2 Nimanxa ke nmandamyente ex ke nxnakꞌtzbile; cwentinxa ke ic tzaꞌn nnoꞌc tcwentina ke t-santil tbakꞌ twitza, tuꞌntzun tankꞌina.

3 Cꞌaloꞌn oca ke cyiꞌj ke tal tkꞌaba, ex awaꞌn cuꞌxa ke tuj tanmiya.

4 Kꞌoꞌnca ju nabl ic tzaꞌn tanba, ex kꞌoꞌnca ju ojtzkibl ic tzaꞌn tamiwoya.

5 Porque ake jlu che clol teya twitz ju xuꞌj aj pajil ex twitz juntl xuꞌj cyeꞌyix tponlen tyol.

6 At jun kꞌij in chin queꞌyintoke ttzi nventaniye,

7 o wile jun cꞌloj cuꞌxun mintiꞌ in che ximan tiꞌj alcye baꞌn tuꞌn tbant cyuꞌn, ex oc nkꞌoꞌne cwent tiꞌj jun jumajx mintiꞌ tnabl.

8 Tej tpon tuj scyin, icꞌx tuj cay tuꞌn tpon tja ju xuꞌj aj pajil,

9 otok tzꞌoc kax ex cyjaꞌtok toc yupj.

10 Etz naj ju xuꞌj canul tiꞌj cuꞌxun lu, tbinchanxix tib tuj t-xbalun, aju in ajbenxix tuꞌn tuꞌn tyaẍin, ex jawni xmoxin,

11 nokxix lonx jun xuꞌj jawni twitz tuꞌn tbinchante mya baꞌn ex mintiꞌ in ten tja,

12 nok in bet ticꞌ tuj cay, tuj plas ex tuj scyin ex in xkꞌukin tiꞌj nok alcyexcu xinak ma tzicꞌx tuj cay.

13 Tzajtzun chleꞌn cuꞌxun tuꞌn xuꞌj ex el ttzꞌuban twitz mintiꞌ tchꞌixwi tiꞌj, ex xi tmaꞌn te:

14 O txi ntziyane tuꞌn t-xi nkꞌoꞌne jun alumaj te oyaj te mojbabl tibil ex ma japun wuꞌne jaꞌlo.

15 Cyjaꞌtzun ma chin tzaje canul tiꞌja, porque at nim nganiye tuꞌn toc nqueꞌyine twitza ex lu ma cneta wuꞌne.

16 Ma cub nlicꞌune ju xnokꞌal twi nwatbile ktzꞌumin twitz, tzajni tuj Ejipt,

17 ex ma baj nkꞌoꞌne perjum tiꞌj; atzun ke jlu: Mirra, áloe, ex canela.

18 Ttzaja, ex jacu ko achin wen tuj enter konicꞌan,

19 porque mi aꞌl nchmile, ma txiꞌ tuj jun tbe najchak;

20 ma txi tiꞌn jun chꞌuꞌẍ pwak ex maxi tzul meltzꞌaj ocxi ttijin xjaw, chi xuꞌj.

21 Cub tiꞌj tnabl cuꞌxun tuꞌn tyol xuꞌj cyeꞌyix tponlen wen;

22 minabencu oc lpeꞌ naj cuꞌxun tiꞌj ju xuꞌj, ic tzaꞌn nnoꞌc lpeꞌ jun wacẍ tiꞌj jun xjal tuꞌn t-xi kꞌiꞌn tuj biybil te, ex ic tzaꞌn jun masat oc in tzyet tuꞌn tramp;

23 in tzaj xoꞌn naj jun plech tiꞌj tanmi tuꞌntzun tcyim. Ic tten ic tzaꞌn jun chyuꞌj nnoꞌcx tkꞌon tib tuj cꞌobil, mintiꞌ baꞌn tuꞌn ka te tzuybil te tuꞌn tnaj.

24 Cyjaꞌtzun ncꞌwaꞌl, chin tbincuya ex kꞌontz twiꞌya tiꞌj nyole.

25 Miꞌn txi tkꞌoꞌna t-ximbetza tiꞌj ju xuꞌj lu, miꞌn tzꞌoc lpeꞌya tiꞌj, porque jacu naja,

26 pwes nimxi xjal o che cub tbyoꞌn ex nimxi jumajx o che naj tuꞌn.

27 Aju tuꞌn kxiꞌ tuj be in pon ma tja, junx taꞌ ic tzaꞌn tuꞌn kcuꞌpun max tuj cynajbil cyimni.