2 porque clekꞌebil tuj tkꞌija cyuꞌn ex cꞌankꞌila tuj txubtxaj.

3 Miꞌn cyaj tcolina aju cꞌujlalil ex ju yol axix toc; kꞌoꞌn cuba ke tkula ic tzaꞌn jun uwj. Awaꞌn cuꞌxa ke tuj tanmiya;

4 ka ma tbinchaya icju, ctzalajel Dios tiꞌja ax icx ke xjal.

5 Keꞌc tcꞌuꞌja tiꞌj Kman tuꞌn tcyakil tanmiya ex mya tuꞌn toc keꞌ tcꞌuꞌja tiꞌj texa tnabla.

6 Naꞌntza Kman tiꞌj tcyakilju cbantel tuꞌna, ex a Kman cxel ẍaklun teya tuj be jikun tiꞌj.

7 Miꞌn jaw tniman tiba ka at nim tnabla; nimana te Kman ex paꞌn el tiba tiꞌj mya baꞌn:

8 porque atzun jlu ic tzaꞌn jun kꞌanbil teya tuꞌn toc tipun t-ximlala.

9 Kꞌonxa nimbil te Kman ex kꞌonxa jun oyaj te tiꞌj tkꞌinumabla ex tiꞌj tnejel twitz tawala;

10 ka ma tbinchaya icju, che nojel ke ttxꞌutxꞌa wen ex ke tcubil taꞌl twitz t-uvaya.

11 Ncꞌwaꞌl, ka ma cub cawina tuꞌn Kman, miꞌn tzꞌel ticꞌuna, ex miꞌn tzaj tkꞌoja oc toc ilina tuꞌn;

12 porque te Kman in che cub tcawin keju cꞌujlaꞌn ke tuꞌn, ic tzaꞌn jun mambaj in che cub tcawin tcꞌwaꞌl cꞌujlaꞌnxix tuꞌn.

13 At tzalajbil teju xjal in cnet nabl tuꞌn ex nneꞌl tnicꞌ tiꞌj alcye baꞌn tuꞌn tbant tuꞌn;

14 porque mas maꞌ t-xilen jlu twitz sak pwak ex mas nim tajben twitz kꞌan pwak.

15 Aju nabl mas maꞌ t-xilen cywitz ke tbanil abj perla cybi; ex mi jun juntl tiꞌxti tbanil in pon cycꞌuꞌj xjal tiꞌj, jacu pon ic tzaꞌn jlu.

16 Aju nabl, nej in tzaj tkꞌoꞌn chwinklal, ex te tibajxi in tzaj tkꞌoꞌn kꞌinumabl ex nimbil.

17 Ka ma ko oc lpeꞌ tiꞌj be kꞌiꞌn tuꞌn, puro baꞌn jlu; ex ka ma ko bet tuj tbe, jacu ko ten tuj tzalajbil.

18 Tzul kꞌoꞌn tchwinklal xjal aju in cnet nabl tuꞌn; at tzalajbil te cye keju mintiꞌ in xi cytzokpiꞌn.

19 Tuꞌn tnabl Kman cub tbinchaꞌn txꞌotxꞌ, ex tuꞌn tojtzkibl cyuwset cyaꞌj;

20 tuꞌn tnabl e jaket twi aꞌ, ex tzaj jbal tuj muj tuꞌn.

21 Ncꞌwaꞌl, cucx tuꞌn tten tnabla, ex miꞌn cyaj tcolina aju tnabla baꞌn,

22 porque cyuꞌn jlu ctzajel kꞌoꞌn tchwinklala ex che oquel ic tzaꞌn jun adorn te teya.

23 Cyjaꞌtzun oc tbeta tuj tbeya mintiꞌ t-xobil tiꞌja, ex mlayx jaw tolja.

24 Oc tojlana mintiꞌ tuꞌn t-xoba, ex oc tcub coẍeꞌya, txubtxaj ctala.

25 Mlay xoba cywitz ke xobajil minabencu che tzajel, ex mi twitz ju cꞌixbisabl tzul cyibaj ke binchal mya baꞌn,

26 porque ate Kman ckꞌukbalte tcꞌuꞌja, ex oc cletela tuꞌn tuꞌn miꞌn tcub tzꞌaka tuj cꞌobil.

27 Miꞌn cub t-xcꞌayin tiba tuꞌn tbinchanteya jun xtalbil teju xjal in kanin teya; ka jacu bant tuꞌna, binchama.

28 Ka at tumel tuꞌn t-xi tkꞌoꞌna onbil kꞌonxa jaꞌlo, miꞌn cyaj tkꞌoꞌna te nchiꞌj.

29 Miꞌn cub t-ximana tuꞌn tbinchanteya mya baꞌn tiꞌj tvesina aju najl ttxlaja ex kꞌukl tcꞌuꞌj tiꞌja.

30 Miꞌn tzꞌoc tena kꞌojlel tiꞌj juntl ka mintiꞌ jun mya baꞌn otok tbincha tiꞌja.

31 Miꞌn tzaj loꞌch tcꞌuꞌja tiꞌj jun xjal jurat in jaw kꞌojl, ex miꞌn tzꞌel tcanoꞌna aju in tbinchaꞌn;

32 porque icꞌun tuꞌn Kman ke xjal binchal mya baꞌn; atzun keju in cybinchaꞌn tzꞌaklxix, at tmojbabl tib cyucꞌil.

33 In tzaj tkꞌoꞌn Kman mya baꞌn cyibaj keju ateꞌ tuj tja ju xjal binchal mya baꞌn, atzun keju ateꞌ tuj tja ju xjal tzꞌaklxix, in che cub tcyꞌiwlaꞌn.

34 In xmayin Kman cyiꞌj keju baꞌn che xmayin, atzun keju mans in tzaj tkꞌoꞌn Dios t-xtalbil cye.

35 Akeju at cynabl, che jawil nimsaꞌn, atzun keju mintiꞌ cynabl, ctzajel cychꞌixwi.