Ke xjal in chin tzalaje cyiꞌj, akeju mans ex in ajtz tiꞌj cyanmi ex at tchiylal nyole tuj cywitz. 3 Pero at xjal in xi tkꞌoꞌn jun tor te chojbil, pero ax icx in cub cybyoꞌn jun xjal, nnoꞌcx cykesin tjakꞌ tkul jun ẍneꞌl, pero ax icx in cub cytokin tiꞌj tkul jun txꞌyan, in xi cykꞌoꞌn ke twitz awal te oyaj, pero ax icx in xi cykꞌoꞌn tchcꞌel jun boch; in cub cypatun storac, pero ax icx in che cꞌulun cywitz ke tilbilal. Akeju e jaw scꞌonte ke costumr icꞌbilxix lu, nimxix cygan tuꞌn cybinchante tcyakil jlu. 4 Ax icx weye, cjawil nscꞌoꞌne jun cꞌixbisabl tuꞌn ttzaj wiꞌne cyibaj, ex ctzajel wiꞌne aju nimxix in che xob twitz, porque e tzaj ntxcoꞌne, ex mi aꞌl jun tzaj tzakꞌwente weye, in yoline cyucꞌil, pero mintiꞌ in tzaj cybiꞌn; o cybincha aju mintiꞌ in cub tuj nwitze, jaw cyscꞌoꞌn aju mintiꞌ in chin tzalaje tiꞌj.

5 Cybinxe tyol Kman, akeye baꞌn che niman tyol: At junjun cyxjalile in che icꞌun cyiꞌje ex in che kꞌojin cyiꞌje tuꞌnju in tzaj cynaꞌne nbiye, ex in cymaꞌn cyjaꞌ: E ttzaj tyecꞌun Kman tajwalil; kajbile tuꞌn cyoc kqueꞌyine in che tzalaje, che chi. Pero ctzajel cychꞌixwi ke xjal lu. 6 Cybinxe tkꞌajkꞌajel cywi xjal in kꞌajt tuj tnam, tucꞌix tkꞌajkꞌajel in kꞌajt tuj tja Dios; atzun tkꞌajkꞌajel lu tuꞌn Kman, porque in cub tkꞌoꞌn cycastiw ke xjal aj kꞌoj tiꞌj.

7 Aju tnam Sión ic tten ic tzaꞌn jun xuꞌj nok minaben nnuꞌl itzꞌj tal naꞌnxtok ttzaj taꞌw tcꞌuꞌj tuꞌn tul itzꞌj tal. 8 ¿Alcye jun o tbixi ic tzaꞌn jlu? ¿Alcye jun o lonte ic tzaꞌn tten jlu? ¿Tzinpe nnuꞌl itzꞌj jun nasyon te junx kꞌij? ¿Tzinpe nnuꞌl itzꞌj jun tnam jurat naj? Pero tej ttzaj taꞌw tcꞌuꞌj tnam Sión, jurat naj e ul itzꞌj ke tal. 9 Mlay bant tuꞌn tmayet wuꞌne tuꞌn miꞌn cyul itzꞌj ke cꞌwaꞌl, porque wuꞌne in xi nkꞌoꞌne ambil tuꞌn cyul itzꞌj, chi Cydiose.

10 Che tzalajxe tucꞌil tnam Jerusalén, che tzalajxe nim junx tucꞌil akeye at cycꞌujlalile tiꞌj, che tzalajxe nim junx tucꞌil cycyakile akeye o che baj okꞌe tiꞌj; 11 ex atzunte tnam Jerusalén ic cꞌoquel ic tzaꞌn jun txubaj, che oquel cꞌaꞌchine tuꞌn ocxi tnoj cycꞌuꞌje ex ckꞌukbanjtzel cycꞌuꞌje tuꞌn. 12 Porque akine Cymane cxel nmaꞌne jlu: Oc nbinchaꞌye tuꞌn tten Jerusalén tuj txubtxaj ic tzaꞌn aꞌ tuj jun nima nimxix at, ex atzun cykꞌinumabl ke nasyon cxel nkꞌoꞌne, ic cꞌoquel ic tzaꞌn jun nima otok tzꞌex kojl tuj tbe. Atzunju tnam Jerusalén ccꞌaꞌchal te cyeye, che jawil chleꞌne tuꞌn tuj tkꞌab ex che oquel xmoxine tuꞌn kꞌukl keye twi tkan. 13 Ic tzaꞌn jun txubaj in xi tkꞌukbaꞌn tcꞌuꞌj tal, cyjaꞌxtzun weye cxel nkꞌukbaꞌne cycꞌuꞌje, ex cnetel kꞌukbabl cycꞌuꞌje tuj Jerusalén.

