CANTARES
1
Aju bitz mas tbanilxix o bant tuꞌn Salomón.Tnejel bitz
Aju tyol xuꞌj
2 Kꞌontza chꞌin ntzꞌube ttziꞌya. Aju tcꞌujlalila masxix chiꞌ twitz taꞌl twitz uva,
3 tbanilxix tcꞌocꞌjal perjum toc tiꞌja, aju tbiya baꞌn ic tten ic tzaꞌn perjum nneꞌl kojl. Cyjaꞌtzun at nimxix cygan kꞌapoj tiꞌja.
4 Jurat chin tiꞌnxa tucꞌila. Chin tiꞌnxa cyuj ke tjaya, aya rey.
Coro
Tucꞌila ko tele tuj tzalajbil; ctzajel knaꞌne tcꞌujlalila mas chiꞌ twitz taꞌl twitz uva. Cyjaꞌtzun at nimxix cygan kꞌapoj tiꞌja.
Aju tyol xuꞌj
5 Akeye xuꞌj aj Jerusalén, kꞌek xjal kine pero tbanilxix chin queꞌyine; kꞌek kine ic tzaꞌn ke xbalun ja ateꞌ tuj txꞌotxꞌ Cedar, tbanilxix chin queꞌyine ic tzaꞌn ke xbalun cycub ke te makbil tuj tja Salomón.
6 Miꞌn tzꞌoc cykꞌoꞌn cywitze wiꞌje tuꞌnju kꞌek xjal kine, ex ka tuꞌnju ma tzꞌeꞌy ntzꞌumile tuꞌn kꞌij. Ke nxibane tzaj cykꞌoj wiꞌje, oc cykꞌoꞌn kine te cwentil tkan cy-uva, atzunju weye tkan n-uva mintiꞌ in canine cwentil te.
7 Aya at nimxix ncꞌuꞌje tiꞌja, kꞌmantza jatum in pastorina cyiꞌj ke t-ẍneꞌla. ¿Jatum in cheꞌx tiꞌna ke ojlal oc tpon chilcukꞌij? ¿Tikuꞌn at tuꞌn nbete ic tzaꞌn jun xjal nok in betjeꞌ junx cyucꞌil cyẍneꞌl ke tucꞌila?
Coro
8 Ka mintiꞌ baꞌn tuꞌna, aya tbanilxix queꞌyin cywitz mastl xuꞌj, lpeꞌca tiꞌj jatum texlen cykan ẍneꞌl ex pastorina cyiꞌj ke tal tchipa junx cytxlaj cypach ke pastor.
Aju tyol xinak
9 Aya at-xix ncꞌuꞌje tiꞌja, ic ttena te weye ic tzaꞌn jun yew tbanilxix jawol tcarwaj rey Faraón.
10 Tbanilxix che queꞌyin ke tkꞌoꞌtxa cyuꞌn ke tuj t-ẍcyina. Tbanilxix queꞌyin tkula cyuꞌn ke uwj tbanil tal abj perla cybi.
11 Jacu kbinchaye tuj t-ẍcyina kꞌan pwak ttxꞌotxꞌil ex tuꞌn tbaj loꞌtzit tiꞌj tuꞌn sak pwak.
Aju tyol xuꞌj
12 Acux in cub keꞌ rey tiꞌj mes, el juptzꞌaj tcꞌocꞌjal perjum nardo tbi, kꞌiꞌn wuꞌne.
13 Aju xinak cꞌujlaꞌnxix wuꞌne ic tten ic tzaꞌn jun bols tkꞌolil tzeꞌ mirra at tcꞌocꞌjal toc ttzi nxuꞌque.
14 Aju xinak cꞌujlaꞌnxix wuꞌne ic tten ic tzaꞌn bech alheña tbi cꞌocꞌjxix wen, in tzaj chꞌiy cyxol tkan uva tuj lugar En-gadi.
Aju tyol xinak
15 Tbanilxix queꞌyina, aya at-xix ncꞌujlalile tiꞌja, tbanilxix queꞌyina. Ke tbakꞌ twitza tbanilxix che queꞌyin ic tzaꞌn che queꞌyin palom.
Aju tyol xuꞌj
16 Tbanilxix queꞌyina, aya at-xix ncꞌujlalile tiꞌja, tbanilxix queꞌyina.
Aju tyol xinak
Aju chaꞌx chꞌim, atzunju cꞌoquel te kcoẍbil.
17 Aju tzeꞌ wiꞌten, atzunju cꞌajbel te viga twiꞌ kja, atzun tzꞌlom tzaj, atzunju cjawix te twiꞌ kja.