tiꞌj tuꞌn tjapun nyole.
13 Tzaj yolin Kman wucꞌile tcabinmajiꞌn ex tma: ¿Ti ma tila?
—Ma wile jun cꞌil tuj txꞌotxꞌ tuj tbankꞌab kꞌij, in lokin aꞌ tuj ex chꞌix ttzaj pichꞌkꞌaj twiꞌ cubni, nchiye xi ntzakꞌweꞌne.
14 Tzajtzun tmaꞌn Kman weye: Max tuj txꞌotxꞌ tuj tbankꞌab kꞌij ctzajel ket yajbil cyibaj cycyakil xjal najl tuj tnam lu. 15 Akine in chin cyuwsante yol lu: Che tzajel ntxcoꞌne cycyakil nasyon ateꞌ tuj txꞌotxꞌ tuj tbankꞌab kꞌij. Che ul ke cyrey ex cbel cykꞌoꞌn cykꞌukbil te cycawbil ax ttzi tpwertil tnam Jerusalén, twitz tcyakil muro toc tiꞌjele ex cyiꞌjele cycyakil tnam ateꞌ tuj Judá. 16 Atzun cycastiw ke binchal il cbel nkꞌoꞌne, akeju ma tzꞌel cypaꞌn cyib wiꞌje, ma cub cypatun storac, ex ma che oc ten cꞌulul cywitz junxitl dios, akeju cyuꞌnx in baj cybinchaꞌn. 17 Atzun teya, tenx tipuna, txiꞌya ex kꞌmanxa cye tcyakilju cxel nmaꞌne teya. Miꞌn xoba cywitz; katzun ma xoba, wuꞌne ctzajel luꞌluna cywitz. 18 Jaꞌlo, aya cꞌoquel nkꞌoꞌne ic tzaꞌn jun tnam toc muro tiꞌj, ic tzaꞌn jun tkan ja cꞌuxbil ex ic tzaꞌn jun muro kꞌan cꞌuxbil, tuꞌntzun tten tipuna tuꞌn tcub weꞌya cywitz cycyakil xjal aj Judá: Cywitz ke cyrey, cywitz ke nejenel cye, cywitz ke cypal ex cywitz cycyakil xjal. 19 Che oquel ten kꞌojlel tiꞌja, pero mlay cub tiꞌja cyuꞌn, porque akine chin tele tucꞌila te colol tiꞌja, chi Kman weye.