2 In cub weꞌ cywiꞌ ke witz, ex in cub ten jatum in baj cypaꞌn cyib ke be,

3 in kꞌajt cytzi tpwertil tnam, ax icx jatum nnoꞌcx be tuj tnam, ex in tmaꞌn cyjaꞌ:

4 Akeye xinak, te cyeye aju nyole lu:

5 Akeye cuꞌxun mintiꞌ chꞌin baꞌn cyuꞌne ex mintiꞌ cynable, cyxnakꞌtzam cyibe tuꞌn tten cynable ex tuꞌn tel cynicꞌe tiꞌj alcye tuꞌn tbant cyuꞌne.

6 Cykꞌontz cywiꞌye tiꞌj ju yol cxel nmaꞌne maꞌ toclen ex tzꞌaklxix.

7 Ax toc aju yol cxel nmaꞌne, porque miꞌn waje tuꞌn t-xi nmaꞌne nicꞌaj yol.

8 Tcyakil nyole cxel nmaꞌne puro tzꞌaklxix; mi jun mya ax toc ex mi jun ẍoꞌc tiꞌj.

9 Clarxix ke nyole ex tzꞌaklxix tuj twitz ju xjal at tnabl ex elni tnicꞌ tiꞌj.

10 Te t-xel sak pwak ex kꞌan pwak, cyjyome aju xnakꞌtzbil ex aju ojtzkibl.

11 Aju nabl mas wiꞌyilxix cywitz ke tal abj tbanilxix, ex aju tiꞌxti nim in pon cycꞌuꞌj xjal tiꞌj mlayx pon ic tzaꞌn ju nabl.

12 Akine nabl, junx najl kine tucꞌil ojtzkibl, at nnable ex mejorxix consej at wucꞌile.

13 Aju tuꞌn kniman te Kman, atzun tuꞌn tel kicꞌun ju mya baꞌn. Aju xjal in jaw tniman tib, aju xjal jawni twitz, aju cybinchben xjal mya baꞌn ex ju nicꞌaj yol, icꞌun ke wuꞌne.

14 Akine in chin cub ximante tuꞌn tbant jun tiꞌxti ex in japun wuꞌne; ex wucꞌile taꞌ nabl ex ipumalj.

15 Wuꞌne in bant cycawin ke rey ex wuꞌne in che bant ke ley tuj tumelxix cyuꞌn cawil.

16 Wuꞌne in bant cycawin ke nejenel cye nasyon, ex wuꞌne in xi cybinchaꞌn jwes tiꞌj cyxtis xjal.

17 Cꞌujlaꞌn ke xjal wuꞌne, akeju cꞌujlaꞌn kine cyuꞌn, ex keju in che jyoꞌn wiꞌje, in chin cnete cyuꞌn.

18 Wuꞌne in xi nkꞌoꞌne cykꞌinumabl xjal ex nimbil cye, ex wuꞌne nneꞌl baꞌn tcyakilju in cybinchaꞌn.

19 Aju in xi nkꞌoꞌne cye mas baꞌn twitz kꞌan pwak tbanilxix, ex aju in xi woyine cye mas baꞌn twitz sak pwak tbanilxix.

20 In chin bete tuj be jikun tiꞌj, ex in chin bete tuj be tzꞌaklxix.

21 Cxel nkꞌoꞌne cyetzbil keju in che cꞌujlaꞌn weye.

22 A kman o binchante weye t-xe tnejel, tej naꞌnxtok tbant jun tiꞌxti tuꞌn.

23 In binchanjtze tuꞌn atxix t-xe tnejel, tej naꞌnxtok tbant jun tiꞌxti tuꞌn.

24 In itzꞌje tuꞌn tej naꞌnxtok cybant ke nintz mar, ex tej naꞌnxtok cyjaw jlet ke nima ex ke twi aꞌ.

25 Tej naꞌnxtok cybant ke nmak witz ex ke tal witz, otok chin itzꞌje tuꞌn Kman;

26 ex tej naꞌnxtok tbinchet txꞌotxꞌ, mi ke cojbil mi chꞌin tkukil txꞌotxꞌ.

27 Tej tbant twitz cyaꞌj, aju tjaw tibaj nintz mar, lu kine atine.

28 Tej cybant ke muj twitz cyaꞌj, ex tej cyjaket ke twi aꞌ max t-xe mar,

29 ex tej tcub tkꞌoꞌn tmojonil ex tej t-xi tmaꞌn te tuꞌn miꞌn tex kojl tuj tlugar ex tej tcub tkꞌoꞌn tkꞌukbil txꞌotxꞌ,

30 lu kine atine ttxlaj tuꞌn tcub ximet alcye tuꞌn tbant. Tcyakil kꞌij o tzalaj wiꞌje ex cucx in chin tzalaje twitz.

31 In chin tzalaje tiꞌj twitz txꞌotxꞌ otok bant tuꞌn, ex in chin tzalaje cyiꞌj ke xjal.

32 Atzun jaꞌlo, akeye ncyꞌajal, chin cybintze; cybinchame aju in xi nmaꞌne cyeye, ex tuꞌn jlu che tele tuj tzalajbil.

33 Cykꞌonx cywiꞌye tiꞌj xnakꞌtzbil ex miꞌn tzꞌel cyicꞌune ju nabl.

34 At tzalajbil teju xjal in tzaj tkꞌoꞌn twiꞌ tiꞌj nyole, ex tcyakil kꞌij in ayon ttzi njaye tuꞌn ncnete tuꞌn.

35 Porque ka ma chin cnete tuꞌn, cnetel tchwinklal ex cnetel t-xtalbil Kman tuꞌn;

36 pero ka ma tzꞌel tpaꞌn tib xjal wiꞌje, tuꞌnx cbajel tcꞌixbisan tib, ex cycyakil keju in chin el icꞌune cyuꞌn in che jyon tiꞌj camic.