PROVERBIOS
Aju cyoclen ke yol in cykꞌoꞌn xnakꞌtzbil
Tuꞌn t-xi kꞌot cynabl xjal, tuꞌn t-xi kꞌot xnakꞌtzbil cye ex tuꞌn tajben te onbil cye tuꞌn tel cynicꞌ cyiꞌj ke yol nim cynabl;
3 tuꞌn tcnet jun xnakꞌtzbil cyuꞌn, tuꞌn tel cynicꞌ tiꞌj jun tiꞌxti ka baꞌn taꞌ, tuꞌn tten cynabl tuꞌn cybinchante aju tzꞌaklxix, tuꞌn cybet tuj tumelxix ex tuꞌn cyten cabal;
4 tuꞌn toc cynabl ke cuꞌxun chꞌin cynabl, ex tuꞌn t-xi kꞌot cynabl tuꞌntzun cyel twitz jun tiꞌxti tuꞌn tbinchet cyuꞌn, ex tuꞌn cyximan tiꞌj alcye baꞌn tuꞌn tbant cyuꞌn.
5 Aju xjal at tnabl ex list in cub tkꞌoꞌn twiꞌ cyiꞌj ke yol baꞌn, tuꞌntzun jlu nnoꞌc mastl tnabl ex tojtzkibl
6 tuꞌn tel tnicꞌ tiꞌj ju in cymaꞌn ke xjal aj nabl, tiꞌj cyyol ex cyiꞌj ke techal in cybinchaꞌn, ex tuꞌn tel cynicꞌ cyiꞌj ke yol in che naꞌn aj nabl cyiꞌj.
7 Aju tumel tuꞌn tten tojtzkibl xjal, atzun tuꞌn t-xob twitz Kman ex tuꞌn tniman te, pero ke xjal miban che bin nneꞌl cyicꞌun aju ojtzkibl ex xnakꞌtzbil.
Ke consej cye cuꞌxun
8 Ncꞌwaꞌl, kꞌonx twiꞌya tiꞌj xnakꞌtzbil in tkꞌoꞌn tmana, ex miꞌn tzicꞌ tnaꞌl tuꞌna aju xnakꞌtzbil in tkꞌoꞌn ttxuꞌya,
9 porque a jlu cꞌoquel te teya ic tzaꞌn jun tbanil adorn ex ic tzaꞌn jun uwj, ex ka ic tzaꞌn jun coron tjax tuj twiꞌya.
10 Ncꞌwaꞌl, ka cyaj ke xjal aj il tuꞌn tcub sbuꞌna cyuꞌn, miꞌn txi tkꞌoꞌna ambil cye.
11 Balo oc cymaꞌ teya: Koꞌ kucꞌile, ko xkꞌukil tiꞌj jun xjal mintiꞌ til tuꞌn tcub kuꞌn oc ticꞌ tuj be;
12 ke xjal baꞌn cymod biꞌx che najel kuꞌn te jumajx, ic tzaꞌn in che naj xjal tuꞌn camic; enter ke in che cuꞌpun tuj cynajbil cyimni.
13 Cnetel tcyakil txcaj kꞌinumabl kuꞌn ex cbajel noj tuj kja tuꞌn tcyakilju cꞌelel kelkꞌaꞌn.
14 Tzaja kucꞌile, ko ten junx, ex junx e tajben kpwak, che chilo teya.
15 Ncꞌwaꞌl, miꞌn txiꞌya cyucꞌil ke xjal lu, paꞌn el tiba tiꞌj be mya baꞌn kꞌiꞌn cyuꞌn,
16 porque toc tilil cyuꞌn tuꞌn cybinchante mya baꞌn, ex toc tilil tuꞌn cycub ke xjal cyuꞌn.
17 Nok gan in cub kꞌot cꞌobil ka in che queꞌyin chyuꞌj tiꞌj.
18 Ke xjal lu cyiꞌjx in cub cykꞌoꞌn tramp ex in xi cykꞌon cyib tuj xobajil.
19 Tuꞌnxju in pon cycꞌuꞌj tiꞌj in che naj; atzun bajsbil cye xjal jlu, akeju in pon cycꞌuꞌj tiꞌj tuꞌn cyelkꞌaꞌn.
Jun txocbil tuꞌnju kꞌol nabl
20 Cyuj ke cay ex cyuj plas in binjtz tkꞌajkꞌajel twiꞌ ju kꞌol nabl,
21 in xi tmaꞌn tyol ttzi tpwertil tnam ex cyuj ke lugar jatum in che chmet xjal, chi in tmaꞌn:
22 Akeye cuꞌxun mintiꞌ cynable, baꞌn che xmayine ex miban che bine: ¿Jtoj ban tcyaj cycoline tuꞌn cytene mintiꞌ cynable? ¿Jtoj ban tcyaj cycoline aju tzalajbil tuj cywitze tuꞌn cyxmayine cyiꞌj cyucꞌile? ¿Maj cucx cꞌelel cyicꞌune aju ojtzkibl?
23 Cykꞌontz cywiꞌye tiꞌj ju in che oc nmayoꞌne tiꞌj ex jacu txi nkꞌoꞌne cynable; cxel nmaꞌne cyeye alcye nximbetze.
24 O che tzaj ntxcoꞌne tuꞌn cytzaje wucꞌile, pero mintiꞌ ma chinx cynimane.
25 Nokpe ma tzꞌel cyicꞌune nconseje ex mintiꞌ cyaje tuꞌn cyoc nmayoꞌne.
26 Cyjaꞌtzun cpol tkꞌijlalil tuꞌn woc tene tzeꞌl cyiꞌje oc ttzaj mya baꞌn cyibaje; oc chin xmayile cyiꞌje oc ttzaj nim xobajil cyiꞌje,
27 ex oc ttzaj xobajil cyibaje tucꞌix yajbil ex bis, a jlu mer ic tzaꞌn jun xcyakinpaẍ in baj naj tcyakil tuꞌn.
28 Atzun kꞌij lu oc che txoquele wiꞌje, pero mlay che tzaj ntzakꞌweꞌne; oc che jyole wiꞌje, pero mlay chin cnete cyuꞌne;
29 porque nneꞌl cyicꞌune aju ojtzkibl ex miꞌn cyaje tuꞌn cynimane Kman.
30 Mintiꞌ cyaje tuꞌn t-xi cybiꞌne nconseje ex mintiꞌ in cub tuj cywitze tuꞌn cyoc nmayoꞌne.
31 Cꞌicꞌex nim cyuꞌne tuꞌn tlaj cymodiye mya baꞌn. Biꞌx cjawitz baj cyganiye tiꞌj cyximbetze mya baꞌn.
32 Keju mintiꞌ cynabl in che naj tuꞌnju atx taj cynabl, ex keju miban che niman in che naj tuꞌnju mintiꞌ cyaj tiꞌj tuꞌn cybinchante jun tiꞌxti;
33 atzunju xjal ma tzaj tkꞌoꞌn twiꞌ tiꞌj nyole, oc cꞌankꞌil tuj tzalajbil ex mlayx tzaj t-xobil twitz nok alcye tzul tiꞌj.