3 ka ma cubsana tuꞌn ttzaj kꞌoꞌn tojtzkibla, ex ka ma txi tkanina tuꞌn ttzaj kꞌoꞌn tnabla;

4 ka ma txi tkꞌonxix tiba tuꞌn tjyona tiꞌj, ic tzaꞌn in jyona tiꞌj sak pwak ex ka jun kꞌinumabl,

5 octzun cꞌelel tnicꞌa tiꞌj tzaꞌn tten tuꞌn t-xoba twitz Kman ex tuꞌn tnimana te, ex cꞌelel tnicꞌa tiꞌj tzaꞌn tten tuꞌn tojtzkinteya Dios.

6 Porque ate Kman in tzaj kꞌonte nabl; ex tucꞌil in tzaj ojtzkibl ex nabl.

7 In onin Kman cyiꞌj xjal in che ankꞌin tuj tumelxix ex mintiꞌ cypaltil, ex in colin cyiꞌj;

8 cwentin tuꞌn akeju in che bet tuj tumelxix, ex in colin cyiꞌj keju in che niman te.

9 Ax icx cꞌelel tnicꞌa tiꞌj aju tjikumal tiꞌj ex aju tzꞌaklxix, ex tiꞌj tcyakil aju baꞌn tuꞌn tbant tuꞌna;

10 cꞌoquel tnabla, ex tuꞌnju nabl lu ctzalajela.

11 Aju mejor tnabla ex tojtzkibla che oquel te colil tiꞌja;

12 cyuꞌntzun ke jlu oc cletela tuj be mya baꞌn ex cywitz ke xjal mya baꞌn ke,

13 ex cywitz keju in cyaj cycolin ju be baꞌn ex in cheꞌx cyuj ke be klolj cyuj,

14 ex cywitz keju in che tzalaj tuꞌn cybinchante mya baꞌn ex nimxix in che tzalaj tiꞌj cybinchben plojxix,

15 ex in che bet cyuj ke be ẍoꞌc cyiꞌj ex ma cyaj cycolin ju be jikun tiꞌj.

16 Tuꞌn tnabla ex tojtzkibla oc cletela twitz ju xuꞌj aj pajil, aju mejor xmoxin tuꞌn tyol,

17 aju cyaj tcolin tchmil aju mojeꞌ tucꞌil tej kꞌapojxtok, ex nnicꞌ tnaꞌl tuꞌn aju yol otok txi ttziyan te Dios.

18 Aju be in pon tja ju xuꞌj lu, atzun be te camic;

19 akeju in che ocx tuj tja xuꞌj lu mintiꞌ in che ajtz meltzꞌaj, ex mlay che bet juntl maj tuj be te chwinklal.

20 Cyjaꞌtzun beta tuj be baꞌn ex xnakꞌtzam tiba tiꞌj cymod ke xjal tzꞌaklxix.

21 Porque keju in che ankꞌin tuj tumelxix ex mintiꞌ cypaltil, cucx che ankꞌil twitz txꞌotxꞌ;

22 atzun keju binchal mya baꞌn ex ke aj il, biꞌx che elex lajoꞌn tuj ex mintiꞌ cyoclen tiꞌj.