Jun yol tuꞌn miꞌn kcyaj weꞌ tiꞌj tcꞌas jun xjal
6
Ncꞌwaꞌl, ka ma cyaj weꞌya tiꞌj tcꞌas jun tucꞌila ex ka ma txi ttziyana tuꞌn tchjet tcꞌas jun xjal mintiꞌ ojtzkiꞌn tuꞌna,2 tuꞌnxa in baj tcꞌoban tiba, ex tuꞌnx ju tyola in tzyeta.
3 Ncꞌwaꞌl, clom tiba yaque ma cub tzꞌaka tuj tkꞌab tucꞌila. Aju tuꞌn tbinchanteya jaꞌlo, atzun jlu: Mansin cub tiba ex cubsana twitz ju cꞌasbenal tuꞌn tel tiꞌn tbiya tiꞌj tcꞌas.
4 Miꞌn tzicꞌ tana ex miꞌn ojlana ka naꞌnxtok tbant tiꞌj jlu tuꞌna,
5 tel oka ic tzaꞌn nneꞌl ok jun masat twitz jun cambal, ex ic tzaꞌn nneꞌl ok jun chyuꞌj tiꞌj jun cꞌobil.
Jun consej cye ke xjal cyꞌaj
6 Aya xjal cyꞌaj, txiꞌya queꞌyil cye ke snic; kꞌoꞌnca cwent cyiꞌj alcye in cybinchaꞌn ex canoꞌmila cyiꞌj:
7 Masque mintiꞌ jun nejenel cyxol ex mintiꞌ jun caporal cyiꞌj ex mintiꞌ jun kꞌmalte cye alcye tuꞌn tbant cyuꞌn,
8 in baj cycꞌuꞌn cywa tuj coresma, ex in baj cychmoꞌn tuj tkꞌijlalil oc in jaw twitz awal.
9 Aya xjal cyꞌaj, ¿jtoj ban tel tiꞌn twatla? ex ¿jtoj ban tjaw weꞌya?
10 Tuꞌn tlaj cucx ttana ex cucx tpichꞌun twiꞌya tuꞌn watl ex cucx tcub ttzꞌulin tkꞌaba tuꞌn ttana,
11 tzul mebayil tiꞌja ex cꞌoquel tzokpaj tiꞌja ic tzaꞌn jun betin xjal kꞌiꞌn ubl tuꞌn.
Aju tmod xjal binchal mya baꞌn
12 Aju xjal binchal mya baꞌn ex icꞌbil twitz, oꞌcx nicꞌaj yol in yolin tiꞌj;
13 in cub t-xmutzꞌin ttzi twitz tuꞌn tyecꞌunte ka mya ax toc aju in tmaꞌn ex in tyecꞌun ke señ tuꞌn tkan, ex in xi tchꞌicun cyuꞌn ke tal tkꞌab;
14 aju tnabl xjal lu jumajx tuj mya baꞌn taꞌ, oꞌcx in ximan tuꞌn tbinchante mya baꞌn, ex nnoꞌc tilil tuꞌn tuꞌn cykꞌojin xjal cyxolx.
15 Cyjaꞌtzun nok minaben ctzajel jun xitbil tiꞌj; jurat cnajel, ex mlay bant tclon tib.
Aju nneꞌl ticꞌun Kman Dios
16 At kak tiꞌxti ex ka wuk jumajx icꞌun tuꞌn Kman, ex atzun ke jlu:
17 Aju xjal in jaw tniman tib, aju xjal nicꞌal yol, aju xjal in cub byonte cye ke xjal mintiꞌ cyil,
18 aju xjal in ximan tiꞌj alcye mya baꞌn tuꞌn tbant tuꞌn, aju xjal in xi kelan tuꞌn tbinchante mya baꞌn,
19 aju testiw sbul ex nicꞌal yol, ex aju in toꞌyin cye xjal cyerman cyib tuꞌn cykꞌojin cyxolx.
Aju in tzaj tuꞌn tlaj in cybinchaꞌn xjal aj pajil
20 Ncꞌwaꞌl, nimanxa ke tmandamyent tmana, ex miꞌn tzꞌel ticꞌuna aju xnakꞌtzbil in tkꞌoꞌn ttxuꞌya.
21 Awaꞌn cuꞌxa ke tuj tanmiya, ex kꞌon cuba ke tkula;
22 atzun ke jlu che ẍaklul teya tuj tbeya ex cꞌoquel cwentina cyuꞌn oc tcub tana, ex oc che yolil tucꞌila oc tel twatla.
23 Porque ke mandamyent ic cyten ic tzaꞌn ttxaꞌn tzaj, ex ke xnakꞌtzbil jun spicꞌun ke. Oc ttzaj kꞌoꞌn xnakꞌtzbil teya ex oc tcub cawina, atzun jlu be te chwinklal te teya.
24 Oc che colil tiꞌja twitz ju xuꞌj aj pajil ex twitz junxitl xuꞌj aju jawni xmoxin tuꞌn tyol.
25 Ex miꞌn tzꞌoc tachina tuꞌnju mejorxix queꞌyin; ex miꞌn txi tkꞌon tiba tuꞌn ttzyeta tuꞌn, tuꞌnju in tzaj tqueꞌyin tiꞌja.
26 Aju xuꞌj jawni twitz cyucꞌil xinak in keꞌ tcꞌuꞌj nok tuꞌn chꞌin twa, atzun teju xuꞌj aj pajil, oꞌcx nnoꞌc lpeꞌ tiꞌj jun xjal kꞌinun maꞌ t-xilen.
27 Ka at jun ma tzꞌoc tkꞌoꞌn kꞌakꞌ ttzi t-xuꞌc, ctzꞌeꞌyil t-xbalun.
28 Ka at jun ma tzicꞌx bet tibaj ttxaꞌn xkꞌaꞌl in cꞌant kꞌakꞌ tiꞌj, ctzꞌeꞌyil tkan.
29 Ax icxtzun ctembil aju xinak in cub tan tucꞌil t-xuꞌjil tucꞌil; mlay tzicꞌx tiꞌj tuꞌn miꞌn tcub tcastiw.
30 Mintiꞌ nneꞌl cyicꞌun xjal aju elekꞌ ka in elkꞌan nok tuꞌn tnoj tcꞌuꞌj;
31 pero ka ma cnet lu in elkꞌan, il tiꞌj tuꞌn taj tkꞌoꞌn wuk maj t-xel, ex tuꞌn t-xi tkꞌoꞌn tcyakil aju at te.
32 Mintiꞌ tnabl ju xinak in tbinchaꞌn aj pajil. Aju xinak in tbinchaꞌn icju, tuꞌnx tib in naj.
33 Cbajel bajuꞌn, cꞌelel icꞌun, ex aju tchꞌixwi mlayx naj.
34 Aju xinak at twitz tiꞌj t-xuꞌjil, jurat in tzaj tkꞌoj ex mlay cub tnajsaꞌn til juntl; il tiꞌj cbel tcastiw tuꞌn;
35 mlay tcꞌam chojbil tiꞌj ju otok bant tuꞌn juntl ex mlay cub tcꞌuꞌj tuꞌn nimcu oyaj.