2 Aya cyaꞌj ex aya txꞌotxꞌ, cybintze aju in tmaꞌn Kman: Ma che baj nchꞌisane ke ncꞌwaꞌle, pero ma jaw cyiꞌn cyib wiꞌje. 3 Aju wacẍ nneꞌl tnicꞌ tiꞌj tajwil ex ju bur nneꞌl tnicꞌ tiꞌj jatum in cuꞌx kꞌoꞌn twa tuꞌn tajwil; atzun ke aj Israel akeju etzan wuꞌne, mintiꞌ nneꞌl cynicꞌ wiꞌje ex mintiꞌ cynabl, chi Dios.

4 Ay becꞌbil cywitz ke xjal binchal il, aju cyil ic tten ic tzaꞌn jun iktz alxix tcub cyibaj; ke xjal lu puro binchal mya baꞌn ex jumajx ma che naj. Ma tzꞌel cypaꞌn cyib tiꞌj Kman, ma tzꞌel cyicꞌun aju Dios Xjan cye aj Israel ex ma cyaj cycolin. 5 ¿Tikuꞌn cyaje cucx tuꞌn tcub cycastiwoye? ¿Cucxpe che oquele te miban che bine? Tcyakil tiꞌj cywiꞌye at ẍil ex jumajx ma baj cyipune. 6 Tzajnix t-xe cykane ex max japun baj tuj cywiꞌye, mintiꞌ chꞌin baꞌn at cyiꞌje, tcyakil cyiꞌje at ẍil ex cꞌixbleꞌn; ke txꞌaꞌc ma jaket cytziꞌ ex mi aꞌl jun o tzꞌoc kꞌaninte, mi aꞌl jun o tzꞌoc potzin chꞌin tiꞌj ẍil ex mi aꞌl jun o tzꞌoc kꞌonte chꞌin aseyt tiꞌj tuꞌn tcub taꞌw.

7 Aju cytanmiye biꞌx ma baj xitj ex ma jaw cykꞌakꞌal ke tnam. Cywitzxe ma txi cyiꞌn ke aj kꞌoj cyiꞌje tcyakil twitz cyawale. Tcyakil ma tzꞌoc ic tzaꞌn jun lugar mintiꞌ cynajbil xjal tuj, biꞌx ma naj cyuꞌn xjal ẍe tzaj tuj juntl nasyon. 8 Ma cyaj ten tnam Sión ic tzaꞌn jun tal pach tcub t-xol tkan uva, ic tzaꞌn jun tal pach tuj tmij tkan melón ex ic tzaꞌn jun tnam txolin cyten aj kꞌoj tiꞌjele. 9 Nokwit mi xcyaj cloꞌn cab ox kbet tuꞌn Kman aju Tajaw Tcyakil, icxwitlo kten ic tzaꞌn ke tnam Sodoma ex Gomorra.

10 Akeye nejenel tuj Jerusalén cyucꞌix ke xjal, ic ma che oque ic tzaꞌn ke aj Sodoma ex ke aj Gomorra. Cybintze aju in tmaꞌn Kman cyeye ex cykꞌontz cywiꞌye tiꞌj xnakꞌtzbil tzul tmaꞌn cyeye.

11 Chi Kman in tmaꞌn: ¿Ti tajben weye tuꞌn tul cyiꞌne nim chojbil? Ma baj nganiye cyiꞌj ke ẍneꞌl in cub cypatune ex tiꞌj t-sebyil tal wacẍ; mintiꞌ waje tiꞌj tchcꞌel tor ex tchcꞌel ẍneꞌl ex tchcꞌel tal chip. 12 In che ule yecꞌul cyibe nwitze, pero ¿alcye xkꞌmante cyeye tuꞌn cyicꞌ bete ttxaꞌn npeꞌne? 13 Miꞌn tzaj cyiꞌne mastl cyoyaje weye, akeju mintiꞌ cyajben, mlayx tzicꞌx taꞌw t-sibel storac wuꞌne. In tzaj cytxcoꞌne ke xjal tuꞌn ticꞌset acꞌaj xjaw ex kꞌij te ojlabl, pero mlay tzicꞌx cyninkꞌije wuꞌne ex aju mya baꞌn in cybinchaꞌne. 14 Icꞌun ke cyninkꞌije wuꞌne oc in cub cyicꞌsane acꞌaj xjaw ex ju buybil tib nnoꞌc cyuꞌne; tcyakil jlu mya baꞌn te weye ex mlay tzicꞌx wuꞌne. 15 Oc tjaw cykꞌoꞌn cykꞌabe twitz cyaꞌj tuꞌn cynaꞌne Dios, mlay che tzaj nbiꞌne, porque nojni cyiꞌj cykꞌabe tuꞌn chicꞌ. 16 Cytxꞌjom cyibe ex cyiꞌn ele aju tzꞌil cyiꞌje. Cyiꞌn ele cybinchbene mya baꞌn nwitze ex cycolinxe tuꞌn cybinchanteye mya baꞌn. 17 Cyxnakꞌtzam cyibe tuꞌn cybinchanteye ju baꞌn ex cykꞌonque tilil tuꞌn cybinchanteye aju tzꞌaklxix, che onine cyiꞌj keju in che yajlanjtz, cybinchanxe cyiꞌj ke meba cꞌwaꞌl ex che coline cyiꞌj ke meba xuꞌj.

