2 Ma txi nkꞌoꞌne jun xnakꞌtzbil baꞌn cyeye, cyjaꞌtzun miꞌn cyaj cycoline ke nxnakꞌtzbile.

3 Ax icx weye, cꞌwaꞌlbaj kine tej ntzaj chꞌiye; nim in cꞌujlanjtze tuꞌn ntxuꞌye,

4 ex tzaj tkꞌoꞌn nmane xnakꞌtzbil weye, chi cyjaꞌ: Cꞌuꞌnxa nyole tuj tanmiya; binchama aju ma txi nmaꞌne teya, ex cꞌankꞌiltzuna.

5 Jyoma aju nabl ex aju ojtzkibl; miꞌn tzicꞌ cynaꞌl ke nyole tuꞌna ex miꞌn tzꞌel tpaꞌn tiba cyiꞌj.

6 Cꞌujlama aju nabl, miꞌn cyaj tcolina, ex atzunju ccolil tiꞌja.

7 Aju tuꞌn tbant tuꞌna tnejel twitz tcyakil, jyoma aju nabl ex aju ojtzkibl.

8 Cꞌujlama ex cjawil nimsaꞌna tuꞌn; tzyuma ex ckꞌonjtzel nimbil teya tuꞌn;

9 ctzajel tkꞌoꞌn jun cꞌalbil twiꞌya tbanilxix, ex cꞌoquel ic tzaꞌn jun coron tjax tuj twiꞌya te nimbil teya.

10 Ncꞌwaꞌl, ka ma cheꞌx tbiꞌna ke nyole, ex ka ma cheꞌx tnimana, ctela nim kꞌij twitz txꞌotxꞌ.

11 Akine chin xel kꞌinte teya tuj be jatum tuꞌn tten tnabla; ex wuꞌne cbetela tuj be jikun tiꞌj.

12 Oc texa betel mlay ten jun tolsabl tuj tbeya, ex ka ma jaw ojkelena mlay jaw tolja.

13 Cꞌuꞌnxa xnakꞌtzbil tuj tanmiya ex miꞌn cyaj tcolina; xnakꞌtzam tiba tiꞌj, porque chwinklal jlu te teya.

14 Miꞌn tzꞌoc lpeꞌya tiꞌj cybinchben xjal mya baꞌn, ex miꞌn tzꞌoc lpeꞌya tiꞌj cymod mya baꞌn.

15 Miꞌn beta tuj cybe; paꞌn el tiba cyiꞌj, ex lajonx teya tbe,

16 porque mya txubtxaj in che tan ka mintiꞌ ma cybincha mya baꞌn; ex miban tzꞌocx watl tuj cywitz ka naꞌnxtok tcub tzꞌak jun xjal cyuꞌn.

17 Aju cyelkꞌaben ex ju mya baꞌn in bant cyuꞌn, ic tten te cye ic tzaꞌn cywa ex cycꞌa.

18 Atzun cybe keju tzꞌaklxix ic tten ic tzaꞌn spicꞌun oc ttzaj t-xe cyaꞌj ex in spicꞌeꞌ ttzaj ocxi t-spicꞌeꞌ tcyakil tuꞌn t-spicꞌumal kꞌij.

19 Atzun cybe keju binchal mya baꞌn puro klolj tuj; ex mintiꞌ baꞌn cyuꞌn al iꞌj in che jaw tolj.

20 Ncꞌwaꞌl, bintza nyole ex kꞌontz twiꞌya tiꞌj,

21 miꞌn cyaj tcolina ex cꞌuꞌnxa tuj tanmiya.

22 Porque aju yol lu in tkꞌoꞌn chwinklal cye ke xjal in che jyon tiꞌj, ex in ten cyximlal tuj txubtxaj tuꞌn.

23 Aju mas baꞌn tuꞌn tbinchanteya twitz tcyakil, kꞌonca cwent tiꞌj t-ximbetza, porque tiꞌj jlu in tzaj chwinklal.

24 Miꞌn yolina tiꞌj yol mya ax toc, paꞌmil tiba tiꞌj nicꞌaj yol.

25 Queꞌyinxa aju be tcub twitza ex miꞌn tzꞌel tiꞌn twitza tiꞌj.

26 Kꞌoꞌnc tcwenta tiꞌj jatum cbel tkꞌoꞌn tkana, ex atzun kꞌoncu tkana tibaj txꞌotxꞌ cyuw tten.

27 Miꞌn tzꞌel tzpeta tiꞌj tbeya, ex paꞌmil tiba tiꞌj be mya baꞌn.