ECLESIASTES
Tcyakilju in baj twitz txꞌotxꞌ nokx gan
1
Atzun ke yol lu tuꞌn ju xjal pacbal, aju tcyꞌajal David aju o cawin tuj Jerusalén.2 Tcyakilju in bant cyuꞌn xjal nokx gan, chi pacbal, tcyakilju in bant cyuꞌn xjal nokx gan. Nokx gan tcyakil.
3 ¿Ti tajben te xjal tuꞌnju in baj tbyon tib tiꞌj akꞌuntl tzalu twitz txꞌotxꞌ?
4 Cycyakil xjal in che cyim, ex in che ul itzꞌj mastl te cyxel, atzun te txꞌotxꞌ mintiꞌ in chꞌexpaj.
5 In jawil kꞌij, ex nneꞌx kꞌij, ex ax nnaꞌj meltzꞌaj juntl maj tuj tlugar tuꞌntzun tjawil juntl maj.
6 Ate cykꞌikꞌ in xumin cyjaꞌ t-xiꞌ tuj tnayaj kꞌij ex in kꞌon welt tuꞌn t-xiꞌ tuj tbankꞌab kꞌij. Ate cykꞌikꞌ in xiꞌ ex nnaꞌjtz meltzꞌaj juntl maj tuj tlugar.
7 Ke nima max in che pon baj cycyakil tuj mar, atzunte mar mintiꞌ in noj; ex ake cye nima in che ajtz meltzꞌaj juntl maj tuj cylugar tuꞌntzun cybet juntl maj tuj cybe.
8 Cycyakil tiꞌxti at twitz txꞌotxꞌ in ko sict cyuꞌn, ex mlay bant tchicꞌbet kuꞌn tzaꞌn tten jlu; ke tbakꞌ witzbaj mlay baj cygan tuꞌn cyqueꞌyin ex ke ẍcyinbaj mlay baj cygan tuꞌn cybin.
9 Aju o baj ojtxi, axtzunju cbajel juntl maj. Aju o binchanjtz ojtxi, axtzunju cbantel juntl maj. Mintiꞌ jun acꞌaj in bant tzalu twitz txꞌotxꞌ.
10 Ex ka at xjal ma tma cyjaꞌ: Queꞌyintza, ate jlu acꞌaj, ka chi, ax icx te jlu o bant atxix ojtxi.
11 Akeju o che bant ojtxi, ya mintiꞌ in che tzaj naꞌntl, ax icxtzun aju cbantel tuj tkꞌijlalil tzul, mlay tzaj naꞌntl cyuꞌn ke xjal che ul itzꞌj te tibajxi.
Aju o tzicꞌ twitz pacbal tiꞌj
12 Akine pacbal o chin oque te rey cye aj Israel tuj Jerusalén, 13 xi nkꞌon wibe tuꞌn tel nnicꞌe tiꞌj ex tuꞌn nxnakꞌtzane tucꞌil nabl tiꞌj tcyakilju in binchanjtz tzalu twitz txꞌotxꞌ. Cyuwxix akꞌuntl o cub tkꞌoꞌn Dios cyibaj xjal tuꞌntzun cyakꞌnanxix tiꞌj. 14 Ex eltzun nnicꞌe tiꞌj ka tcyakilju in binchanjtz tzalu twitz txꞌotxꞌ nokx gan, junx taꞌ ic tzaꞌn jun xjal taj tzaj ttzyuꞌn cykꞌikꞌ tuꞌn tkꞌab.
15 Aju ẍoꞌc tiꞌj, mlay bant tjikumanjtz tiꞌj, aju mintiꞌ at kucꞌil mlay tzꞌoc kkꞌoꞌn te tajlal.
16 Entons, o nmaye tuj wanmiye cyjaꞌ: Ma chꞌiy woclene, ma chin oque mas at nnable cywitz cycyakil keju o che cawin tuj Jerusalén tej naꞌnxtok woque te rey; ma tzꞌoc nim nnable ex ma tzꞌel nnicꞌe tiꞌj nimcu; 17 ex xi nkꞌon wibe tuꞌn tel nnicꞌe tiꞌj nabl, ax icx tuꞌn tel nnicꞌe tiꞌj tzaꞌn tten jun xjal mintiꞌ tnabl ex mintiꞌ ttxolil tyol, ex ma tzꞌel nnicꞌe tiꞌj, tcyakil jlu mintiꞌ tajben. 18 Ax toc, ka at nim tnabl jun xjal, mas in tzaj bis tiꞌj tuꞌn jlu; ex ka at nim baꞌn tuꞌn, ax nim yajbil in tzaj tiꞌj.