2 tuꞌntzun tel tnicꞌa tiꞌj alcye baꞌn tuꞌn tbant tuꞌna, ex jacu yolina jun yol tucꞌil ojtzkibl.

3 Aju tyol ju xuꞌj aj pajil baꞌnxix tbinx, ax icx tkꞌajkꞌajel twiꞌ puro txubtxaj tbinx wen;

4 pero te tibajxi mas cꞌa nnoꞌc ic tzaꞌn cꞌul t-xcꞌa wacẍ, ex mas at ttziꞌ ic tzaꞌn jun spad te cabe pacꞌ ttziꞌ.

5 Aju in bet tucꞌil xuꞌj lu atzun in xiꞌ tuj camic; porque aju be kꞌiꞌn tuꞌn txuc in xiꞌ tuj cynajbil cyimni.

6 Mintiꞌ taj xuꞌj lu tiꞌj be te chwinklal ex mintiꞌ nnoꞌc tkꞌoꞌn tcwent tiꞌj tbe mya tuj tumel taꞌ.

7 Cyjaꞌtzun ncꞌwaꞌl, binxa aju in xi nmaꞌne ex miꞌn tzꞌel tpaꞌn tiba cyiꞌj ke nxnakꞌtzbile.

8 Tel lakꞌeya tiꞌj xuꞌj aj pajil; ex miꞌnlpe txi lakꞌeya ttzi tja,

9 tuꞌntzun miꞌn t-xi tkꞌoꞌna tkꞌinumabla cye junxitl xjal ex tuꞌn miꞌn toc lakꞌeꞌ tuj tabkꞌiyila tuꞌnju xuꞌj jawni sbun,

10 ex tuꞌn miꞌn tbaj cywaꞌn junxitl xjal aju in tkꞌoꞌn takꞌunbena, aju ma cnet tuꞌna tuꞌn sictleꞌn;

11 ex tuꞌn miꞌn tjaw okꞌa oc tpon or tuꞌn tcyima, oc tnaj tcyakil t-ximlala tuꞌn yabil.

12 Ex cꞌoqueltzun tena kꞌmalte: ¿Tzaꞌn tten el wicꞌune aju o cawin wiꞌje? ¿Tzaꞌn tten mintiꞌ xi nnimane aju oc mayonte weye tiꞌj mya baꞌn?

13 Mintiꞌ xi nnimane ke xnakꞌtzal weye ex mintiꞌ xi nkꞌon nwiꞌye tiꞌj cyyol keju e kꞌonte xnakꞌtzbil weye.

14 Ex nok tuꞌn chꞌintl chꞌixmi in naje tuj mya baꞌn cywitz cycyakil tnam xjal.

15 Ka in txket tiꞌj tcꞌuꞌja, cꞌana aꞌ tuj xoch etzan tuꞌna.

16 Miꞌn baj tkoꞌna aꞌ in jatz jlet tuj tjaya; miꞌn baj tyajana tuꞌn tbaj tkoꞌna tuj cay.

17 Aju xoch ex aju aꞌ nok tecuya jlu, mya te juntl; miꞌn txi tkꞌoꞌna cye junxitl xjal.

18 Cyꞌiwlaꞌnxwit ju twi aꞌ aju etzan tuꞌna. Tzalajxa tucꞌil xuꞌj aju mojeꞌya tucꞌil tuj tcuꞌxumala.

19 Icwit tzꞌeꞌla te teya ic tzaꞌn jun ttxu masat tbanilxix queꞌyin. Tzalajxa tiꞌj t-xuꞌjila oc ttzaj chlena tuꞌn, ex tzalajxa tiꞌj tcꞌujlalil at tiꞌja.

20 Ncꞌwaꞌl, ¿tikuꞌn cꞌoquel t-xoꞌn tganiya tiꞌj jun xuꞌj aj pajil? ex ¿tikuꞌn ctzajel tchleꞌna junxitl xuꞌj?

21 In tqueꞌyin Kman tcyakil aju in cybinchaꞌn xjal, ex toc twitz cyiꞌj oc in che bet tuj cybe.

22 Aju xjal binchal mya baꞌn cnajel tuꞌnx tbinchben mya baꞌn; ex tuꞌnx til cbajel cꞌaloꞌn ic tzaꞌn tuꞌn sakbak.

23 Cnajel tuꞌnju mintiꞌ in tjacꞌunte tib; cxeꞌl tuj najen tuꞌnju cyuw twiꞌ.