14 Octzun cylonteye jlu, cjawil tzalaj cyanmiye; cꞌoquel acꞌaj tipumal cyximlale ic tzaꞌn chaꞌx cꞌul. Ctzajel tyecꞌun Kman tipumal cyxol ke tmajen, ax icx ctzajel tkꞌoj cyiꞌj ke aj kꞌoj tiꞌj. 15 Porque tzul Kman tucꞌil tkan kꞌakꞌ, ke tcarwaj mer ic tzaꞌn jun xcyakinpaẍ; ctzajel ttzokpin ttxꞌuꞌjil tucꞌix tkꞌoj; aju castiw ctzajel tkꞌoꞌn in cꞌant ic tzaꞌn kꞌakꞌ. 16 Ax toc tzul jwisi tuꞌn Kman tucꞌil kꞌakꞌ; cbel cycastiw cycyakil xjal tuꞌn tuꞌnju t-spad kꞌiꞌn, ex che cymel nimcu xjal tuꞌn.

17 In tman Kman cyjaꞌ: Akeju in baj cyxjansan cyib tuꞌn cycꞌulun cywitz tilbilal cyxol tkan awal, lepchix ke tiꞌj jun nejenel cyxol ex in xi cychyoꞌn tchibjal boch ex tchibjal ichꞌ ex cychibjal mastl jil mayoꞌn tuꞌn ley, cycyakil biꞌx che cymel te jumajx, 18 porque ojtzkiꞌn wuꞌne ke cybinchben ex cyximbetz.

Chin ultzune ex ax kine chin oquel chmonte ke tnam ex ke nasyon, che ul ex cꞌoquel cyqueꞌyin aju wajwalile. 19 Cxel nkꞌoꞌne jun techal cye; cxel nkꞌoꞌne ambil tuꞌn cycyaj ankꞌin junjun ex che xel nsamaꞌne cyuj ke nasyon lu: Tuj Tarsis, Libia, Lidia, atzunju tnam lu jatum ateꞌ ke xjal baꞌn che yucun xobl plech, tuj Tubal, Grecia ex cyuj ke txꞌotxꞌ ateꞌ najchak ttziꞌyile mar, akeju bajx cybi tkanil wiꞌje ex bajx cyil wajwalile; ex atzun ke che xel kꞌmante tkanil wajwalile cyxol ke nasyon. 20 Che tzajel kꞌiꞌn cycyakil cyxjalile cyuj cycyakil nasyon; at che ul tibaj chej, at tuj carwaj, ex at cyuj carret jawoꞌn cyuꞌn chej, at cyibaj chej mul ex cyibaj chej camey, ic che oquel ic tzaꞌn jun oyaj te weye tuj Jerusalén aju witz xjan etzan wuꞌne, ic tzaꞌn ke oyaj in tzaj cyiꞌn aj Israel cyuj ke vas sakxix cyuj tuꞌn tul cyiꞌn tuj njaye. Akine Dios ma chin kꞌmante jlu.

21 Che jawil nscꞌoꞌne junjun cyxol tuꞌn cyoc te pal ex te aj Leví. Akine Dios ma chin kꞌmante jlu.

22 Ax icx in tmaꞌn Kman cyjaꞌ: Ic tzaꞌn ju acꞌaj cyaꞌj ex ju acꞌaj txꞌotxꞌ akeju che bantel wuꞌne che tel te jumajx, icxtzun ke cyiyjile che tel te jumajx tucꞌix cybiye. 23 Ex teyle junjun xjaw, tuj kꞌij oc in tzaj queꞌyin acꞌaj xjaw, ax icx tuj teyle junjun seman, tuj kꞌij te ojlabl, che tzajel cycyakil xjal tuꞌn cycub ẍmejeꞌ nwitze. Akine Dios ma chin kꞌmante jlu.

24 Oc cyex, oc cyilaꞌ cyximlal ke cyimni e cyim tuꞌn tlaj tjawlen cyiꞌn cyib tuꞌn cykꞌojin wiꞌje. Mlay che cyim ke ẍukꞌ che chyoꞌl cyiꞌj ex mlay yupj kꞌakꞌ jatum che oquex xoꞌn tuj. A jlu icꞌbilxix cye cycyakil xjal.