Aju tyol xuꞌj
2
Ic ntene ic tzaꞌn jun bech tuj chkꞌajlaj Sarón, ex ic tzaꞌn jun bech lirio tbi in chꞌiy tuj chkꞌajlaj.Aju tyol xinak
2 Aju xuꞌj cꞌujlaꞌnxix wuꞌne ic tten cyxol ke mastl kꞌapoj ic tzaꞌn jun bech lirio tocx cyxol tkan chꞌiꞌx.
Aju tyol xuꞌj
3 Aju xinak cꞌujlaꞌnxix wuꞌne ic tten cyxol ke mastl xinak ic tzaꞌn jun wiꞌ mansan awaꞌn cyxol mastl tzeꞌ ateꞌ tuj cꞌul.
Ex puro txubtxaj tuꞌn ncub keꞌye tjakꞌ t-xlecumal. Chiꞌxix twitz oc t-xi nloꞌne.
4 Inx tiꞌn tuj ja jatum nnoꞌc nintz waꞌn ex el nnicꞌe tiꞌj in tzaj tqueꞌyin tucꞌil nim tcꞌujlalil.
5 Cykꞌontze twitz uva tzkijsamaj tuꞌn toc wipune, chin cycꞌaꞌchan oque tuꞌn lobj mansan, porque ma chin cub numje tuꞌnju at nimxix ncꞌujlalile.
6 E tocx tkꞌoꞌn xinak tnayaj tjakꞌ nwiꞌye, ex e ntzaj chleꞌne tuꞌn tuꞌn tbankꞌab.
Aju tyol xinak
7 Akeye xuꞌj aj Jerusalén, cytziyantze jun yol weye, nok tuꞌn cylaj ke masat ex ke tal masat te tjakꞌ cꞌul, miꞌn tzꞌel cyiꞌne twatl ju xuꞌj at ncꞌujlalile tiꞌj, baꞌn tuꞌn ttan nok nicꞌxi or taj tuꞌn tel twatl.
Tcabin bitz
Aju tyol xuꞌj
8 Lu tzul ju xinak at nimxix ncꞌujlalile tiꞌj. Lu in nbiꞌne tkꞌajkꞌajel twiꞌ. Lu in tꞌicpaj ttzaj cywiꞌ ke witz, lu in tꞌicpaj cywiꞌ ke tal witz.
9 Aju xinak cꞌujlaꞌnxix wuꞌne ic tten ic tzaꞌn jun masat ex ic tzaꞌn jun tal masat. Lu at tiꞌjxi tlamel ja, lu ma tzul ttzi ventan, ex lu nnoꞌctz tqueꞌyin tuj toyꞌ ventan.
10 Aju xinak cꞌujlaꞌnxix wuꞌne tzaj tmaꞌn weye cyjaꞌ: Weꞌctza aya xuꞌj at ncꞌujlalile tiꞌja; chuxa xuꞌj tbanilxix queꞌyina, koꞌtzun.
11 Bintza, aju tkꞌijlalil jbalil ya ma baj ex ma weꞌ jbal.
12 Ya ma che pokꞌl ke bech tuj cojbil, ya ma pon tkꞌijlalil tuꞌn cybitzan xjal, ya in binjtz tkꞌajkꞌajel cywiꞌ ke tal ẍpoꞌk tuj ktxꞌotxꞌ.
13 Ya at cywitz tkan higo, ex ke cyxmacal tkan uva cꞌocꞌj ticꞌ wen.
14 Aya xuꞌj ic ttena te weye ic tzaꞌn jun palom, nnoꞌcx tewan tiba cyuj ke pic maꞌ cywaꞌl ex xobajilxix ke tewbila, kꞌontza ambil weye tuꞌn toc nqueꞌyine twitza, kꞌontza ambil weye tuꞌn nbinteye tkꞌajkꞌajel twiꞌya. Tbanilxix queꞌyina ex chiꞌxix cybinjtz ke tyola.
Cycabil in che yolin
15 Cytzyuntze ke wech akeju tal chꞌin ke, akeju in baj naj tkan k-uva cyuꞌn oc matok nnoꞌc cyxmacal.
Aju tyol xuꞌj
16 Weye aju xinak cꞌujlaꞌnxix wuꞌne ex akine te te. Ate xinak in pastorin cyiꞌj ke t-ẍneꞌl cyxol tkan bech.
17 Acux in jawil kꞌij ex cyjaꞌ tcub naj klolj, tajtz meltzꞌaja aya xinak cꞌujlaꞌnxix wuꞌne, toca ic tzaꞌn jun masat ex ic tzaꞌn jun tal masat at cywi witz tuj txꞌotxꞌ Beter.