18 Chi Kman in tmaꞌn: Cytzaje, ko yolin tuꞌn tbant tiꞌj jlu kuꞌn. Masque cyakxix queꞌyin cyile wen, jacu tzꞌoc wuꞌne te sak ic tzaꞌn ttxa cheꞌw, ex masque ic tzaꞌn jun xbalun tocsaꞌn tcꞌaꞌ cyak queꞌyin, pero jacu tzꞌoc wuꞌne te sak ic tzaꞌn sak lan txꞌjoꞌmaj wen. 19 Ka ma txi cycuyine tuꞌn tbant cybine, che waꞌle tiꞌj tbanil twitz awal in tkꞌoꞌn txꞌotxꞌ; 20 katzun cucx ma che tene miban che bine, che cymele tuj kꞌoj. Akine Cymane in chin kꞌmante ju yol lu.

21 Akeye aj Jerusalén, nej ic cytene ic tzaꞌn jun xuꞌj tcwentin tib, atzun jaꞌlo ma che oque ic tzaꞌn jun xuꞌj jawni twitz cyucꞌil xinak. Nej cycyakil keye tzꞌaklxix ex in che bete tuj tumelxix, atzun jaꞌlo ma che oque te byol xjal. 22 Nej ic cytene ic tzaꞌn sak pwak, atzun jaꞌlo ma che oque ic tzaꞌn tzꞌis, ic cytene nej ic tzaꞌn taꞌl twitz uva tbanilxix, atzun jaꞌlo ma che oque ic tzaꞌn taꞌl twitz uva smoꞌn tucꞌil aꞌ. 23 Ke nejenel ateꞌ cyxole miban che niman ex cyamiw cyib cyucꞌil elekꞌ. Cycyakil in cycꞌmoꞌn pwak tuꞌn miꞌn tcub cysentens xjal cyuꞌn, ex oꞌcx cyaj tuꞌn t-xi kꞌoꞌn oyaj cye. Mintiꞌ in xi cybinchaꞌn cyiꞌj ke meba cꞌwaꞌl ex cyiꞌj ke meba xuꞌj oc in che pon xtisil.

24 Cyjaꞌtzun in tmaꞌn Kman aju Tajaw Tcyakil, aju at tipumal ex Cydios aj Israel, chi cyjaꞌ: Oꞌcxtzun jaꞌlo, wuꞌne cchjetel cyiꞌj ke aj kꞌoj wiꞌje ex cꞌoquel t-xel wuꞌne. 25 Cbel nkꞌoꞌne cycastiwoye tuꞌn tel wiꞌne tcyakil mya baꞌn cyiꞌje, ex cꞌoquex nkꞌoꞌne cycyakil cybinchbene mya baꞌn tuj kꞌakꞌ tuꞌntzun cynaj te jumajx; ax icx cꞌelel wiꞌne tcyakil ttzꞌilil in bant cyuꞌne. 26 Che oquel nkꞌoꞌne juntl maj ke jwes cyxole ic tzaꞌn nej, ex ke aj nabl ic tzaꞌn keju e ten nej. Octzun tbant jlu wuꞌne, cꞌoquel kꞌmaꞌn juntl maj cybiye: Aju tnam jatum ateꞌ ke xjal tzꞌaklxix ex ocslalxix ke.

27 Tuꞌnju tzꞌaklxix kine ex tuꞌnju colbil at wucꞌile, che tzokpetel ke xjal najl tuj tnam Sión, akeju cꞌajetz tiꞌj cyanmi; 28 atzun keju miban che niman ex ke aj il che najel, ex keju nneꞌl cypaꞌn cyib wiꞌje che cymel.

29 Ctzajel cychꞌixwiye cyiꞌj tzeꞌ cꞌol ex cyiꞌj tkan awal nim in che tzalaje cyiꞌj, akeju jaw cyscꞌoꞌne tuꞌn cycub tene cꞌulul cywitz ke tilbilal. 30 Ic che oquele ic tzaꞌn jun tzeꞌ cꞌol in tzaj tzꞌak t-xak oc ttzkij, ex ic tzaꞌn tkan awal mintiꞌ aꞌ te aꞌlbil te. 31 Aju xjal at nim tipun cꞌoquel ic tzaꞌn tzkij chꞌim, ex aju takꞌunben cꞌoquel ic tzaꞌn cꞌech; junx che cꞌantel cycabil ex mi aꞌl cbel yupinte cye.