8
Nokwit nxibane ex awt el chꞌiya tiꞌj tim ntxuꞌye. Cyjaꞌtzun oc tcneta wuꞌne tuj cay, jacwitlo tzꞌel ntzꞌubane twitza ex mi aꞌl jun jacu xmayin wiꞌje.2 Jacwitlo txi wiꞌne tja ntxuꞌye, ex jacwitlo tzꞌocx wiꞌne tuj tja, ex jacwitlo aya tzꞌoc te xnakꞌtzal weye. Jacwitlo txi nkꞌoꞌne tcꞌaꞌya taꞌl twitz uva tbanilxix ex taꞌl twitz carnad ẍokꞌ.
3 E tocx tkꞌoꞌn xinak tnayaj tjakꞌ nwiꞌye, ex tuꞌn ntzaj tchleꞌn tuꞌn tbankꞌab.
Aju tyol xinak
4 Akeye xuꞌj aj Jerusalén, cytziyantze weye tuꞌn miꞌn tel cyiꞌne twatl ju xuꞌj at-xix ncꞌujlalile tiꞌj. Cykꞌonxe ambil te tuꞌn ttan nok nicꞌxi or taj tuꞌn tel twatl.
Tkakin bitz
Coro
5 ¿Alcye ju xuꞌj cyjaꞌ ttzaj tuj lugar mintiꞌ cynajbil xjal tuj, pakl tjax twi t-semil ju xinak cꞌujlaꞌnxix tuꞌn?
Aju tyol xinak
Tjakꞌ jun wiꞌ mansan el twatla wuꞌne jatum tzaj cꞌixcꞌoj tiꞌj ttxuꞌya, jatum ul itzꞌja tuꞌn ttxuꞌya.
Aju tyol xuꞌj
6 Seyarin oca tiꞌj tanmiya tuꞌn nbiye, seyarin oca tiꞌj tkꞌaba tuꞌn nbiye. Aju cꞌujlalil mlay tzicꞌx tiꞌj ic tzaꞌn camic mintiꞌ nnicꞌx tiꞌj; mlay tzꞌel wiꞌne nganiye tiꞌja ic tzaꞌn jun xjal mlay tzꞌel tiꞌj tuꞌn tcyim. Aju cꞌujlalil ic tten ic tzaꞌn tkan kꞌakꞌ nim tipun.
7 Aju cꞌujlalil mlay yupj cyuꞌn mar mi cyuꞌn nima. Ka at jun ma tzaj tkꞌoꞌn tcyakil tkꞌinumabl tuꞌn tlakꞌet ju cꞌujlalil tuꞌn, noklo xmaybil jacu tcꞌam.
Coro
8 Aju txin tal kitzꞌin naꞌnx cychꞌiy ke tim. ¿Ti oc kbinchaꞌ tiꞌj ka at jun xjal ma tzul kanilte tuꞌn toc te t-xuꞌjil?
9 Nokwit ic tten ic tzaꞌn jun muro, jacwitlo jaw kbinchaꞌn jun ja maꞌ twaꞌl tibaj, sak pwak ttxꞌotxꞌil; nokwit ic tten ic tzaꞌn jun tlamel ja, jacwitlo tzꞌoc kkꞌoꞌn tzꞌlom wiꞌten tiꞌj.
Aju tyol xuꞌj
10 Ic ntene ic tzaꞌn jun muro, ke wime ic cyten ic tzaꞌn ke ja maꞌ cywaꞌl. Cyjaꞌtzun ic ntene tuj twitz ju xinak cꞌujlaꞌn wuꞌne ic tzaꞌn jun xjal in cnet xtalbil tuꞌn.
11 Attok tkan t-uva Salomón tuj lugar Baal-hamón. Cyaj tkꞌoꞌn tuj cycwent junjun akꞌnal tiꞌj; octzun tpon tyemp tuꞌn tjaw chmet twitz, cjawil cychmoꞌn ex teyle junjun ctzajel tkꞌoꞌn jun mil sak pwak te.
12 Atzun jun mil sak pwak cꞌoquel te teya, Salomón, ex 200 cye ke akꞌnal tiꞌj, atzun weye wawal ax kine cwentil te.
Aju tyol xinak
13 Kꞌontza ambil tuꞌn t-xi nbiꞌne tkꞌajkꞌajel twiꞌya, aya najl cyxol tkan bech. Cyajbil kamiw tuꞌn cybinte tkꞌajkꞌajel twiꞌya.
Aju tyol xuꞌj
14 Chuxa, aya xinak cꞌujlaꞌnxix wuꞌne, chux kelina ic tzaꞌn jun masat, ic tzaꞌn jun tal ttxu masat in kelan cywi witz jatum in che chꞌiy ke bech at cycꞌocꞌjal.